Портал:Лӧпшопедия/Лӧпшо Педунь сярысь

Тон туж трос лыдӟи удмурт литератураен библиотека. Реклама право вылын: сюдыны-вордыны та бамез 0 % текстэз Викитека.

/удмурт калыккылос/

Ресторанын

Лӧпшо Педунь ресторанын пе пуке. Со доры офсианка лыктэм но юа пе: «мар сиоды-юоды?» Педунь солы 9 чашка чай заказ лэсьтэм. Офсианка серекъяса пе вера: «малы 9 гинэ, ойдо 10 чашказэ ик ваё!» Нош Педунь солы верам: «мон 10 чашка чай юыны скал овол!»

Кисаль

Одӥг пол Лӧпшо Педунь доры кыче ке адями пырем. Лӧпшо Педунь со виын кисаль сиыса пуке вылэм. Возьмамтэ кунозэ ӝӧк сьӧры, пе, пуксьыны косэ.
— Тау, уг поты, — шуэ, пе, соиз. — Мон сое уг яратӥськы. — Нош ачиз пумен дыльдызэ ньылэ. — Потэ-а, уг-а, отё бере — пуксёно, — пуктэм ик кунозэ Педунь ӝӧк сьӧры.
Куноез кисальзэ веръям но, туж, пе, ческыт. Быдэс тусьты сиытэк, ӝӧк сьӧрысь потымтэ.
— Ческыт вылэм та сиёнэд. Кызьы солэн нимыз? — юам со Педуньлэсь.
— Кисаль, — шуэм Педунь.
Куно Педуньлэсь верамзэ кылэм но, ури-бери дораз бертыны потэм. Бызе, пе, сюрес кузя. Тури кадь тэтча. Ызьыез но йырысьтыз усьыса кылем. Ызьызэ ӝутонъяз, сиёнлэсь нимзэ вунэтэм. Нош Педунь доры мынэм.
— Тон сюрес кузя мыныкуд, — шуэм, пе, Педунь, — «кисаль, кисаль» шуыса бызь. Нош сюрес соку нӧд, гылыт вылэм. Мынэм, мынэм со адями но, пыдыз гылӟыса, напрае усем. Нош сиёнлэсь нимзэ вунэтэм. Мар табере кароно? Кыллён интыяз ик ӝожомыса чапкиськем со. Султыса вуымтэ — вӧзтӥз ортчись луэм.
— Мар отысь утчаськод, уром? — юам пиосмурт. Соиз номыр вазьымтэ. Ньыльпыдъяськыса, пе, султыны выре.
— Ма, уром, — шуэ, пе, сюресчи, — мар татысь шедьтод на. Сюресэз мыныса-ветлыса кисаль кадь кариллям ни ук.
Пиосмурт интыысьтыз тэтчыса ик султэм но, «шедьтӥ, шедьтӥ!», пе, шуыса кесяське. Бызьыса сямен дораз бертэм.

Пӧртмаськись корка

Педуньлэн коркаез куашкан калэ вуэм. Сэрегъёстӥз, пе, тӧл шула, янакъёсыз супырӟиллям. Мумы корез карнан кадь куасалскем, чигонэз гинэ вань на.
— Олӥ-олӥ, ма каром, кызьы толъём на, — лул ӟылэ Педунь. — Коньдон ӧвӧл, нюлэс нокин уз сёт.
Кытчы пырыны, ма карыны ёрмыса, Педунь уйёсы кӧламысь ик дугдэм. Ялан, пе, тамак пурккетэ. Пичи корказ со мында ӵын люкаськем, коть тӥр, пе, ош.
Нокыӵе амал шедьтымтэ.
— Коть шалаш дасяло-ай, — шуэм но азбараз гу копаны кутскем.— Коркае куашкано-мар луиз ке, отын но улыны быгатомы, милем грос кулэ ӧвӧл.
Нунал, кык копам. Куинетӥ нуналаз лопаткаез маке чурыт арбери шоры мырзиськем. Донге но — торк! гинэ вазе. Жоген син азяз горшок потэм. Учкем пушказ но, сюлмыз ик путэ вылэм: горшокын тыраз зарни, пе. Табере Педунь уката шуге-леке вуэм. Уг вала ма карыны зарниеныз: властьёс тодӥзы ке, та- лалозы, ассэ каталажкае пуктозы. Кышноезлы но вераны уг дйсьты: одно калык пӧлы вӧлдоз, ушъяськоз.
— Та зарниен выль корка ке пуктысал! — сипыртэ Педунь.
Кема малпаськем. Бамъёсыз кӧсэктӥллям, куасьмиллям, нырыз кузялскем. Одокез шӧдэ: Педунен маке но умойтэм.
— Ма пӧсекъяськод, Педунь, висён кутӥз шат?— юам кышноез. Соиз сьӧд но, тӧдьы но ӧвӧл куаретэм.
Бӧрысь ини ятвылтэм ма карыны. Одоксэ эскерыны малпам: быгатоз-а со ымзэ пытсаса возьыны. Огпол вазь ӵукна ик султэм но муръёзэ усьтэм. — Ма турттӥськод, Педунь?— юам Одокез.
— Ӵанаез кыре лэзи.
— Кыӵе ӵанаез? — ӟудэм Одокез.
— Ӧйтӧд, верано оло ӧвӧл, — шуэ Педунь, ачиз укно пала учкылэ, кышнозэ уката узатэ. — Уг, уг, мон тыныд номыр уг вера, одно зулёд.
— Сямме шат уд тодӥськы,— керӟегъяське Одок. — Кулэ дыръяз мынэсьтым ымме сиктанэн но уд усьты.
— Озьы, озьы, Одоке, — пальпотэ Педунь. — Туннэ султӥ но учкисько: гур азямы ӵана пуке. Дорам лыктӥз но адями куараен шуэ: «Педунь, лэзь монэ кыре, кулэ ке луиз, котьмаин юртто, шулты гинэ — дорад вуо». Тӥни мон сое кыре лэзи.
— Ой, ой, Педунь, ишан ук со! Маке но асьмемын луоз, — лулӟылэ Одок.
— Мон но озьы ик малпасько. Ишан со, ишан. Юнме шорысь ӵана корка уз пыр. Только тон нокинлы эн поттылы та сярысь.
Педунь тӥрзэ кутэм но нюлэскы кошкем, нин, пе, корало-ай. Ачиз номыр лэсьтымтэ. Солы Одоксэ гинэ эскероно вал.
Ӝыт пал бертэм но ошмес вӧзы саюлэ выдэм. Ӝоген татчы ог дасо нылкышноос люкаськиллям.
— Кылӥды-а,— ӵашетэ Горд Марпа. — Педуньлэн пукись курегез дас вить ӵана поттэм.
— Дас вить тыныд, — пумитъяське Кирло Орина. — Куамын вылэм, Одок кенак ачиз мыным вераз.
Педунь ас понназ гор-гор серекъя, мыйыксэ гинэ позыръя на. Гуртаз бертэм но кышнозэ нош кышкатэм на. Коркамы, пе, пӧртмаське.
Нюлэскысь вуыса пыри но либырак луи, шуэ, кин ке корка тыр шула, мудоръёс син азям йыр чукин берытскизы.
— Ишан со, ишан, Педунь, — нош ик куректэ Одок.
— Мон но озьы ик малпасько, — шуэ Педунь. — Пери шоры шедемлэсь азьло пегӟом татысь, коркамес куашкатом. Та мумы коре шукконэз гинэ вань.
Вай тйробыкен огпол сёто.
— Нош кытын-о уломы?— лулӟылэ, пе, Одок.
— Шедьтэм ма сярысь сюлмаськыны. Вунэтйд-а ӵана сярысь, солэсь корка куром.
Одок куаретымтэ ни. Котьма, пе, мед кароз, Педунь ачиз тодоз ма лэсьтыны.
— Тон, Одок, али кенакед доры ветлы, куное ӧтиз, — шуэм Педунь. — Нош мон каре шонтыло-ай. Калыкен кемалась ни адскылэм, сюлэм мӧзме.
Кышноез кошкем бере, Педунь горшокысьтыз зарнизэ пуйые тырем но кар пала шонтэм. Татын со туж бадӟым корка басьтэм. Дае вить подводэн гуртаз бертэм но уй куспын корка пуктэм. Юрттӥсьёссэ утялтыса, ачиз выль полатяз тубем. Одок бертэм но ма вераны ик ёрмем: вуж юртсы интыын шыкыс кадь выль корка сылэ.
— Кызьы тазьы, Педуне, быгатӥ-и-ид? — юам со.
— Ма отын паймонэз. Чанаос юрттӥзы,— шуэм Педунь. — Только нокинлы эн вера.

Кӧттыростэм купец

Одӥг купецлы ачиз кема иземен нунал вакчи потэ вылэм. Калыкез ужаны медъякуз, нунал эшшо но вакчиёме вал, лэся, ужаменызы ноку кӧтыз уг тыры вылэм. Огпол та купецлэн одӥг нуналскын корка лэсьтыса быдэстэмез потэм. Соин ик нунал кузь карисез утчаса ветлыны кутскем. Нунал ветлэм утчаса, ӧвӧл шедьтэм нуналэз кузь карыны быгатӥсь адямиез. Кыкетӥ нуналзэ ветлэм — ӧвӧл шедьтэм. Куинетӥ нуналаз гинэ Лӧпшо Педунез шедьтэм.
— Ма муген мон доры лыктоно луид-ай?— юам соиз.
— Мыным нунал туж вакчи потэ. Медъям ужасьёсы трос ик ужаса уг вутто, нош уксё соослы тыр, со вӧзы ик сюд. Мынам кызьы ке нуналэз кузь кареме потэ но нуналэз кузь карыны быгатӥсь муртэ уг шедьтӥськы. Тон нуналэз кузь карыны уд-а быгатӥськы меда шуыса, юаны лыктӥ.
— Э-э, хе-хе! Кызьы гинэ кузёез доры ик лыктыны шедьтӥд? — мылкыдыз капчи луыса, «мон тае пунэмзэ тупато-ай» шуыса, ас понназ, пе, серекъя Лӧпшо Педунь.
— Дас пуд пызь сётӥд ке, верало. Мон чик но ӧй курысал, сотэк эм уз луы, соин курисько, — шуэм Лӧпшо Педунь.
— Ма со дас пуд пызез но уг жаля, только ӝоггес вера гинэ.
— Тани кызьы нуналэз кузь кароно, — ладэн-ладэн вераны кутскем Педунь. — Дӥсяно шунытгес дэрем, пиджак, со вылэ тулуп, пыдад гын сапег, нош йырад секыт изьыдэ пон, саник кут но, ӝужытгес кызьпу йылэ тубыса, шундыез бышкалтыса возь. Валад-а?
— Валай, валай. Туж тау тыныд та визь-кенешед понна. Празднике куное лыкты, ачим тонэ туж ӟеч куно каро.
Купец гуртаз вуэм но шумпотыса кышноезлы, пе, вера нуналэз кузь карыны дышемез сярысь.
Гужем пӧсь, самой кузь нуналэ корка лэсьтыны калык ӧтчам. Ӵукна ик шуныт дэрем, пиджак, тулуп дӥсям, пыдаз гын сапег, йыраз шуныт, секыт изьы нонэм но, кияз кузь саник кутыса, самой ӝужыт кызьпуаз тубем. Ужасьёсыз ужало но ужало, пе. Купец но шундыез саникен «бышкалтыса» возе. Пӧсяменыз вылтыртӥз ву вия ини, киосыз пыктэм кадь луэмын, пе.
Ужасьёс ялан дугдылытэк ужало. Купец нош, ужаны ӧтьыкуз, «мон кызьпуысь васькемлэсь азьло ужамысь дугдоно уд луэ» шуыса, туж зол верам. Кышнозэ но чакланы косыса кельтэм. Кызьпу йылын улыса, купецлы нунал туж кузь потыны кутскем. Солэн та дырозь таӵе кузь нуналэз тодэмез ик ӧвӧл вылэм.
Нуназе ӧжыт гинэ ортчыса вуэм но, мунчое пырем кадь котмем купец, суйёсыз зырын тышкам кадь жадиллям. Озьы жумылак луыса, кызьпуысь васькем.
— Ну, ужасьёс, туннэ туж кема ужады ини, ок- моз, — шуыса, ужасьёссэ, ӝыны нунал гинэ ужатыса, туж зеч сюдыса лэзем. Ужасьёс, марзэ-созэ валатэк, капчи мылкыдын гуртазы бертӥллям. Купецез со дырысь «кӧттыростэм купец» шуиллям.
Озьы купец нуналэз кузь карем. Лӧпшо Педуньлы дас пуд пызь сётэм, со вылэ ик туж зол куно карыса лэзем.

Вукоез кырем

Одӥг пол Ганя урамысен Лӧпшо Педунез пумитам.
— Педунь, тонэ лӧптылыны яратӥськод, шуо, алда али монэ.
— Алдасал но — уг ваньмиськы: Комак вукоез кырем, отчы чорыг кутыны дыртӥсько.
Узыр Ганя ӝогак дораз бертэм, валзэ кыткем но Комак гурт пала ворттэм. Вуэм со вуко доры но адӟе: вуко азьло кадь ужа. Юа ни, пе, мельниклэсь:
— Мар куспын тымыса вуттӥды?
— Кызьы мар куспын? Со милям дас ар мында ужа ни.
Соку гинэ валам Ганя умойтэме шедемзэ.

Лӧпшо Педунь пӧртэм суредасьёслэн суредъёсазы

• 

  Лӧпшо Педунь (Менсадык Гариповлэн)

• 

  Лӧпшо Педунь (Леонид Прозоровлэн)

• 

  Лӧпшо Педунь (Михаил Вахринлэн)

• 

  Лӧпшо Педунь (Рем Тагировлэн)

• 

  Лӧпшо Педунь (М. Степановалэн)

• 

  Лӧпшо Педунь (М. П. Соколовлэн)

• 

  Лӧпшо Педунь (Игорь Зубковлэн)

• 

  Лӧпшо Педунь (Ольга Китовалэн)

Медо

Одӥг поп туж чурыт но кӧттыростэм вылэм. Мо дооссэ туж трос ужатылэм, нош уждун тырыны вунэтылэм. Соин ик поп доры нокин но ужаны уг лыкты ни, пе.
Таяз учыре Лӧпшо Педунь кемдэм. Со поплэсь сямзэ туж ӟеч тодэ вылэм. Вераськиллям нуналаз кӧттыр вылэ гинэ ужаны. Мыдъят ӵукна Лӧпшо Педунь, из шерзэ кус пулсаз донгыса, кусозэ пельпумаз понэм но шунды ӝужамлэсь азьло ик поп доры вамыштэм. Солэн такем вазь вуэмезлы поп шумпотэм. Озьы ке но, нокыӵе ик кариськымтэ, огшоры гинэ вазем: — Я, туж умой, вазь султӥсь муртлы инмар котькинлэсь трос шудбур сётэ. Собере лысву вылтӥ турнаны но капчи луоз.
— Озьы, озьы, батюшка, инмар шудбур мед сётоз, — йырзэ мыкыръяса вазем Педунь.
Поп йылсо тушсэ маялтэм но медозэ сиськыны ӧтем:
— Я, ойдо сиськом но собере ужаны кутском, а то шунды уз витьы, ӝужалоз.
Сиськыкузы но поп малпа кызьы ке но сиён ичигес быдтыны. Кӧтсы тырем бере поп шуэ, пе:
— Ойдо одӥг кутскемен нуназезэ но сиськом ни. Марзэ токма сьӧре сиён нуллод.
— Туж шонер малпамед, батюшка, — поплэсь мылкыдзэ ӝутэ Лӧпшо Педунь. — Собере нуназеяны но дугдылонэз уз луы, юнме дыр уз быры.
Нуназелы дасям сиёнзэс быдэн пуньы сииллям но кӧтсы тырем.
Поплэн эшшо маке малпанэз вань на, шӧдске, ӝӧк сьӧрысь султыны уг дырты, пе. Озьы огесэп малпаськемез бере, йырыныз ик шонтыса вазем:
— Либо ке дась ӝӧк сьӧрын ӝытэз понна но сиськом шат? Тани ачид малпа-ай, ӝытазе ужысь жадьыса вуэм бере, мар юнме дырез сиськыны быдтод, чалякгес ческыт зыно турын пӧлы выд но ӟар потытозь изь, жадем ёзвиостэ шутэтскытыса. Лӧпшо Педунь тае гинэ витьыса улэм.
— Ну, батюшка, йырвизьмыд тынад туж бадӟым, мон улытозям но озьы малпаны ӧй быгатысал, — синъёссэ ик кыньыртыса верам со. Соос эшшо быдэн пуньы зузиллям но, сиёнзы уг мын ни, пе: кӧтсы тыр.
Жыт понна сиськемзы бере, Лӧпшо Педунь ӝӧк сьӧрысь султэм, мудор шоры кариськыса, кирос понэм, сукманзэ кутэм но поплэн турын возён интыяз вамыштэм. Поп чылкак паймем.
— Тон кытчы озьы? — кеськемзэ ик шӧдымтэ со. Ма кытчы луоз? Изьыны, — мынон сяменыз ик вазем Лӧпшо Педунь. — Жытсэ сиськем бере, котьку кӧлыны выдоно ук, батюшка.
Поп, мар шуыны ёрмыса, йырберзэ кормаса, интыяз ик кылем. Нош Лӧпшо Педунь ческыт зыно турын вылын кема гинэ изем. Султэмез бере, поп дорын куноямзэ ас понназ серекъяса, дор палаз вамыштэм.

Ярмаркаын

Азьло дыръя Алабгоын бадӟым ярмарка луылоз вал. Одӥг пол, ярмарка усьтӥськон вакыт, Лӧпшо Педунь отчы мыныны дасяськем. Ӵукна пеймытэн ик султэм, вылаз пустол пиджак, пустол шаровар дӥсям, йыраз купецъёслэн кадь шляпа понэм, пыдаз чильдол кисьтаськись хромовой сапег кутчам, кияз вакчи сюло кутэм. Озьы со котькинлэсь азьло ярмаркае потэм но, вузкаронлэсь самой умой интызэ бырйыса, ог сю вамыш пала мертам. Ветлэ ни, пе, та быръем интыетӥз мыд-мыд пала, купецъёсыз возьмаса.
Тани нырысез купец бадӟым обозэныз вуиз, пе. Юа ни Лӧпшо Педуньлэсь:
— Малы татӥ ветлӥськод, та мынам вузкарон интые вал ук?
— Уд адзиськы-а, та инты буш ӧвӧл ни, — шуэ, пе, соиз. Ачиз со пала сю вамыш мынэ, сюлоеныз сапег кунчияз шлач! шукке, та пала сю вамыш лыктэ, сюлоеныз нош ик сапег кунчияз шлач! шукке, пе.
Со куспын мукет купецъёс но вуылыны кутскиллям ни. Педуньлэсь юало, пе:
— Тон кин?
— Мон купец, мынам тӥлесьтыд но бадӟым обозэ татчы вуыны кулэ, соин ик интыме нокинлы уг сёты.
— Нош кудпалась тон?— ӟудэменыз юам нырысез купец. — Мон маке тонэ уг тодӥськы кадь.
— Мон Уксё-Кырмат палась, кылэмды вань-а?
Купецъёслэн нокыӵе Уксё-Кырматэз кылэмзы ӧвӧл ке но, «вань» шуо, пе: нокинлэн но ассэ тодӥсьтэмен возьматэмез уг поты уго.
Со куспын калык но ярмаркае люкаськыны кутскем ини.
— Эк ма! — шуэ, пе, Лӧпшо Педунь, йырберзэ кормаса. — Та обозэ маке ӝеганы кутскиз. Уксё- Кырмат палась сюрес урод вал, лэся, оло нуназе беретэк уз но вуэ…
— Вуза та интыдэ милемлы, — тэльмырыны кутскиллям купецъёс.
— Уг, — вера, пе, Лӧпшо Педунь.
— Вуза, ми тыныд котькуд вамыш инты понна быдэн витьтон коньы сётом.
— Уг, — шуэм Педунь нош ик.
— Ме соку басьты вамышезлы быдэ манет.
Озьы Лӧпшо Педунь сю манетсэ кисыяз понэм но сюлоеныз сапег кунчияз шлач! карыса кошкем.
Пуке ни Педунь трактирын, ческыт сиён сиыса. Со куспын ӵапак огез купец пырем. Нош ик юано кариськем:
— Вера-ай тон мыным, кудпалан со Уксё-Кырмат?
— Нырысь тон палан, табере — мон палан.
— Кызьы озьы? — валамтэ купец.
— Тынад сю манет уксёед вал-а?
— Вал.
— Тон сое кияд кырмад-а?
— Кырмай.
— Табере со уксёдэ мон кырмасько, вот мар со Уксё-Кырмат.
Купец юмоке сюремзэ валам но номыр каремез луымтэ ни. Нош Педунь ӟеч дӥсьсэ трактирлэн кузёезлэсь басьтылэм вылэм. Аслэсьтыз крестьян дӥсьсэ выльысь дӥсям но дор палаз кошкем. Тӥни кызьы но маскаръяськыны быгатоз вылэм Лӧпшо Педунь. Та учыр сярысь со горд тушо муртлы верам, соиз сьӧд тушо муртлы, нош таиз мыным вераз, табере тӥ но тодӥськоды ини.

Визь-кенеш сётӥз

Одӥг гужем Лӧпшо Педуньлэн ларсез старосталэн иншыраз ветлыны дышем. Бодыен но тышкаса лэзе, пе, сое старосталэн кышноез, мажесэн но кышкатэ, парсь ветлэмысь уг дугды. Нош кинлэн со — тодӥсь ӧвӧл. Староста соизлэсь но, таизлэсь но юа, кинлэн парсез шуыса, нокин уг тоды.
Ма карыны ёрмыса, староста Лӧпшо Педунь доры мынэм ини табере.
— Озьы но, тазьы но карыса утчай ини, нош парсез иншырысьтым улляны ӧй быгаты, кузёзэ но ӧй шедьты. Юртты вал, Педунь, номырме ӧй жалясал, кабанме быдтӥське ни парсь, — ӝожтӥське, пе, староста.
— Ярам, — шуэ Педунь, — мыным трос кулэ ӧвӧл. Одӥг мешок пызь сётӥд ке, тырмоз. Туж умой визь-кенеш сёто. Жыны мешок кӧжыдэ вышкыяд тордыты но ваньзэ парсьлы сёт. Парсь сиыса быдтӥз ке, чалякгес улляса лэзь, иншырад ик кулыны медаз шедьты, мара. Тордыса кулӥз ке, нерад луод.
Озьы ик лэсьтэм староста. Нош Педунь парсьсэ азьло ик вандыны дасяськем вылэм ни, соин ик старосталэн иншыраз дышетэм: мед, пе, куаёз. Озьы староста Педуньлэсь парсьсэ но куайытэм, вылаз ик одӥг мешок пызьзэ сётэм на Лӧпшолы.

Георгиевской кавалер

Германской война вакытэ Педунез армие басьтӥллям. Мумиз солы выль бинялтон дасям, бубиз выль кут сётэм. Песьтэраз сухари, куасьтэм паронка, кӧня ке йыр сугон поныса, Педунь сюрес вылэ потэм.
— Эн бӧрдэ, — шуэ, пе, мумизлы-бубизлы, — гожтэтме витьыса-мар эн улэ, почталэсь ӝог ачим вуо.
Педунез пырак граница пала нуиллям. Отчы вуытозяз сухариез но, паронкаез но бырем. Мукет адями сыӵе дыръя ма карыны ёрмысал ни, нош Педунь, азьло сямен ик, ӧрӟи кадь, пе. Командирзы оскымтэгес солы но шуэм: — Тон, Педунь, обозэ мынод. Ымнырыдъя но вылтусыдъя ик адзисько: кышкась адями тон. Вожез потэм Педуньлэн, возьмато-ай, пе, тӥлед. Ӵуказеяз ӵукна командирзы вал кыткыны косэм. Педунь однако ужпи котырын берга. Валзэ серметам но уроболы азьыныз кыткем. — Ма озьы шат валэз кытко?— серекъяло сое.
— Юнме гориськоды! — кеськем Педунь. — Адями тачкаез котьку тазьы азьпалаз нуллэ. Нош вал маин урод? Тодэмды ке потэ, та ужпи, оло, тӥлесьтыд но визьмо.
Педунез обозысь улляллям.
— Ыстэ монэ разведкае, уд жалялэ, — шуэм Педунь.
Командир ӵок шуэм, татын юнме люкетэ гинэ, пе. Ӵапак со уе тушмонлэсь окопъёссэ эскероно луэм. Самой сэзьёссэ кызь солдатъёсты разведкае ыстӥллям. Мынод ке, тон но мын, шуиллям Педуньлы.
Вазь ӵукна разведчикъёс берлань берытскиллям, тушмонэз ӧвӧл адзиллям.
— Педунь кытчы кылиз? — юам командирзы.
— Со азьпала мынӥз на, — шуо солдатъёс.
Куинь нунал ортчыса, Педунез чылкак вунэтйллям: оло, вал со дунне вылын, оло, чик ӧз но вордскылы. Адями чиптэм-чаптэм ышиз. Но ыштод-ай, пе, сое озьы гинэ. Вуонояз ӵукна Педунь ротаяз вуэм. Чал пуке, пе, казарма азьын, пал кыл но уг вера.
— Педунь, кытчы тон ышылӥд, мае адӟид? — юа командир.
— Мон татын номыр уг вера, верало полковниклы гинэ, — шуэм соиз. Вуттӥллям Лӧпшоез полковник доры. Педунь чот-чот султэм но кисыысьтыз германской знамя поттэм.
— Молодец! — шумпотэм полковник. Соку ик Педуньлэн гадь вылаз Георгиевской крест бырттэм.
— Слуш… ваш… благородие! — кеськем Лӧпшо.
— Табере вера, кызьы та знамяез шедьтӥд? — юам полковник.
Тазэ генераллы гинэ, пе, иворто. Педуньлы выль брюки, гимнастёрка, сапег сётӥллям. Гадь вылаз, пе, Георгиевской крестэз чиля. Нуиллям генерал доры. Генерал солы кыкетй степенё Георгиевской крест сётэм на. Но Педунь генераллы но номыр верамтэ. Мон, пе, адӟеме сярысь аслыз эксэйлы гинэ верало.
Нуиллям Педунез пырак Зимний Двореце. Татын сое нырысь ик зарни тусьын миськиллям. Юсь мамык валес вылын шутэтскытӥллям, сюдӥллям-секталлям, ческыт зын вуосын пызӥиллям. Ӵуказеяз гинэ эксэйлэн кабинетаз пыртӥллям.
— Тӥляд ӧтемдыя ефрейтор Лӧпшо Педунь лыктӥз, ваше высочество! — кеськем зал тыр Педунь.
Эксэй гор, пе, серекъя. Педуньлэн гадь вылаз ачиз нырысетӥ степенё Георгиевской крест бырттэм. Озьы Педунь Георгиевской кавалер луэм. — Ну, табере вера, — курем эксэй, — кызьы тон немецлэсь полковой знамязэ басьтыны быгатӥд?
— Быгатӥ, ваше высочество! Мон разведкае мынон азям ротаысьтымы царской знамямес кутӥ, — шуэм Педунь. — Малпай, ӝоген со кулэ уз луы ни. Асьмелэсь знамямес немецкой солдатлы кузьмай, нош со мыным аслэсьтыз ӟепам донгиз.
— Пуны! Кош татысь! — кеськем эксэй.
— Так точно, ваше высочество — пуны! — пумитаз шуэм Педунь но. Собере ширак берытскем но окопъёсыз пала вамыштэм.

Чӧлконъёс

• Лӧпшо Педунь но агай-вынъёс (ӟуч комикс)
• Лӧпшо Педунь но сьӧд пиар (ӟуч ӧтён-ӝуткан листовка)

Тодмостон