Портал:Лӧпшопедия/Такмакъёс

Тон туж трос лыдӟи удмурт литератураен библиотека. Реклама право вылын: сюдыны-вордыны та бамез 0 % текстэз Викитека.

     •••
Азяд керттэм азькышетэд
Пужыен нюръям тынад.
Лыктэм дырысьтыд учкисько —
Уӵы тусыд вань тынад.

     •••
Азям кельше тӧдьы айшет,
Йырам кельше сьӧд кышет.
Мылам-кыдам кельшиськоды
Тӥ, яратон эшьёсы.

     •••
Анай монэ вордылэм но
Кыед улэ согылэм.
Курег ӵабъяса поттэм но,
Соин ик мон толыктэм.

     •••
Арамае эн пыралэ —
Льӧмпу сяська пазьгиськоз.
Муртлы кылдэс эн вералэ —
Муртлы секыт кылӥськоз.

     •••
Ачим пичиен-а, мар-а,
Сапегам лымы пыре.
Ванез-ӧвӧлэз уг тоды,
Ньылоны вина куре.

     •••
Бадяр чебер, бадяр чебер,
Бадярлэн куарез чебер.
Мон ачим чебер ӧвӧл но,
Мынам эшъёсы чебер.

     •••
Бригадир сётэ наряд:
Ваньды султэ одӥг рад.
Очан Коли шумпотэ:
Мон ӧй тэр одӥг радэ!

     •••
Бусы капка, пияла капка —
Усьтӥськоз-а усьтытэк?
Милям пиос туж куштонэсь —
Вазёзы-а вазьытэк?

     •••
Бусы ужъёс бырем бере,
Кун премия сётказы.
Мон но, лодырь, мынэм вал но,
Пӧлы пум возьматӥзы.

     •••
Бусые потса чияк шултӥ —
Луд ӵӧжъёсты кышкатӥ.
Гуртэ пырса ог гур кырӟай —
Изись калыкез сайкатӥ.

     •••
Бызьса туби кызьпу йылэ,
Вулэсь бамзэ учкыны.
Вулэн бамыз вож вылэм но,
Мынам сюлмы ӝож вылэм.

     •••
Бызьса туби кызьпу йылэ
Тӧдьы тӧлась туй понна.
Бызьса васьки кызьпу йылысь
Горд кышетэн ныл понна.

     •••
Бусы вӧзтӥ кошке трактор,
Моторъёсыз чиляса.
Клубе пото Ӟуння пиос,
Нырулъёссы чиляса.

     •••
Вакытазмем курег чоръя,
Зудэм ӵӧж берлань уя.
Ми, калыкез паймытыса,
Лэзём али кырӟаса.

     •••
Весь турын чай, весь турын чай
Пул чай но юэм потэ.
Весъ удмурт ии, весь удмурт пи,
Ӟучсэ но утчам потэ.

     •••
Вина, шуо, вина, шуо,
Вина талонэн, шуо.
Кышно талонэн ке луысал,
Мон кышнотэк кыльысал.

     •••
Вить аръёслы пусъем планмес
Ньыль ар куспын быдэстом.
Туэ потэм газетмылы
Быдэс гуртэн гожтӥськом.

     •••
Возь вылэ но мон васькалляй,
Кусоосме кутыса.
Турынъёсыз ӵогон сяин
Сюриз италмас сяська.

     •••
Вуэ усеем, ой, майталэз
Уг лу кылын басьтыны.
Ортчем пинал, ой, даурез
Уг лу дунэн басьтыны.

     •••
Выж пумады лыз сяськады,
Тӧл уг йӧты-а солы?
Макес куспады кольтранды,
Сӥть уг йӧты-а солы?

     •••
Выллапала тубисько но —
Ӟуння нылэз адӟисько.
Ӟуння нылэз, чебер нылэз
Уйлы быдэ вӧтасько.

     •••
Гагак! шуэ ӟазегед но —
Вуэ ини тулысэд.
Дыр-дыр! каре тракторед но,
Кытын меда поглянэд?

     •••
Гордэз весе, гордэз весе,
Гордэз весе намер кадь.
Гордэз весе намер кадь но,
Яратонэ горд ош кадь.

     •••
Гуждор вакчи, гуждор вакчи,
Гуждорез турнан уг лу.
Визьмы вакчи, визьмы вакчи —
Муртлэсь басьтыны уг лу.

     •••
Гур вылысен ӝӧк сьӧръёсы
Чугун сюрес луысал ке,
Ми кадь лодырь, ой, муртъёслы
Нунал праздник луысал ке.

     •••
Гурезь улын пу артана,
Гур эстыны ярано.
Ӟуння пиос — кырыж кукъёс, —
Дӧдьы куасан ярано.

     •••
Дас, дыр, тынад чиньыед но,
Дас одӥг, дыр, зундэсэд.
Огзэ мыным сётсалыд ке,
Чилясал, дыр, чиньые.

     •••
Дас час али, дас час али,
Дас одӥг ӧвӧл али.
Тон бызьымтэ, мон басьтымтэ
Даур ортчымтэ али.

     •••
Дӥсяло-ай кузь дэремме,
Мед урамез ӵужылоз.
Монэ туган визьтэм шуэ,
Визьмозэ мед утчалоз.

     •••
Дядиелэн бакча бераз
Кушыё мак кизем вал.
Тӧлӟиз-кошкиз мак сяськае,
Кытчы кылиськем адӟытэк?

     •••
Жаль ке ӧвӧл одӥг сюмык,
Со уз луы, дыр, сьӧлык.
Ӟеч кыл вӧзы эшшо сюмык —
Тордослы шедьтэм байлык.

     •••
Ӝуаз мынам сьӧд пальтое —
Кылиз бирдыез гинэ.
Куштиз монэ яратонэ —
Кылиз патретэз гинэ.

     •••
Ӟуння мусо, ӟуння дано,
Ӟуння маиныз дано?
Ӧрӟи кадесь пиосын но
Уӵы кадесь нылъёсын.

     •••
Ӟуч кадь юисько,
Пор кадь кудӟисько,
Бигер кадь кырӟасько,
Удмурт кадь пограсько.

     •••
Инмар понна, шунды понна,
Актэмыре уг бызьы.
Одӥг гинэ чебер пизы,
Со но дэра ыштанэн.

     •••
Кикы пиез чечег сюдэ,
Аслаз пиез кожаса,
Куд-ог пиез портфель сюдэ,
Сое визьмо кожаса.

     •••
Кин йырзэ урдыса кошке —
Оло, туганэ, лэся?
Мӧля вылаз мар ке пиштэ, —
Оло орденэз, лэся?

     •••
Кион ветлэ мур нюкетӥ,
Кылем шӧез утчаса.
Ӟуння пиос сьӧрло ветло,
Мылем нылэз утчаса.

     •••
Кисыысьтым вож лентае
Кыстӥське но кыстӥське.
Мынам картэ — шаян мар ке,
Весь нылъёслы синмаське.

     •••
Кызьпу чурыт ӵогыны но,
Вузэ юыны туж ческыт.
Яратонэ туж чебер но,
Верам кылыз туж чурыт.

     •••
Кытысь шедьтом сыӵе саюл,
Кудӥз зор-котлэсъ утёз?
Кытысь шедьтом сыӵе туган,
Кудӥз ужатэк сюдоз?

     •••
Лулпу ӵужен дэремъёсам
Юнме чильтэр понӥськем.
Аслым ачим куректыны
Юнме картлы бызиськем.

     •••
Лыз кашамер кышетэлэн
Бер пужыез — луд ӝакы.
Та ӟуння но, ой, пиослэн
Вань малпанзы — аракы.

     •••
Монэ гинэ, ой, вордытозь
Вить куз ӟазег ворды вал.
Вить куз ӟазег ворды вал но,
Гон мамыксэ вуза вал.

     •••
Мынам картэ нош ик кудӟем,
Пож ведра доры усем,
Шыд кожаса, напсэ сием,
Ведразэ пеляз ошем.

     •••
Ойдо, ойдо! шуыны
Валэд ӧвӧл мон тыныд.
Чурыт кылдэ вераны
Ляльчи ӧвӧл мон тыныд.

     •••
Отӥ но лудкеч пытьы но,
Татӥ но лудкеч пытьы.
Та ӟуння но, ой, пиосыд —
Ваньмыз пу пилён нушы.

     •••
Пашпу мульы малы ческыт?
Сузьтӥськыса бичамысь.
Та туганъёс малы мусо?
Туж мӧзмыса адӟемысь.

     •••
Сьӧд картузэд жаль ке потэ,
Зор ултӥ эн нуллы вал.
Вуж туганэд жаль ке потэ,
Выль дусым эн куты вал.

     •••
Тӧдьы Каме майтал куштӥ,
Уг но ӝуты, мед выёз.
Чебер пилы синмаськи вал,
Уг но малпа, мед вуноз.

     •••
Тӧдьы кышет — чардакын,
Байлэн нылыз — бардакын,
Бай ныл байлы уг бызьы ке,
Мынса пыре бардаке.

     •••
Тон но олокин ӧвӧл,
Мон но олокин ӧвӧл,
Тынад олокинъяськемед,
Мыным номыр кадь ӧвӧл!

     •••
Укно карниз, ой, йылъёсы
Гӧгӧрсинъёс пуксиллям.
Пиос кильтро луон понна,
Выль причёска лэсьтӥллям.

     •••
Укно улам — сьӧд сутэре,
Ӵок, уг си — пиньы долка.
Одӥг гинэ туган нерге,
Со но кӧтам уг веська.

     •••
Улмо сётӥ, сиид-а но
Кӧмзэ музэ куштӥд-а?
Азьло туган шуиськод вал,
Таре монэ куштӥд-а?

     •••
Улмо чибор, улмо чибор
Сад бакчаын будэмез.
Туган мусо, туган мусо
Милемын кушласькемез.

     •••
Ульча вамен лента вӧлдӥ,
Тӧл зӥбонтэм, шукконтэм.
Туж кыдёкысь туган кутӥ —
Гуртэ больше бертантэм.

     •••
Чибиньёс ветло лобаса,
Кытчы пуксём шуыса.
Нылъёс ветло бӧрдыса,
Кытчы бызём шуыса?

     •••
Чигиськисько, лэся, ни но,
Куасаськисько, лэся, ни.
Та яратон туганэлэсь
Люкиськисько, лэся, ни.

     •••
Ӵуж бабылес, ой, йырсиме,
Сынай ке но, ӧй пуны.
Сьӧрлось кутэм, ой, туганме,
Куштиз ке но, ӧй бӧрды.

     •••
Ӵукна султыса вулы васьки,
Вож ведраме кутыса.
Карнан пумам уӵы пуксиз.
Мар адӟонэ вань меда?

     •••
Чукна усеем, ой, лысвуэ
Гуждор вылын воректэ.
Азьвыл улэм, ой, туганэ
Малпаса тодам лыктэ.

     •••
Шур сопалась тӧдь льӧмпулэн
Сяськаян дырыз вуэм.
Юын яратись карталэн
Нош юмшан дырыз вуэм.

     •••
Эгырен синме буясько,
Зын майталэн миськисько.
Туганлэсьбамзэ чупасько,
Соин сое алдасько.

     •••
Юбо йылэ зундэс понӥ,
Мед чилялоз шуыса,
Ӟуння пиез туган кутӥ,
Аслым медло шуса.

     •••
Яратонэ коштан луиз,
Монэн уг ни кушласькы.
Зарни пиньёс пуктылэм но,
Монэн уг ни верасъкы.

     •••
Яратонэз сяська кожай,
Ноку уз тӧлзы кожай.
Яратон секыт вылэм но,
Бышкись венез вань вылэм.