Портал:Лӧпшопедия/Пальыштыкъёс удмурт бичет

Тон туж трос лыдӟи удмурт литератураен библиотека. Реклама право вылын: сюдыны-вордыны та бамез 0 % текстэз Викитека.

°°°

— Пие, мын ай та миськем дӥсез шунды шоры ошылы, ӝоггес мед куасьмоз.
— Ой, мон ӧй сузьы шундылэн шораз…

°°°

— Юнме ти татын автобус возьмаськоды, — вазиське песянай автобус дугдылонниын сылись пияшлы. — Татчы соос праздник нуналъёсы гинэ дугдыло.
— Соку юнме уг возьмаськы, — шумпотэ пияш. — Мынам туннэ вордиськем нуналы.

°°°

— Та пыдын ветлисьёс воксё азгынмемын. Машина азьти ветло, питран улэ ик пыро ява. Правилоосты но уг тодо-а мар-а?
— Буйгатскы, — шуэ инструкторез. — Ойдо ай машинадэ тротуар вылысь васькыты.

°°°

Кык воргоронъёс коляскаё мотоциклэн сюрес вылти ширто.
— Сокем шаплы эн мыны, — шуэ коляскаын пукисез. — Татын пыдэсыз овол.
— Нош тон мотциклмылэн моторез вань кожаськод-а мар-а? — вазе руль сьорын пукисез.

°°°

Толон Олломоллотолловаллё гуртын лымы сузянъя чошатсконъёс ортчизы. Вормисе потиз Паримон песятай. Со жыны час куспын быдэс азбарзэ одиг пыры но лымы кельтытэк сузям. Гуртоосыз 70 аресъем Паримон песятайлэн сыче шаплы ужамезлы паймемын. Кышноез, Параска песянай гинэ уг паймы. Чошатсконъёс кутскон азьын со Паримонлы лымы улэ черык аракы вати шуыса верам.

°°°

Абдрам гуртысь Абдрам Абдрамов ульчаысь абдрам ыжез адзыса абдраменыз мар карыны ик абдраз. Нош абдрам ыж абдраса сылись Абдрам Абдрамов шоры учкыса воксё но абдраз. Со дырысен Абдрам гуртысь Абдрам Абдрамовлэсь абдрам ыжен пумиськем ульчазэс Абдрам ульча нимало.

°°°

Абдрамов аудиторие вуиз лекция кутскем бере ги­нэ. Преподаватель со шоры кунэрскыса учкиз.
— Вождэс эн поттэ, кӧлэме кылиськем. Быдэс уй ӵоже математикаез дышетӥ, — могаса мырдэм кылӥськымон шуиз Абдрамов.
— Ярам, пуксьы ас интыяд. Но эшедлы вера: мукетъят ымдурзэ помадаен медаз ни буя.

°°°

Абдрамовез егит гожъяськисьёслэн семинаразы ӧтиллям но анкета сётӥллям. Отын, пе, «кыӵе кылын гожъяськиськод» юанлы но валэктоно вылэм. Абдра­мов ӧжыт малпаськем но тазьы гожтэм: «Гожъяськисько удмурт кылын но, ӟуч кылын но… Одӥг кадь — ляб».

°°°

Нырысетӥ семестр ортчем бере ик, таӵе ивор вӧлмиз: Абдрамовмы кышнояськыны ӧдъя.
— Туж вазь ӧвӧл-а? — солэсь юаллям эшъёсыз.
— Вазьгес ик бен но, ма карод. Ӟудэм ӵӧж, пе, берлань уя. Асьмелэн студенческой столовоймы вылэ вить ар ӵожелы оскытскыны нокызьы уг луы.

---

---

°°°

Выль ар шулдыръяськонъёс азьланьтисько. Жок сьорын пуко арлыдо воргорон но егит пи.
— Таяз аре мон тилесьтыд нылдэс кышно ваё, — шуэ егит пияш.
— Зэмзэ ик-а? Нош мынам кышноен тон вераськид-а ни?
— Бен, но мыным тиляд нылды кельше!

°°°

Выль ар шулдыръяськон бере Онди валес вылысьтыз мырдэм но кызьы султиз но жок вылысь гожтэтэз адзиз. Кагаз юдэс вылэ кышноез гожтэм: «Выль арен!» Возаз пичигес букваосын ватсамын на: «Мон уже кошки, сылалтэм огречлэн вуэз холодильникын». Улиязгес гожтэмын на: «Холодильник кухняын».

°°°

Профессор студенткалэсь юа:
— Вералэ ай, «яратисько» глагол вуоно дырын кызьы луоз?
— Яратисько — бызё.

°°°

Одиг атас мукетызлы шуэ:
— Ойдо лавкае ветлом.
— Малы?
— Гольык курегъёсты учкыны.

°°°

Кык воргоронъёс Москвае мыниллям но — туж сиемзы потыны кутскем. Ад з о- ресторан. Пырыны медо вылэм но — та, пе, кунгож сёрись куноослы гинэ. Учко: адайос лыкто но кунзылэсь нимзэ вераса пиро.
Огез лыктэ, вазе: «Уругвай». Мукетыз: «Парагвай». Та воргоронъёс но вордскем гуртъёссэс верано кариськиллам. Огез лыктэ: «Марым, Карамбай». Мукетыз шуэ: «Марым, Лудорвай».
Пыриллям но сиськиллям.

°°°

Толон, Педор, пыжысь усьыса, тыметамы выйисько вал ини. Кӧня меда жомбылляськи?!
— Кин-о бон потыны юрттӥз, Лёгор?
— Ма, нокин но ӧз. Пыдъёсме ву пыдсы уллань лэзьяны аслам ик визьмы тырмиз. Вуэз гогыозям гинэ вылэм, ява!

°°°

Лёгорен Педор вадьсытӥ ик, туж улэтӥ, вертолёт лобӟиз. Педор Лёгорлэн пилеш йыр вылаз шабала пасьта кырыменыз шлач! Гинэ чабкиз.
— Мар-о тон дауртӥськод, лешой?! — шуэрскиз Лёгор.
— Ма, тӥни ук, йырдэ «ёродром!» кожам, лэся. Пуксьысал ке нош?

°°°

— Педӥ, учкисько ке, кытӥыныд ке но тон мынам пиелы кельшиськод кадь, — тунсыкъяське Лёгор.
— Шузи ик тон, Лёги. Пиед мыным кельше, луоз.

°°°

— Педӥ, тон но Параска доры ветлӥськод кадь, мон но пырасько куддыр. Кинъёс-о, иське, ась-меос ог-огмылы луиськом?
— Тордосъёс, дыр.

°°°

— Педор, вера ай пӧятэк. Мон кулысал ке, бӧрдысалыд-а тон корос вылам?
— Кызьы ӧй бӧрдысал, — кырыжгес учкыса вазе Педор.
— Пунэмам уксёдэ таки тырыны уд валаськы ук. Йыры курен ик бӧрдо.

°°°

— Ма, мар-о со пунэменыд ёрмид ини. Ме, ме тыныд копейка, — мыче уксёзэ Лёгор.
— Мар-о серем кариськод? Дас манет курид вал ук, — ӧз вала Педор.
— Кылемзэ азьмуртмылэсь кур, — валэктэ соиз. — Со воштӥз ук уксёлэсь дунзэ. Бадӟым тау солы. Пунэме копейка сяна ӧвӧл ни табере.

°°°

— Ойло ай, Педӥ, ум керетэ ни. Давай-ко луӵӵе одӥгзэ юом, — пыриськыны кутскиз Лёгор.
— Мон одӥген уг паньсаськы, — кунэрскиз Лёгор.
— Ӟенеликен шуко,— валэктэ соиз.
— А-а, давай, иське, мон соглаш.
— Мын ай, иське, лавкае ветлы. Тыныд пунэмен но сёто кадь ук.

°°°

А милям дыдыосмы телевизор учкыны ярато. Сураськыса верало:
— Туннэ луоз-а финн-угор катание? (Фигурное катание)

°°°

Удмуртъёсты, пе, ӟучъёс жуго «сь» куараез верамзы луымтэзы понна. Асьмеос сое «щ» кадьгес верало. Одӥг удмурт Семон дораз бертыса синучкон дорын, пе, мыскылляськыса дышестке ини «щ» интые «сь» вераны. «Щем, щем, щемь, семь» и т. д. Чуказеяз шумпотыса потэ ураме, адзэ оти ӟучъёс люкен лыкто. «Ну мон таослы ваозьмато ай!» ас понназ малпа. Ӟучъёс дораз вуыса, пе, юало ини:
— Ты удмурт?
— Нет.
— Скажи «семь»!
— Семь.
— Скажи «восемь»!
— Восемь.
— А как тебя зовут?
— Щемон.

°°°

Кызьы гинэ но уг гожто ӟуч кылысь ВСЁ РАВНО шуэмез:
Щоромно
Щьёромно
Щёровно
Щьяравно
Щьӧравно
Щиравно…
— Эшъёс!!! Удмурт алфавитын щ буква ӧвӧл. Азьланяз эн сураське ни, та кыл шонер гожтӥське тазьы:
Сёровно.

---

---

°°°

Воргорон уже куриське.
— Валаськоды-а, мыным та уж туж-туж кулэ. Мыным вить нылпие.
— Нош маке мукетсэ тӥ лэсьтыны быгатӥськоды-а?

°°°

Пияш:
— Тон тӧдьы «Лексусэн» принцез возьмаскод-а?
Нылаш:
— Уг, умой адями гинэ мед луоз. Мыным дунне, кыӵе буёло солэн «Лексусэз»

°°°

— Та морг-а?
— Бен.
— Нош мон Сергей. Мамае монэ утчаса жингыръяз ке, ивортэ: мон туннэ Маша дорын.

°°°

5 аресъем пияш анаезлы шуе:
— Мон жагдӥськисько — тон утялтӥськод, мон саптасько — тон миськиськод, кӧты сюма — ӝук пӧзьтӥськод.
— Эх, мама, мар тон монтэк карысалыд? Воксё азьтэм луысалыд, дыр.

°°°

Нылпиосты полиции экскурсии нулизы. Пырон дорын туспуктэмъёсын щит: «Таосты утча полиция» . Славик юа:
— Малы та агайёсты утчаськоды?
— Соос йыртэмасьёс.
— Фотое пуктыкуды, кырмыны уг лу вал шат.

°°°

Коли бускель Олиез пумиськыны ӧте:
— Коргид сиге туннэ лыктод-а?
— Мыным сюанозь уг яра.
— Нош ку тынад сюанэд?

°°°

Пыдлось гуртэ журналист вуиз. 100 арессэс тырмытэм пересьёслэсь юа:
— Вералэ, кызьы татын сомында ар улӥськоды? Кыӵе секретъёсты вань?
— Кыӵе секрет?! Сюрес ӧвӧл. Гуртын моргмы ӧвӧл, гу гудӥсь но ӧвӧл. Соин ик улӥськом.

°°°

Одӥг воргоронлэн 5 нылыз эшезлэн пиналыз ӧвӧл. Нылпитэм воргорон ушъяське.
— Ми толон посуда миськон машина басьтӥм.
Трос нылпиё атай пумитаз вазе:
— Нош мон ачим витьсэ лэсьтӥ…

°°°

Кулем бераз дышетӥсь янгышен адэ сюриз.
Кылчин со доры вуэ:
— Тӥледлы татын луыны кулэ ӧвӧл, райын интыды.
Нош соиз пумитаз шумпотыса вазе:
— Школа бере мыным ад но рай кадь потэ.

°°°

(Улонысьтым учыр)
Урокын пукись Паша ас малпанъёсаз выйиз.
Дышетӥсь выль кылэз валэктэ — пи кисы:
— Тани, шуом, кинлэн ке газетэз пияз понэмын.
Пияш кулектыса ӝӧк улысь утчаське:
— Кин пияз, кытын пияз?

°°°

(Улонысьтым учыр)
Дышетӥсь междометиез валэктэ.
Нылашлэн нокызьы но йыраз уг пыры.
— Тани кияд гононумырез паньгатӥд, мар вазёд?
Вӧзаз пукись пи кыллы кисыяз ӧз пыры:
— «Ням-ням» шуоз.

°°°

Кык кутъёс лобо.
Огез шуак дугдӥз но шуэ:
— Дугды ай, синмам ӟольгыри пыриз.

°°°

Кык шыръёс ресторанын пуко.
Огез шуэ:
— Чарка юом но кырӟалом.
Кыкетӥез бере:
— Табере эктыны потом.
Куинетӥез бушаз:
— Ойдо ульчае потом но коӵышез жугом.

°°°

Кык шыръёс слонэн пумиськизы:
— Ойдо нюръяськом.
Соиз кышкаса:
— Огнам кыкнадылы пумит-а?

°°°

Студент эшезлы:
— Театре ветлыны пыдвылъёстэ сётод-а?
— Басьты, валес вӧзам сыло.

°°°

Тордэм воргорон ӟус вылын пуке.
Вӧзтӥз кышномурт ортче.
Пиосмурт шӧдтэк шорысь:
— Ачид шузи.
Нылкышно паймыса:
— Мон номыр ӧй вера ук.
— Ӧд ке но вера, малпад.

°°°

Бускель кышно пичи пилэсь юа:
— Бадӟым будӥд ке, кин луод?
— Генерал.
— Тушмон виыны быгатоз ук.
— Соку тушмон луо.

°°°

— Кыӵе-мар зыгатон ужъёс?
— Библиотекаын кадь…
— Кызьы со озьы?
— Чус, шыпыт…

°°°

— Кыӵе чорыг кутыны ӧдъяськод?
— Кабачок кутэме потэ.
— Бон ӧвӧл ук сыӵе чорыг!!!
— Кызьы ӧвӧл?! Икраез ке вань, чорыгез уз луы ни, пе!

°°°

— Тӥляд Ондӥды уйин бакчаысьтымы картофкамез нош ик лушказ.
— Магазинысь-а, мар-а лушкалоз? Отын камераос!

°°°

Люся уг тоды вал кӧто луэмзэ но быземзэ. Но бускельёс уз эрекчалэ.

°°°

Кудӟем воргорон кенер кузя кутӥськыса мынэ. Адӟе: дэри вуын парсь погылляське.
— Ну, тон, парсь, кӧня нӧдын кыллиськод ни? - тышкаське парсез.
— Адӟом ай, ачид кыӵе луод, ӝоген кенер быроз ни.

°°°

Сютэм студентъёс общежитиын пуко но кенешо:
— Мон али сӥль сиысал! Собере эшшо сӥль, эшшо…
— Оло, асьмелы парсьпи басьтоно? Будӥз ке, сӥльмы тачак луоз…
— Малпанэд умой ӧвӧл кадь. Котырак кыед луоз, зын потоз.
— Эн сюлмаськы, парсьмы кӧня ке улоз но дышоз.

°°°

Кыӵе гинэ нылэз дорам уг вуттӥськы, анаелы огез но кенэз уг яра.
— Соку тон анаед кадьзэ вай.
— Озьы но эскери: сыӵеосыз атайлы уг кельшо.

°°°

Воргоронэз коросын шайвылэ нуо.
— Марлэсь-о со кулӥз?
— Ма, адӟиськод ук, венокъёсысь лентаос вылын гожтэмын: «Яратоно кышноезлэсь, варманаезлэсь, профкомлэсь».

°°°

— Толон, Педор, пыжысь усьыса, тыметамы выйисько вал ини. Кӧня меда жомбылляськи?!
— Кин-о бон потыны юрттӥз, Лёгор?
— Ма, нокин но ӧз. Пыдъёсме ву пыдсы уллань лэзьяны аслам ик визьмы тырмиз. Вуэз гогыозям гинэ вылэм, ява!

°°°

Егит анайлэсь бускель кышно юа:
— Кинлы укша пиед?
— Чылкак атаез кадь: весь изе, нош сайка ке, соку ик ӟенелик доры кизэ мыче.

°°°

Кышномурт картэзлэсь юа:
— Коля, кытын тон вал толон?
— Кин тыныд вераз ни? Нокинлы но эн оскы, ваньмыз со пӧяськон.

°°°

Одӥг кышномурт уж дураз лыз-вож синдуро лыктӥз. Эшъёсыз юало:
— Кин тонэ озьы чебермаз?
— Картэ.
— Ма, со командировкаын шуид ук. Ми али но отын на кожаськомы вал.
— Мон но озьы ик малпасько вал.

°°°

Воргорон дораз сютэм бертэ. Ӧсаз жингыртэ — сое тодмотэм пиосмурт усьтэ но кузёезлэсь юа:
— Кин тон?
— Карт.
— Мар кулэ?
— Сиеме потэ.
— Толло шыд сиёд-а?
— Сиё.
— Ярам, соку ӵуказе лыкты.

°°°

Кышноезлэн секталазэ мертамез бере картэз вазе:
— Кызьы ни мар? Мултэсэз вань-а?
— Ӧвӧл, только таблицая учконо ке, мынам мугоры ог 40 сантиметрлы ӝужытгес луыны кулэ.

°°°

Кышномурт картэзлы шуэ:
— Ойдо туннэ кытчы ке шутэтскыны ветлом. А то быдэс ӝытъёсын тон телевизор азьын, мон кышнопалан. Ог-огмес но ум адӟылӥське.
— Туж умой, — шумпотӥз картэз. — Мон усьтонэз ӧс дорысь выжлёгет улэ поно. Мынэсьтым вазьгес вуид ке, кытынзэ мед тодод.

°°°

Уин. Кышноен картэн кӧло.
Кышноез мал па: «Тодэ на меда картэ, ӵош улэммылы ӵуказе 15 ар тырме шуыса. Тодэ, луоз. Кузьым но дасяз, дыр, ини».
Воргорон но малпаське: «Сюан нуналамы ик мон сое кекатысал ке, ӵуказе пытсэт улысь потысал ини».

°°°

Кышномурт картэзлэсь юа:
— Тон выль секретарша кутэмед, лэся. Кӧня солы арес?
— Кызь.
— Нош кызьы ужа?
— Урод уг.
— Чебер-а?
— Номыр ӧвӧл.
— Нош кызьы дӥсяське?
— Туж шаплы.

°°°

Пӧйшураны яратӥсь воргорон ужысь бертон сяменыз эшез доры вераськыны пыриз. Соиз дораз ӧз кемды. Кузё кышно сое ӝӧк сьӧры ӧтиз.
— Пуксе, шутэтске, картэ ӝоген вуоз, дыр. Ӵапак со вакытэ телефон жингыртӥз. Кышномурт кылзӥз но, номыр вератэк, трубкаез интыяз понӥз. Куно юатэк ӧз чида:
— Кин озьы жингыртӥз?
— Ма, картэ. Тӥ дорын, пе, ӝегай. Шуэ: пӧйшураны мынон сярысь кенешиськом.

°°°

Егит нылкышно пичиесь гинэ пыдвылъёс керттэ но картэзлы шуэ:
— Мусое, тынад кылэмед потэ-а выж вылтӥмы пичи пыдъёслэсь бызьылэм куараоссэс?
— Эшшо мар? Шыръёсты мон котьку адӟемпотостэм карылӥ.

°°°

Кык егит нылкышноос пумиськиллям. Огез кияз нылпиен.
— Ма, кызьы тӥляд сюан азьын нуныды вордскиз?
— Ӧз тоды, дыр, ку милям сюанмы луоз.

°°°

Сюанзы бере кӧня ке арня ортчыса, выль кен картэзлы шуэ:
— Гажанэ, ӝоген асьмеос куинь кузя улыны кутскомы.
— Зэм-а? Тау ӟеч иворедлы.
— Зэм, анае гожтэт ыстӥз, асьме доры улыны, пе, лыкто.

°°°

— Вань-а меда картъёссэс ушъясь кышноос?
— Вань. Куке соос кыкетӥ картсылы нырысетӥез сярысь мадё.

°°°

Кык эшъёс пумиськизы, огез шуэ:
— Ар пала ни кышноеным уг вераськиськы.
— Малы?
— Вераськемзэ куспетӥ кареме уг поты.

°°°

— Онтон, малы кымысад собыдӟа лёг? Оло, дуринчи лексиз-а?
— Лексьыны ӧз вуы. Кышное куарнянь погыльтонэн шуккыса вииз.

°°°

Егит пи кыдёкысь гуртэ кышно кураны мынӥз. Огаз корка пырыса, кыӵе муген лыктэмзэ вераз.
— Ма, кызьы озьы тодымтэ муртлы нылмес сётом? Ми тонэ ум тодӥське ук, — ныллэн мумиз-бубиз мар шуыны ик паймизы.
— Уд ке оскиське, бускель гуртысь юалэ, отын вералозы.
— Нош отын тонэ тодо-а?
— Кызьы, пе, уз тодэ? Отын азьвыл кышное улэ ук.

°°°

Егит пияш тодмо нылашезлы вера:
— Тодӥськод-а, мусое, кыӵе уйвӧт адӟи мон… Тон мынам кышное луэмед кадь. Мар кароно, та уйвӧт улонэ чалякгес мед пыӵалоз шуыса.
— Ӧжытгес кӧлоно. А то иземе кылёд.

°°°

Кулыны курадӟись картэзлэн йыр азяз кышномурт пуке. Картэз шуэ:
— Маня, тодӥськод на-а, армие басьтонзы азьын тон монэн ӵош вал?
— Бен, мусое.
— Нош тодӥськод на-а, монэ ужысь уллямзы бере куинь ар ӵоже уж ӧй шедьты. Тон ялан монэн артэ вал.
— Озьы, озьы, гажанэ.
— Нош тодад ваиськод на-а, кудӟыса машина улэ шедемме но ку­инь толэзь эмъяськонниын кыллемме. Соку но тон монэн ӵош вал.
— Сотэк-а, зарние?
— Али но, мон кулон азьын, вӧзам пукиськод.
— Бен, бен.
— Маня, тодӥськод-а, кыӵе мал пан лыктӥз йырам?
— Кыӵ е-о?
— Тон, дыр, монэ таӵе шудтэм карид.

°°°

— Муспотонэ, мар шуод тон, сюанмес Выль аре ке лэсьтӥмы?
— Мар тон, мар тон?! Малы-о сокем шулдыр праздникез сброд?

°°°

Воргорон милицие пырем но сержантлы вазиське:
— Мыным дорамы толон пырам лушкаськисен пумиськоно вал.
— Марлы? — паймем сержант. — Судысен пумиськоды.
— Э-э, мон отчыозь уг чида. Тодэме потэ, кызьы меда со кышноме сайкатытэк коркаямы пырем? Мон кызь вить ар ӵоже огпол но озьы ӧй пӧрмыты на.

°°°

Кышномурт эшезлы шуэ:
— Ой, кыӵе тынад карт луонэд некультурной! Соин вераськытозяд, со ог дас пол вушйиз.
— Со ӧз вушйылы. Кыл куспамы маке вераны турттыса, ымзэ усьтыны выриз.

°°°

— Тон кылӥд-а, Галя, пе, рентгенологлы бызем?!
— Паймоно кадь. Нокин но Галялэсь номыр умойзэ уг адӟылы вал.
Рентген аппарат пыр маке ӟечсэ шедьтэм шат?

°°°

— Эн ик ёрты монэ Петырлы бызьыны. Со мӧйы ни, чебер но ӧвӧл, акылес. Солэн одӥг гинэ умоез вань — коньдонэз трос.
— Э-э, одӥг гинэ умоез ӧвӧл, кык: коньдонэз сяна, солэн путыны дась сюлэмыз вань на.

°°°

— Карт луонэд тодэ ни-a тынэсьтыд арлыддэ?
— Ӝынызэ тодэ…

°°°

— Мон кылӥ вал, тынад карт луонэд учёной шуыса.
— Бен, тодосчи, кык толэзь талэсь азьло со мыным Эйнштейнлэсь «Теория относительности» книгазэ кузьмаз.
— Лыдӟид-а ини?
— Ӧй. Витё, ку со книгая кино пуктозы.

°°°

— Лидапай вера, тӥ ӵыжы-выжыос луиськоды шуыса.
— О-о, со чылкак визьтэм но…
— Ма, со но возьматэ ини ӵыжы-выжы луэмдэс.

°°°

— Мон картэным керетыны кутскисько ке, нылпиосме соку ик ульчае шудыны ыстӥсько.
— Ой, кыӵе чебересь нылпиосыд. Соку ик адӟиське, соос туж ӵем чылкыт омырын шудо шуыса.

°°°

— Нылок, вузалэ мыным витрина вылысь ӵужондэс.
— Пожалуйста, тӥледлы сое бумагаен бинялтоно-а, яке али ик со вылын лобӟоды-а?

°°°

— Та лотерей билетэ шудо ке, утэм уксёеным туж чебер дэрем басьто.
— Нош оз ке удалты, билетэд шудтэм ке?
— Соку картме дэрем басьтыто.

°°°

— Ми картэным улон шоры котькуд ласянь одӥг кадь учкиськом.
— Озьы луэ шат? Шуо ук: котькуд адямилэн аслыз гинэ тупась малпанэз.
— Вить ар ӵоже ӵош улӥмы но, картэлэн вань малпанъёсыз мынамен тупало ни.

°°°

— Ой, кыӵе умой, выль патер басьтӥм. Огез гинэ урод: картэным вань вераськеммес борддор пыр бускельёс кыло.
— Нош тон борддорад зӧк ковёр ош.
— Бен соку бускельёслэсь супыльтэмзэс кызьы кылом на?

°°°

— Малы тӥ картэныды люкиськиды?
— Ой, солэн сямыз лэсянтэм урод вал. Маке пӧрасько ке, ваньзэ асме сиыны косылӥз.

°°°

Воргорон киноысь бертӥз но кышноезлэсь юа: — Тон выжез миськид-а?
— Миськи.
— Нош тусьты-пуньыез?
— Соосыз но…
— Лавкае ветлӥд-а?
— Бен.
— Картошка но палад-а?
— Палай, сиён гинэ ӧй дася.
— Эх, тон, азьтэм…

°°°

Кык пиосмуртъёс верасько:
— Толон мон пӧран сярысь книга басьтӥ ай, кышное отпускын анаез дорын дыръя ачим сиён дасяны ӧдъясько вал.
— Мар бен ни?
— Номыр ӧз пишмы. Котькуд рецепт кутске: «Кияды чылкыт каст­рюля кутэ…»

°°°

Аръёс ортчыса, Ориналэн ымныраз кисыриос кылдӥзы. Арлыдзэ ватон понна, лэся, со йырсизэ вакчи вандытӥз, тӧдьыпыръем буятӥз но ӵукналы быдэ выль причёска лэсьтылӥз. Кышноезлэн егит ныл музэн кильтыръяськемез но уно коньдон быдтэмез Ладьмерлы ӧз кельшы:
— Малы йырсидэ, мынэсьтым юатэк, вакчи кельтӥд?
Орина кыллы кисыяз ӧз пыры:
— Нош тон ачид малы ай, мынэсьтым юатэк, воксё пилеш кылид?

°°°

Бер уин гинэ дораз бертэм Ладьмер аслаз Оринаез азьын вуысь кӧсын потыны выре:
— Лазыр дорын ӝегаськиз. Курегез улэ кызь пуз понэм но, дас витез атас ӵогиськем. Сыӵе бадӟым кайгузэ миським.
— Эн алдаськы. Лазыр али гинэ татысь кошкиз. Пунэмен сётэм дас манетэз дуре ветлӥз но, таки ӧд вуы. Сыӵе пӧяськись сямыныд тынэсьтыд артист гинэ пӧрмоз!
Орина мыскыл карыса ке но вераз, Ладьмер малпаськонэ усиз: оло, зэм но, та вуӵ кетӥсь кышнозэ куштыса, артистэ мыноно, егит нылэн кузпалъяськоно?
Ӵуказеяз театре мынӥз но, режиссёр солэсь юаз:
— Кин луыса ужамды потэ бен?
— Кызьы шуоно ай? Артист верано кылзэ вунэтэ ке, кин ай солы тодаз вайытэ?
— Суфлёр.
— Бен, бен. Суфлёр луэме потэ.
— Быгатоды-а бен?
— Кызьы бен уг?! Школаын дышетскыкумы но классамы мынэсьтым шӧртчиез суфлёр ӧй вал. Кӧня мурт мынам сипыртэмея «кыкъёс» октӥз меда?!

°°°

— Малы-о удмурт кышноос ӝужыт каблуко туфлиен уг ветло?
— Ма, соослэн паллян киязы — нылзы, дэрем сӧзулазы — пизы, бур киязы — сумка, сильсьӧразы — кудӟем Сёмка.

°°°

Ондрей кышноезлэсь юа:
— Марпа, вордскем нуналэд вуэ кадь но, кыӵе ке кузьым басьтоно вал.
— Кузьымтэк но яралоз ни, Ондӥ. Кузьым басьтон понна сётыны чик но коньдонэ ӧвӧл ай.

°°°

Кышноез куаретэмысь, Ладьмер ӝӧк улэ пегӟиз. Ӵап соку доразы Лазыр пыриз:
— Мар отын пукиськод, Лади?
— Коркан ачим кузё, кытын пукеме потэ, отын ик пукисько.

°°°

Кышнозэ картэз куаретэ:
— Тон сокема ӧд дасяськысалыд ке, асьмеос поездэ ӧй беромысалмы!
Кышноез но уг сётскы:
— Нош тон сыӵе ӧд дыртысалыд ке, вуонозэ поездэз такема возьмано ӧм луысалмы.

°°°

Одӥг ӵукна Ладьмерлэн кышноез картэзлы шуэ:
— Ойдо, Лади, туннэысен тазьы кенешом… Тон сур юонэддэсь куштйськод, нош мон тамак кыскондэ но куштыто.

°°°

Ӵукна тӥледын кышноды уг вераськы ке, озьыен, тӥледды толон ӝыт туж усто вал.

°°°

Кык эшъёс пумисько:
— Малы тон ӧд кышнояськы со нылмуртэн?
— Ма, чупаськыкум тамак зынзэ шӧдӥ.
— Со уг кыскы вал ук!
— Озьыен, тамак кыскисен мынэсьтым азьлогес чупаськиз.

°°°

Кык егитъёс ӝыт скамья вылын пуко.
— Мани, тон адӟиськод-а тӥни со кизилиез?
— Адӟисько, Васи.
— Со — мон. Нош созэ адӟиськод-а?
— Бен.
— Со — тон. Нош адӟиськод-а тӥни — кизили вылын кизили?
— Бен, бен, бен.
— Со мон — мопед вылын.

°°°

Кык нылмуртъёс верасько:
— Кызьы ортчиз тӥляд толон ӝыт пумиськонды?
— Мон Василэн пельдораз вить пол васькытъяй.
— Малы? Тэбиниз-а, мар-а?
— Ӧз. Валесын умме усьылэ но…

°°°

Егит кузпалыз кышноезлэсь юа:
— Нинок, мон сяна но тодмоосыд вал, дыр. Кышноез уг вазьылы. «Йыркуръяське», — понназ малпаз картэз.
Час ортчыса, нош ик юано кариськиз:
— Оло, весь йыркуръяськиськод на?
— Уг, лыдъясько ай.

°°°

Милиционер ӝужыт корка вӧзы люкаськем калык доры матэктэ но адӟе: ньылетӥ этажысь укно дурын мырдэм возиське на пересь кышномурт, нош бырдам ымныро воргорон сое уллане донгыны выре. Мили­ционер кеськиз:
— Эй, мар кариськод тон? Дугды! Малы песянаез донгиськод?
— Песянай ӧвӧл со — варманае!
— A-а! Варманаед? Ишь, кырмиськем! Тон чиньыосыз вылэ пыдыныд, пыдыныд лёгиськы.

°°°

Воргорон — кышноезлы:
— Кыӵе умой, дыр, автофургонын улӥсь семьяослы.
— Малы?
— Ма, ачид чакла ай: бертэ, шуом, варманай дораз — нош дорез интыяз ӧвӧл ни.

°°°

Ӵукна. Ӧсэ жингыртӥсь вань. Жӧломем воргорон ӧссэ усьтэ но — отын вармумиз. Вокзалысь али гинэ вуэм, кык бадӟым чемоданъёсын. Воргорон кышноезлы кеське:
— Зина, султы, варманайлэсь чемоданъёссэ шаплыгес пырты ай. Сотэк но кема сылэ ни, дыр, ос дорын, а то поездаз беромоз.

°°°

Вуоно варматай вуоно эмеспиезлы вазиське:
— Юиськод-а?
— Ымам но уг тыриськы.
— Кыскиськод?
— Тамаклэсь зынзэ чидаме но уг луы.
— Картаен шудӥськод?
— Киям кутылэме но ӧвӧл.
— Озьыен, нокыӵе тырмымтэосыд ӧвӧл?
— Одӥг гинэ вань. Пӧяськыны яратӥсько.

°°°

Кудӟем воргорон эшеныз ӵош дораз пыриз. Атасъяськыса ӧс куспысен ик кеське:
— Кин татын кузё?
Кышнопалась кияз турчикоен но погыльтонэн кузпалыз потӥз. Воргорон, пал кыл но поттытэк, ӝӧк улэ пыриз но отысен кесяське:
— Я, я, табере шудыны-серекъяны но уг яра ни-а?

°°°

Ӵукна кышноез картэзлы вазе:
— Васи, мар-о тон туннэ ум йылтӥд монэ Наденька шуид?
— A-а… марым… уд но оскы ведь… марым… уин вӧтай, мон — Ленин шуыса.

°°°

Кык воргоронъёс пумиськизы.
— Кышное куаретэмысь, мон аракы юэмысь но, тамак кыскемысь но, картаен шудэмысь но куштӥськи.
— Ӟечкыласько! Табере кышноед шудо, дыр, ини.
— Кытын, пе. Номыр понна монэ куаретыны шуыса, керетон ӝутэ.

°°°

Воргорон керетэмзы бере кышнозэ куаретэ:
— Тон ялан монэ яратӥсько, жалясько шуиськод, нош зэмзэ но жалясалыд ке, мукет муртлы бызьысалыд.

°°°

— Тодӥськод-а, мон кышноеным эчеши но, туж усто луиз. Доре дыраз уг бертӥськы ке — солы сю манет тырисько.
— Нош туж бер ке вуиськод, яке, шуом, ӵукна? Куаретэ, дыр, ук!
— Уг. Шумпотыса валес вылысьтыз султэ но кесяське: «Келяд, келяд! Вай сю манеттэ!»

°°°

Кема адскытэк улэмзы бере кык эшъёс пумиськизы. Одӥгез шуэ:
— Тон али но кышнояськымтэед на, пе. Куке-соку кузпалъяськыны малпаськод ик-а?
— Ӧй ке малпаськысал, кемаласьтон сямен ик кышноен улысал ни…

°°°

Возьдаськись пияш егит нылашен вераськон мытыны нокызьы но уг дӥсьты. Кӧня ке посӥськемез бере со шуэ:
— Кыӵе ни мар анаед улэ ай?
— Умой.
— Нош атаед?
— Усто.
— Выныд?
— Огшоры.
— Сузэред?
— Умой.
Отӥяз мар юаны абдраменыз, пияш чалме. Соку нылаш вазе:
— Мынам песяе но песятае вань на.

°°°

Ӵукна куинь часын пичи ныл сайказ но анайзэ выжыкыл мадьыны косэ.
— Дугды ай, нылы, кӧня ке чида. Ӝоген атаед вуоз но кыкнамылы ик выжыкыл вераны кутскоз.

°°°

Уждун басьтэмез бере воргорон егит нылъёсын шулдыръяськиз но ӵукна дораз чик уксётэк бертӥз.
— Кытын тон вал? Малы ӵукна вуиськод? Кытын коньдонэд?
— Ой, сыӵе учыре шедиськиз! Уждун басьтэмме тодыса, лэся, кыӵе ке ширмачъёс машинаязы пуктӥзы но куштӥськем коркае нуизы. Отын думылыса возизы, уксёме курыса. Уг сётиськы вал, кисыосме ик берыкъяса талазы. Тани!
— Ух, со ширмачъёсыз! Соос эшшо ке, серем карыса, тон вылэ кышномурт гамаш дӥсяллям на.

°°°

Ӝыт шулдыръяськонын егит кышномуртӵош эктӥсь воргоронлы шуэ:
— Ой, кыӵе мыным али мӧзмыт: картэ быдэс толэзьлы Японие командировкае кошкиз. Сыӵе бадӟым патерам огнам мӧзмыса кулӥсько ни.
— Ма, со туж умой ук! Тӥ пумит уд луэ-а мынам одӥг куронэлы?
— Кыӵе бен куронды?
— Солэн ыстэм конвертъёсысьтыз маркаоссэ мыным вае. Мон маркаос люкасько!
— О-ох!

°°°

Баӵко оскисьёслэсь юа:
— Малы Инмар нырысь пиосмуртэз кылдытӥз, собере гинэ — кышномуртэз?
— Пиосмуртэз кылдытыкуз, кышномурт солы кенешъёсын медаз акыльты шуыса.

°°°

Кык воргоронъёс верасько:
— Марлы тон аслэсьтыд кык пол мӧйыгес песянаез кышно басьтӥд?
— Ма, марым, мон туж возьдаськись ук. Солэсь нылзэ кышнолы курасько вал, нош со ӧз вала — ачиз бызьыны соглаш луиз. Мон пумит луыны ӧй дӥсьты.

°°°

Одӥг кышномурт воргоронэз ульча шорын ик куаретэ:
— Марлы тон мынэсьтым Олёшме толон сыӵе сектад? Доре шляпатэк но, кататэк но бертӥз ук.
— Ма, мон сое трос ӧй секта. Дорам сю грамм сяна ӧй вал, сое гинэ юим.
— Осто, со кыӵе ке сю граммед понна Олёшме сыӵе кыдёке, город пуме нуллӥд-а? Умой-умой сектаны но уксёед жаль потӥз-а, мар-а?

°°°

— Гажанэ, малы тон монэ яратӥд?— егит пилэсь юа нылаш.
Соиз йырберзэ кормаса сылӥз но шуэ:
— Ма, асьмеос бускельёс ук. Гурт пумысь Кати доры ветлытозь, кӧня ката пӧськытод. Нош тонэн пумиськыны мыныса уд но жадьы.

°°°

Кык пиосмуртьёс пумиськизы.
— Маке син улыд лызэктэмын кадь.
— Уд но оскы, ява. Толон ӝыт бускель нылашез вуысь поттӥсько вал. Кышное кытӥ-мартӥ вуиз но шорам киоссэ урдӥз.
— Выись адямиез утем понна-а?
— Ӧвӧл, ваннаысь поттэм понна.

°°°

— Ӧй, кыӵе шузи мон вылӥськем, тыныд бызьыкум.
— Озьы уго. Мон но соку яратонэн кудӟемын вал, тынэсьтыд шузи луэмдэ ӧй шӧды.

°°°

— Тодӥськод-а, мынам кышное толон вань уксёме басьтэм но кыӵе ке воргоронэн пегӟем.
— Эх, удалтэм ке удалтэм тыныд. Нош мынамез толон быдэс уждунме утялтӥз. Озьы ке но, ачиз доре кылиз.

°°°

Кышномурт нуналлы быдэ картэзлэсь пиджаксэ эскерылӥз. Кузь йырсиез шедьтэ ке — вожаса куаретэ ни, лычсузьымоназ. Одӥг пол со нокыӵе йырси ӧз шедьты.
— Осто, кыӵе калэ вуэм ини. Табере пилеш туган кутӥд-а, мар-а?

°°°

Ресторанын официант шуэ кышномуртлы:
— Эй, кенак, картэд кудӟем ини, тӥни ӝӧк улэ пыриз.
— Со мынам картэ ӧвӧл, картэ тӥни, али гинэ ӧсэтӥ пыре ай.

°°°

Кышномурт картэзлы шуэ:
— Учкы ай, таиз курегмы жум, мӧзмыт тусо. Оло, сое ӵогоно?
— Ма, ӵог… Только, малпасько, солы озьы но шулдыргес уз луы.

°°°

Кышноен картэн кезьыт сӥзьыл куазен ульча кузя мыно. Кышномурт дуно куо шубаосын магазин азе дугдӥз но пияла пыр учке, учке.
Дыр ортчыса, со кынмеменыз пипу куар кадь куалекъя ни вал. Картэз ӧз чида:
— Гажанэ, тыныд кезьыт, лэся. Мыно ай, пӧсь пирожкиос коть басьто.

°°°

Кык пенсионеръёс верасько:
— Тодӥськод на-а, Иван, армиын дыръямы, нылъёс сярысь медам малпалэ шуыса, асьмелы таблеткаос сётыло вал.
— Бен, вожесь вал соос.
— Вот али мон со таблеткаослэсь кужымзэс шӧдыны кутски ини.

°°°

Егит пиен нылаш пумиськиллям.
— Одӥгзэ гинэ курисько, меӵ ак верад ке, мынэсьтым шудоез уз луы.
— Мае верано?
— Бызьысалыд-а мыным?
— Ӧй…
— Табере мынэсьтым шудоез ӧвӧл ни!

°°°

— Воксё уг тодӥськы, таяз кӧснуналэ сюанэ мыноно ик-а, ӧвӧл-а?
— Кинлэн-о сюанэз?
— Да мынам…

°°°

— Кышное монэ уг вала. Нош тынад?
— Уг тодӥськы.
— Кызьы?
— Тон сярысь ми соин огпол но ӧм кенешылэ на.

°°°

— Кык пол кышнояськон мар ласянь урод меда?
— Сое но уд валаськы шат? Вармумыосыд кык кузя луозы ук!

°°°

— Кема-а кунояны малпаськоды ми дорын, варманай?
— Акыльтытозям.
— Мар сыӵе ӧжыт?
— Хм-хм.

°°°

— Мусое, тон уд быгаты-а выжез ӵужыны?— картэзлы вазиське кышноез.
— Ой, мыным, гыдыке, али сокем секыт, тани киосы ик куалекъяло.
— Туж ӟеч. Иське, тыныд ковёрез курткыны умойгес луоз.

°°°

Лазыр бер ӝыт гинэ гуртаз вуиз. Кымесысьтыз горд виштыез адӟ ыса, кышноез пурӟиз.
— Ымдур буян? Али ик вера — кинэн мусояськид?
— Помада ӧвӧл со, вир. Машинаен аварие шедьыку, укно борды кымесыным мырӟиськи.
— Ярам, соку шудэд вылэм на. А то…

°°°

Одӥг кышномурт телефон будкаысен кинэ ке куаретэ. Солэсь вераськемзэ кылзыса, телефон тупатъясь акыльтӥз но ӧсэз усьтоно кариськиз:
— Та телефон уг ужа.
— Малы вазен ик ӧд вера? — пуштӥз кышномурт.— А то картме тышкаськыса, ньылоны куасьмиз ни.

°°°

Кышноез картэзлэсь юа:
— Гажанэ, тон уд тодйськы-а, кытын асьмелэн сю аресозь улыны валэктйсь книгамы?
— Мон сое сутӥ.
— Малы?
— Вармуми лыдӟыны турттэ вал.

°°°

Мынэ пиосмурт, кыкна кияз ӟенеликъёс. Эшез юа:
— Сдатьтыны-а нуиськод?
— Уг, кышноеным даллаши но со шуиз: «Котырдэ басьты но дорысьтым кошкы».

°°°

Кык нылкышноос пумисько, огез шуэ:
— Уг валаськы, кызьы тон со пересь лӥяллы бызьыны соглаш луид?
— Э-э, мусое, тон уксё басьтӥськод ке, уд юаськы ук, кыӵе арын со печатламын.

°°°

Кышномурт лавкаысь бертэ но ӝӧк вылэ нянь погыльтон понэ.
— Тани, басьтӥ.
Картэз вожомиз:
— Визьтэммид-а, мар-а? Дорын шапык но юонмы ӧвӧл, нош тон ме­бель басьяськод.

°°°

Картэзлы кышноез шуэ:
— Ялан ӝожтӥськиськод, тынэсьтыд ӵыжы-выжыостэ уг гажаськы шуыса. Уд тодӥськы шат: мон котькинлэсь зол яратӥсько тынэсьтыд варманайдэ но тынэсьтыд варматайдэ.

°°°

Эмтодос туж кыдёке азьлань вамыштӥз. Сизьымдон вить аресъем пересь кышноез но тани нылпи вордытыны быгатӥллям. Роддомысь бертэмез бере ӟечкыланы калык лыктэм. Нылзэ возьматыны, пе, куро. Нош соиз шуэ:
— Бӧрысьгес. Али изе ай. Сайказ ке, адӟыто. Куноос трос пол куриллям возьматыны, кошкон дырзы но вуэм.
— Я, возьматы ни пиналдэ. Учкытэк ум кошке.
— Сайказ ке, возьмато.
— Я, ми ум ӵашетэ, соид уз сайка. Возьматы ини.
— Сайказ ке, возьмато. Кытчы интыямме вунэтӥ. Бӧрдыны кутскиз ке, шедьто.

°°°

Одӥг егит воргорон ӝожъяське:
— Бен, мыным яратонэн ӧз удалты… Ултозям огпол гинэ синмаськи но, со нылаш бызиз.
— Мукетызлы?
— Мукетызлы ке луысал. Мыным.

°°°

Нылкышно одӥг газетэ ялон сётэм: тодматско вина юисьтэм, тамак кыскисьтэм егит пиосмуртэн.
Ӵуказеяз ӧсаз жингыртӥсь луиз. Усьтэ но — ӧс дорын сылэ погмаськем дӥськуто-йырсиё, пыд йылаз мырдэм возиськись воргорон.
— Татын-а улэ ялон сётӥсь нылаш?
— Бен, но…
— Тӥледлы-а кулэ пиосмурт?
— Мыным, но…
— Вот и мон лыктӥ.
— Но мыным… Вина юисьтэм, тамак кыскисьтэм егит воргорон кулэ.
— Соин ик мон лыктӥ вераны, тон кузпал утчаськод ке, мон сярысь эн но малпа.

°°°

Егитъёслэн нырысетӥ пумиськонзы. Востэм пиосмурт возьдаськыса ныллэсь юа:
— Нош, марым, мынэсьтым азьло тӥляд пиосты вал-а ни?
— Ӧй, ӧй вал. Мынам кык нылъёсы гинэ вань, но соос песянайзы дорын уло.

°°°

Кык нылмуртъёс верасько:
— Куинь тодмо воргоронъёсы вань — кудзылы бызьыны ик уг валаськы. Нырысетӥез — туж узыр, кыкетӥез — туж визьмо, куинетӥез туж умой эктэ. Кыӵе кенеш сётод?
— Нырысетӥзэ усто эктыны дышеты но — солы ик бызь.

°°°

Кык картъёс верасько:
— Мынам кышное шуэ, ваньзэ, пе, ыльын сиыны кулэ.
— Мынамез но пӧраськыны уг яраты.

°°°

Мыным ноку но кышноос ласянь уг удалты. Нырысетӥез монэ улляз, кыкетӥез ачиз кошкиз, нош куинетӥез улэ но улэ, улэ но улэ…

°°°

Кышноез картэзлэсь юа:
— Зэмзэ но-a вань пӧйшуръёс пӧлын луд кечъёс тужгес но шузиосыз?
— Зэм, зэм, кечпие…

°°°

Картэз кышноезлэсь юа:
— Мусое, кыӵе меда кузьым шумпоттысал тонэ Кышномуртъёслэн нуналазы?
— Ой, гажанэ, мыным маке но кулэ вал та векчиесь чиньыосылы, кузь-вольыт чыртыелы, чебер пельёсылы…
— Валай! Куинь пӧртэм майтал басьто!

°°°

— Ева, Адамен сяна, кинэн ке кушласькылӥз на меда?
— Меӵ ак тодмо ӧвӧл, но тодосчиос шуо, адями, пе, обезьянлэсь потэмын.

°°°

— Тон ум йылтӥд вераськиськод-а?
— Уг. Нош тон?
— Сотэк нокызьы но уг луы.
— Малы?
— Нуназезэ кышно кыл вераны маза уг сёты. Ум йылтӥд но ӧд вераськы ке, кылдэ вунэтод.

°°°

Пересь кышномурт йырсизэ егитъёс музэн ӵышкем но картэзлэсь юа:
— Ну, табере мон песянайлы уг кельшиськы ни, дыр, о-о?
— Бен, табере тон песятайлы укшаськод.

°°°

Одӥг воргорон уйшор бере кык часын дораз вуэм. Кышноез сое куаретэ:
— Кӧня пол верано тыныд: кык сюмыклэсь трос юоно ӧвӧл, 22 часлэсь бер бертоно ӧвӧл.
— Тьфу, та йырын! Котьку лыдпусъёсты сура!

°°°

Воргорон бер ӝыт дораз бертэ.
— Кытын вал? — пумита сое кышноез.
— Эшъёсыным шахматэн шудӥмы.
— Нош малы котырысьтыд духи зын потэ?
— Ма, шахмат зын потыны кулэ шат?

°°°

Воргоронлэн кышноез висьыны усем, сое эмъяськонние нуиллям. Ӵукна воргорон пизэ сайкатэ, кызьы быгатэ, озьы сюдэ, дӥся но садике нуэ. Нош воспитательница пизэ уг куты, со, пе, милям ӧвӧл.
Воргорон паймемын, мукет группае пыризы — татын но пизэ угтодмало. Бускель садикын но кутыны пумит луизы. Автобусэ пуксьыса, му­ кет нылпи садэ кошкизы. Сояз но таӵе ик учыр. Мар кароно? Тубат вылэ пуксиз воргорон но малпаське. Соку пиез ӧз чида ни:
— Я, атай, эшшо одйг садике пыраломы на но — тырмоз. А то мон школаям беромо.

°°°

Анаез нылзэ куаретэ. Нылаш синкылиос пыр шуэ:
— Эн куареты монэ, нэнэ! Мон туж умой нылпи!
— Малы озьы малпаськод?
— Одӥг утялскись но асьме дорын толэзьлэсь кема уг чида, нош мон тӥледын куать ар ӵош улӥсько ини.

°°°

Картэз кышноезлы шуэ:
— Юнме куаретӥськод, олокыӵе арбериослы токма коньдон куясько шуыса. Мон зэмзэ но ялан шыръяны вырисько.
— О-о ини, нош огнетушитель! Куать ар талэсь азьло басьтӥд, нош соид татчыозь огпол но кулэ ӧз луы на!

°°°

Кык эшъёс кышнооссы сярысь верасько.
— О-о, кышное мон сярысь юн сюлмаське. Доре бертӥсько гинэ — пальтоме кыле, тапочки но перчатка сётэ.
— Кыӵе перчатка, малы?
— Резина перчатка — тусьты-пуньы миськыны.

°°°

— Тодӥськод-а, Митрей, кӧня пол мон кышноеныд пумиськылйсько, сомында пол ик шумпотӥсько.
— Малы?
— Ярам али, со мынам кышное ӧвӧл шуыса.

°°°

Пичи нылаш анаезлы вазиське:
— Анай, вытрезвитель ӝуам!
— Кытысь тодӥд?
— Атай кырӟаса бертэ: «Враги сожгли родную хату!..»

°°°

Жингыртэ телефон. — Васи, мусое, асьмелэн пимы вордскиз.
— О-о, кыӵе мон шумпотӥсько! Нош кин та вераське?

°°°

Одӥг воргорон кулон азяз кышнозэ ӧтем но шуэ, пе:
— Гыдыке, эн вунэты, Шунянь Петоклэн асьмелы сю манет берыктонэз вань.
Кышноез вазе:
— Остэ, шу, ма, кызьы сое вунэтод!
Картэз нош ик мырдэм вера на:
— Собере Оздя Кузьмалы вить сю манет тыронмы вань. Сое но сётыны эн вунэт…
Кышноез лулӟе:
— Остэ, нош уйбыртыны кутскиз ни.

°°°

Воргорон лавкае пырем но шуэ:
— Мерталэ вал мыным одӥг кило зынмем сӥльдэс.
— Кызьы? Малы?
— Кышное ноку но лавкае медаз ни ыстылы шуыса.

°°°

Кышноен картэн ас машинаенызы куное потӥзы. Кышноез шӧдтэк шорысь кӧдэктӥз.
— Ой, Васи, дугды, ойдо доре бертомы — мои утюгез кысыны вунэтӥськем.
— Собере мар?
— Ма, тылпу ӝутскоз!
— Эн кышка, номыр уз луы. Мон кухняысь кранэз дугдытыны вунэтӥ.

°°°

Вокзалысен кык эшъёс пумисько.
— Лади, мар луиз тонэн? Ымнырыд воксё бӧрдоно кадь.
— Кышное быдэс толэзьлы анай-атаез доры кошке.
— Ма, сокем куректӥськод шат?
— Уг, но пальпотӥсь ымнырме адӟиз ке, со уз кошкы ни.

°°°

Кышномурт уг быгаты ни эмеспиеныз данъяськонзэ ватыны.
— Нылы сокем ик дышетскемын ӧвӧл ке но, со понна эмеспие — кык институтэз быдтэмын. Визьмо! Котьмае тодэ! Котьмае пыртӥз адӟе!
— Ӧйтӧд-ӧйтӧд! Пыртӥз адӟысалыз ке, кызьы со Нюрадэ кышно басьтысал меда?

°°°

Одӥг семья куноосты вите. Шӧдтэк шорысь картэз дуно книгаоссэс ватыны кутскиз. Кышноез паймыса юа:
— Map-о, лушкалозы кожаськод-а, мар-а?
— Уз, асьсэлэсь книгаоссэс тодмалозы.

°°°

Кышномурт картэзлэн кисыысьтыз кагаз юдэсэз шедьтэм. Отын гожтэмын: «Катя».
— Эн куареты, — алэ картэз, — тодӥськод на ук: кылем арняе ипподромын валъёслэн ӵошатсконазы коньдон утӥ вал. Мон соку вань уксёме пуктылӥ «Катя» нимо вал вылэ. Со ик нырысетӥ вуиз.
Ӵуказеяз воргорон ужысь бертэ но, кышноез шуэ:
— Гажанэ, тыныд али гинэ Катя валэд жингыртӥз…

°°°

Редактор корреспонденты шуэ:
— Тодӥськод на-а, гурезьёсын йыромыса, ньыльдон нунал ӵоже но­ мыр сиытэк улэм нылмурт сярысь гожтэмдэ. Вот со пумысен туж трос гожтэтъёс вуо.
— Зэм но-a?
— О-о. Туж уно воргоронъёс сое кышно басьтыны туртто.

°°°

Картэз кышноезлы шуэ:
— Гажанэ, тон театре вуж дэременыд уд мын, дыр.
— Ой, мусое, кызьы тодад ваид выль дэрем сярысь?
— Соин ик мон театре одӥг билет гинэ басьтӥ.

°°°

Одӥг нылмуртэз кураны лыктӥллям. Нош со чутрак пумит. Кӧня лыктӥллям, кӧня буйгатӥллям — толкез ӧвӧл.
— Ну, малы тон соглаш уд луиськы? Туж умой пияш ук.
— Мыным туно-пеллё шуиз: нырысетӥез картэд юись, кыкетӥез азьтэм луоз. Мон, марым, куинетӥезлы гинэ бызё.

°°°

Одӥг гуртын туж азьтэмесь кышноен картьёс улӥллям. Кышноез, пе, гур вылын кӧлэ, картэз — ӧс дорысь ӟус вылын. Ӵукна кышномурт воргоронлы вазе:
— Эскеры ай, куазь уг зоры-а?
Воргоронлэн султэмез уг поты. Вӧзысьтыз бодыез кутыса, ӧсэз усьтэ но кеське:
— Шарик! Шарик!
Пуны пырем бере со кышноезлы вера:
— Уг зоры. Пунымылэн гонэз кос!

°°°

Пуке воргорон шайвылын, синкылиосыз вияло.
— Кин понна сыӵе куректӥськод, агай?
— Татын кылле… мынам кышноелэн, марым… нырысетӥ картэз. Ох, малы со укыр вазь кулэм?!

°°°

Воргорон кышноезлы ӵукна шуэ:
— Эх, кыӵе усто вӧтай вал, нош мар сярысь — чик но тодам уг лыкты ни.
— Со понна мон тодӥсько. Ум йылтӥд весь кесяськид: «Ойдо, эшшо быдэн одӥг сюмык юом на».

°°°

Ӵукна кык бускель кышноос пумиськизы.
— Ма, Марпа, кызьы тон кӧлӥд? Быдэс уй гудыръяса зориз ук! — Ярам коть, картэ сокем зол соргетэ, мон номыре ик ӧй кылы.

°°°

Тунаськись доры воргорон лыктӥз. Кырымпыдэсэз кема учкемез бере кышномурт шуиз:
— Адӟисько: тӥляд кык нылпиосты.
— Зэм ӧвӧл, мы нам соос вить кузя будо.
— Э-э, тӥ асьтэос гинэ озьы малпаськоды.

°°°

— Улон-вылон ласянь, — кышноез картэзлы шуэ,— асьмеос ноку но бускельёсмес ум сутэлэ. Соос доры куинь пол ни лушкаськисьёс пыразы, нош асьме доры ке чылкак ӧз на.

°°°

Кузё кышно:
— О-о, Иван Петрович но дорамы лыктэм. Нош кышноды кытын?
— Э-э, валаськоды-а, ми соин пус чӧлтӥм, кин тӥ доры куное вырӟоз. — Озьы ке, тӥ вормиды? — Ӧвӧл, келяй.

°°°

Корка пыронэз пусъё. Шуак телефон жингыртэ. Кузё кышно трубкаез ӝутэ, кылзэ но картэзлы шуэ:
— Усто ик, патермес татчы сётӥллям. А то улйысьёс жингыртӥзы, ӵашетэмен, пе, улэм ик уг пот ни…

°°°

Егит кузпалъёс керетӥзы но, кышноез синву пыр шуэ:
— Сё! Адӟеме но уг пот ни. Али ик дӥськутме басьто но анае доры берто! Люкиськиськом!
— Азьыдлэсь берыд чебер! Тани сюрес вылэ уксё, ме.
Егит нылкышно коньдонэз лыдъя но вожез потыса куаретэ:
— Нош кытын берлань лыктыны уксё?

°°°

Картэз кышноезлы шуэ:
— Эн бӧрды, мусое, пыраклы уг кошкиськы ук, кык толэзьлы гинэ.
— Тодӥсько мон тонэ. Шуиськод кык толэзьлы, нош ачид арня ортчыса ик бертод ни.

°°°

Ульчаын кык воргоронъёс ваче куарето:
— Ох, кучапи!
— Ачид пуны!
Вӧзтӥзы ортчись мурт вератэк ӧз чида ни:
— Ма, тӥ ӵыжы-выжыос бере, дугдэ ни даллашемысь!

°°°

Поездысь купеын уин йыг-дым вазе. Куалектэм пассажиръёс юало:
— Мар луиз?
— Дэреме усьыны шедиз кадь, — вераз одӥгез пияш. — Нош мон ачим пушкысьтыз потыны ӧй вуы уга.

°°°

Анай дышетскись пиезлы вазиське:
— Малы ке мон уг адӟиськы тынэсьтыд дневниктэ.
— Ай мынэсьтым сое Васи басьтӥз, анай-атайзэ кышкатыны малпа.

°°°

Мунчоысен кык пичи пиос зӧк кӧто гольык пиосмуртэ адӟо но паймо:
— Дядяй, мар тӥляд кӧтады?
— Бомба.
Одӥгез пияш мукетызлы лушкем вера:
— Ойдо пуштытом сое.
— Кышкыт. Фитилез укыр вакчи.

°°°

Пересь дышетӥсь кулӥз но сояз дуннее сюриз. Сое интыязы адэ. Арня ортчыса лыкто но шуо:
— Извинить каре, янгышамы. Тӥляд интыды райын.
Нош со шуэ:
— Кулэ ӧвӧл, мыным татын но умой. Школа бере, ад мыным рай кадь потэ.

°°°

Врач дораз пырем муртэ визьнода:
— Юэмысь дугдӥды ке, улондэс кузёмытоды.
— Зэмлэсь но зэм, доктор, одӥг арня гинэ ӧй юы, со дыр мыным быдэс ар кадь потӥз.

°°°

Одӥг воргорон доры мукетыз куное лыктэм. Учке но пайме: борддоре таз ошемын. Куно юа:
— Map-о тынад сыӵе ошемын?
Кузё валэктэ:
— Со, тодэмед потэ ке, вераськись час.
— Кызьы озьы?
— Тани, учкы!
Воргорон кияз секыт молот кутэ но тазэ кужмо шукке. Борддор сьӧрысь черектэм кылӥське:
— Албасты, кык час уин, нош тон…

°°°

Кык песянайёс пумисько вагонын.
— Тон кытчы-о мынӥськод? — юа одӥгез.
— Глаз каре,— шуэ мукетыз.
— Нош мон Глаз карысь.

°°°

Ульчаетӥ воргорон вамышъя. Кыказ ик киосаз ӟенеликъёс.
Пумитаз ӝимем юлтошез юа:
— Тон мар ай, буш бутылкаостэ сдать карыны мынӥськод-а?
— Уг ведь. Кышноеным керетӥ но, со мыным шуиз: «Вань котырдэ басьты но кошкы!»

°°°

Тюрьмаысь камерае выль муртэ вутто.
— Нош тон мар понна шедид? — юало отын пукисьёс.
— Пыэдэн сэрен.
— Кызьы озьы?
— Ма туж огшоры. Мон кизьнӥ, нош сторож сайказ.

°°°

Люкисько кузпалъёс. Судья вазиське пиосмуртлы:
— Маин сэрен тӥ таӵе куриськон гожтӥды?
— Югдур тазьы вал. Ужын мыным дэмлазы зарезь дурын шутэтскыны кык муртлы путёвка. Мон соку ик доре кышноелы жингыртӥ но юай, соглаш-а со кунгож сьӧры ветлыны.
— Нош со?
— Со бурдъяськыса черектӥз: «Шумпотыса! Нош кин та вераське!»

°°°

Егит пияш уже интыяське. Бригадир солы валэктэ:
— Тон вордӥськонэ уже потод. Эн беромы — ӵукна дас кык часын ик татын мед луод ини. Ньыль часын пичияк кенеш ортчоз, эшъёсмы лыктозы, кӧня ке юом, вераськом…
— Ма, мон… марым, уг юиськы.
— Зэм-а? Соку вордӥськонэ эн ик ветлы. Пуксёнэ лыктыны эн беро­ мы. Ньыль часын кенеш луоз. Собере эше кокаин ваё шуиз.
— Мон наркотикъёсын но уг выриськы.
— Жаль… Соку арня шорын гинэ лыкты, но вазьгес… Прораб нылъёсты ӧтиз, шулдыръяськом.
— Мар тӥ? Мон кышнояськемын ук, кышноме ноку но уг пӧяськы.
— Зэмзэ но-a? Нош тон чагыр ӧвӧл-а?
— Ӧв-ӧ-ӧл.
— Хм. Соку покчиарняе но уже эн пота…

°°°

— Кӧня мурт татын ужа?
— Мастерен ӵош — дас:
— Нош мастертэк ке?
— Мастертэк — нокин но уг.

°°°

Пумисько кык колхоз кузёос:
— Петрович, тодӥськод-а, мон ас хозяйствоям скалъёсме табере компьютерен лыдъясько.
— Зо-о-ол, кызьы озьы быгатӥд?
— Ма, азьло тани пудоез йырызъя лыдъяськом вал. Озьы ук? Нош ми али пыдъёссыя чотаськом но бӧрысь компьютерен со лыдпусэз ньыльлы люкиськом — скалъёслэсь лыдзэс озьы син куспын тодыны быгатӥськом…

°°°

Пыдкук тупатьян мастерское воргорон лыктӥз.
— Мынам сапеге туннэлы дась луоз шуизы.
— Бен, дась. Кызь манет тыре но басьтэ.
— Кызьы сокем дунтэм? Квитанциям гожтэмын вал: ньыльдон манет тыр луоз.
— Шонер. Со куз сапеглы. Но ми одӥгзэ ыштӥм.

°°°

Воргорон тыр уробоен мынэ. Сое эшез пумитам но юа:
— Мар нуиськод сыӵе?
Воргорон эшсэ дораз ӧтем но пеляз гинэ вера:
— Сезьы.
— Нош малы шыпыртӥськод гинэ?
— Валэ медаз кылы.

°°°

Бакча кенер дорын йыртышсэ кормаса сылӥсь Ладьмер доры Лазыр вуиз:
— Ма сокем куректыса сылӥськод?
— Ай тани бакчаме копай но…
— Со понна шумпотыны кулэ, дыр…
— Бакчаме копакум корт манет шедьтӥ — кисыям понӥ. Кык-куинь пол лопаткаеным музъемез бугыртӥ-а, ӧй-а — нош ик корт манет потӥз. Тазэ но кисыям понӥ. Ӝоген выльысь манет шедиз. Озьы дас пол-а, мар-а.
— Иське, ватос шедьтӥд?
— Эх, озьы ке луысал, куректонэ шат усьысал… Кисые пась вылэм.
Табере аслэсьтым со корт манетме но ӧй шедьты ни. Соин ик выльысь-а, мар-а бакчаме копано шуыса малпаськисько ай…

---

---

°°°

Тылпу кысӥсь мурт крезьгуръя школаын дышетскыны малпам.
Солэсь юало:
— Маин пӧртэм луо скрипка но контрабас?
Соиз кема ик малпаськымтэ:
— Контрабас кемагес ӝуа.

°°°

Японецъёс Ижкарысь автозаводэ машинаосты ӵош лэсьтон сярысь кенешыны лыктӥллям. Куартолэзь, ваньмыз вож-вож пушъемын ини, нош куазь кезьыт. Шымырскизы кунгож сьӧрысь куноос но паймо:
— Ма, кызьы озьы луэ: котырак гужем кадь чеберскемын ни, нош куазьды кезьыт?
— A-а, льӧмпу сяськаяське.
Кыкетӥ араз но японецъёс куартолэзе ик вуиллям. Суред сыӵе ик: вань­ мыз буй-буй ӝужа, нош куазь кезьыт. Таос выльысь паймо:
— Малы сокем кезьыт шаерады?
— Льӧмпу сяськаяське. — Ма, тӥ со льӧмпудэс кораны уд быгатӥське шат?
Берытскиллям японецъёс но кошкиллям. Шуо, пе: эк-эк-эк, таос льӧмпузэс гинэ но кораны уг нодсало бере, умой машина лэсьтыны быгатонзылы осконэз ӧвӧл. Озьы Ижкар автозаводын ӟеч япон машинаос­ ты поттон проект куашказ.

°°°

Сапег гындӥсь аслыз юрттыны но дышетскыны егит пияшез кутэм. Огпол усточи доры эшъёсыз лыктӥллям. Ойдо, пе, пумиськеммес пусъём.
— Пияш, кувшин кутыса, артысь магазинэ шаплыяк бызьылы ай.
— Ма, вае уксёдэс.
— Э-э, уксёен котькин но вина басьтыны быгатоз, нош тон уксётэк вайыны амалты. Кошкем пиёк. Кӧня ке улыса вуэ но кувшинэз ӝӧк вылэ пуктэ. Шумпотэм воргоронъёс кыштырак ӟусъёс вылэ пуксизы.
— Э-э, пияш, ми тонэ виналы келяллямы, нош тон буш кувшин вуттэмед.
— Ма, тыр кувшинысь юыса котькин но кудӟоз, нош тӥ буш кувшинэн пукыса шулдыръяськыны быгатэ, — вазем егит амалчи.

°°°

Гурезь йылын кык воргоронъёс пуко. Улӥын тулыс тудву вань бакчаосты яплак басьтэм. Учко но — бускельзылэн шляпаез вуя кошке.
— Осто, Педор кум выем, шляпазэ гинэ ву нуэ на. Ойдо, кумме буре вайыса юом.
Юиллям. Учко — Педор кумлэн шляпаез нош ик ву кузя кошке, но мукет пала ини.
— Ойдо юом на, куме тӥни шляпаеныз ялан ассэ тодэ вайытэ.
Пукытозязы шляпа ог кызь пол солань-талань ветлэм. Котькуд ортчыкуз воргоронъёс гучыкто. Кудӟизы ни. Учко: гурезь йылэ доразы Пе­дор кум тубе.
— Осто, осто, кум, тон ӧд выйы шат?
— Ӧй, мон ву ултӥ ик бакчаме гыри: тудву ортчемез возьматозь, гужем шор вуоз. Нош мынам картошме мерттоно ни.

°°°

Миквор книга ӝажы лэсьтон борды басьтйськиз.
— Мар бен, пӧрме-а?
— Уг валаськы ай.
— Мае?
— Ма, тани та пулэз куинетӥ ползэ вандӥсько ни, нош со али но вакчигес на.

°°°

— Ал-лё! Редакция-а та? Берло потэм газетты чебер но тунсыко пӧрмем.
— Кудӥз статья тӥледлы тужгес келыииз?
— Петровлэн гожтэмез.
— Вань гожъямъёсмес лыдӟиськоды-а?
— Уг. Петровлэсьсэ гинэ. Петров — со мон ачим.

°°°

Одӥг колхозлэн тӧроезлэн запискаез: «Тов. Иванов! Помогите бри­гаде Петрова дуги квасить».
Мукет дыръя тышкаське:
— Такой дельной воргорон, а по улице лонь-лонь ходишь!
Кенешын вераське:
— Чисто табань пызём кормим, всё равно телята умирают.

°°°

Одӥг фирмалэн директорез ужасезлы ивортэ:
— Тӥ мыным кельшиды, соин ик уждундэс кык пол будэтӥсько. Но та сярысь нокин но медаз тодылы. Валамон-а?
— Валамон, директор. Мон та сярысь картэлы но уг вера.

°°°

— Микта, уин возьмаськись луиськод но, ужед кышкыт ӧвӧл-а?
— Кышкыт! Умме усьытозям кышкаменым дыр! куалекъясько.

°°°

Отделлэн кивалтӥсез ужасезлы шуэ: — Тонэ таяз кварталэ премитэк кельтоно луоз. Уже ӵукналы быдэ беромыса вуиськод.
— Мон янгыш шат? Часэ бере кыле ук!

°°°

Пумиськизы кык кышномуртьёс. Огез шуэ:
— Милям бере кылисьёслы, ох! зол йӧтто. Котькуд нуналэ кивалтӥсьмылэн юрттӥсез бере кылисьёсты пусйылэ.
— Иське, тыныд но зол шеде, дыр, о-о. Кема назьылляськыны яратӥськод ук.
— Ма, со пырон ӧс азьын ӝыны час пала гинэ сылэ. Нош мон дышем сямъя ялан ньыльдон минутлы ӝегаса вуисько.

°°°

Пырем мурт секретарь-машинисткалэсь юаз:
— Тӥ кузёдылы ивортӥды-а, ревизор вуиз шуыса?
— Бен, верай.
— Соку малы со интыяз ӧвӧл?
— Сукари люканы но семьяеныз люкиськыны дораз бертӥз.

°°°

Кык воргоронъёс куспазы верасько: — Та Иванлы ваньзэ вераны но дӥсьтоно ӧвӧл. Зулёз, кыль басьтон, шарае поттоз.
— Э-э, Иванэз тон уд тодӥськы вылэм. Солы кадь мон нокинлы но уг оскиськы. Ог дас ар талэсь азьло солэсь уждунзэ кык пол будэтӥзы, нош кышноез со сярысь али но уг тоды на.

°°°

Фабрикае выль ужасез кутӥзы. Сое проходной будкае пуктӥзы. — Умой учкы. Уж дорысь нокин номыре медаз потты.
Уж бере доразы бертӥсьёс ваньзы сумкаен пото. Вахтёр сумкаоссэс берыкъяса ик учке, номыре уг шедьты. Воштыны лыктэм вахтёрлэсь со юа ини:
— Мар бен лэсьто асьмелэн фабрикаямы? Мае утчано, медаз поттэ шуыса.
— Асьмелэн татын сумкаос вуро.
— А-а-а…

°°°

Пичи шур дуре выж лэсьтӥсь воргоронъёс доры ёросысь кивалтӥсь лыктэм.
— Вералэ ай, Фёдор Петрович, кыӵе-мар выль иворъёс вань ини дунне вылын? Газет-мар ум басьяське, номыре ум тодӥське, — юа, пе, одӥгез ужась.
— Кытын али бадӟым лэсьтӥськонъёс мыно?— итӥське мукетыз.
— Хм. Лэсьтӥськон-а? Самой бадӟымез татын, дыр, тӥ дорын. Вить ар ветлӥсько ини дорады, ялан та выждэс лэсьтӥськоды.
— Бен, соиз зэм. Озьы луыса кошке кадь та. Шурмы пичи, выж бадӟым.

°°°

— Паймымон пӧйшуръёс та адямиос! — огез кут мукетызлы шуэ. — Вӧлдэт лэсьтыны сомында коньдон быдто, нош асьсэос со вылтӥ уг ветло — выж вылтӥ гинэ.

°°°

Мӧйы воргорон йырзэ сэзъя:
— Быдэс нунал турнамы, пе, нош турынмы санеген куинь пол ӝутымон гинэ люкаськиз.
— Ма, атай, тон пересь ини, нош мон пинал на. Коня быгатӥм, со­ мында ик турнамы.
Сиськемзы бере ӝытазе воргорон шуэ:
— Паймод ук, макем трос сиимы, пие.
— Ма, атай, асьмеос кыӵе ке сыӵе воргоронъёс ук.

°°°

Ульча кузя кудӟем воргорон мынэ но кесяське:
— Мед улоз Путин эш… ик!.. мед улоз Путин эш… ик!..
Пумитаз шедисьёс юало:
— Мар тон нош ик кивалтӥсез данъяськод? Выльысь культ личности луоз.
Кудӟем мурт адӟем но уг кары, кесяське:
— Мед улоз Путин эш… ик!.. мынам быдӟа уждунэн.

°°°

— Никита Сергеевич, кызьы озьы луэ: мынӥськомы коммунизме, нош сиёнмы ӧвӧл.
— Гажано эшъёс, нош кин тӥледлы коммунизме сюрес вылын сиськомы шуиз?

°°°

Леонид Ильич Брежнев космонавтъёсты люкам но шуэ:
— Гажано эшъёс, асьмелы ракетамес Шунды доры лэзёно, Америкаысь астронавтъёсты азьпалтоно.

°°°

— Ма, Леонид Ильич, озьы кареммы уз луы. Тодӥськоды-а, кыӵе отын температура?
— Тодӥсько, тодӥсько. Но тӥ малпаськоды, Политбюроын шузиос пуко? Уг. Соин ик ми таӵе малпанэ вуимы: асьмеос уин лобомы.

°°°

Ёрослы кузёе кыкетӥзэ ни азьвылзэ ик адямиез бырйиллям. Соин вал­че банкет ортчыто. Быръем мурт люкаськемъёслы вазиське:
— Map-о, эшъёс? Котькудмылэн асьмелэн юртъеръёсмы, музъеммы, кунгож сьӧрысь машинамы вань ини. Табере калык сярысь но сюлмаськыны кулэ ни.
Люкаськемъёс кизэс чабо. Одӥгез йылтэ:
— Зэм но, Иван Иваныч, калык сярысь но малпаськоно. Быдэн дас адями ке но кулэ вал музъеммес утялтыны, юртъермес эскерыны.

°°°

Инмар доры Буш лыктэ но шуэ:
— Ку мынам калыке ӟеч улыны кутскоз ни? — Кызь ар ортчыса.
Буш бӧрдыса кошкиз.
Путин Инмар доры лыктэ но юа:
— Ку мынам калыке ӟеч улыны кутскоз?
Инмар бӧрдыса кошкиз.

°°°

Россиысь выль уголовной кодекс.
— Сюре долларозьлушкаськем понна КПЗ-е ворсано но тюрьмае пуктоно.
— Дас сюрсысен миллион долларозь лушкаськем понна КПЗ-е пуктоно, бӧрысь лэзёно.
— Дас миллион доллар лушкам понна — улон интыысь палэнэ кошкылыны лэзёно ӧвӧл.

°°°

Лобе музъем вадьсытй Змей Горыныч. Одӥгез йырыз кесяське:
— Эрик! Кыкетӥ йырыз вазе:
— Демократия!
Куинетӥ йыр бере уг кыльы:
— Либерализация!
Змей Горынычлэн кышноез учке со шоры но жаляса вера:
— Ой, мискинь, уйлы луыса, нош ик депутатъёсты сием.

°°°

— Малы Россиын куазь кӧс луиз?
— Малы ке шуоно, укыр кема кырӟамы «Котьку мед пиштоз шунды» кырӟанэз.

°°°

Банкысь лушкаськиллям — сейфысь марӟанъёс ышиллям. Милиция, нокинэ шедьтымтэен, банк вӧзысь пограса изись воргоронэз отделэ вуттӥз. Отын со мед сазьяськоз шуыса, солэсь йырзэ кезьыт вуэн тазэ месо но юало:
— Кытын марӟанъёс?.. Кытын марӟанъёс? Кӧня ке пол озьы зымылытэм бере воргорон кеськиз:
— Тӥледлы зэмзэ но марӟан кулэ ке, утчалэ мукетсэ зымылӥсез. Нош мон татысь номыре но уг адӟиськы.

°°°

Пиналъёс тодмо адямиен пумиськизы но куд-ог юанъёссылы валэктыны куризы:
— Тӥ, песятай, кема улӥськоды ини, вералэ вал, вазен кыӵе улйды?
— Ленин дыръя метроын кадь вал.
— Кызьы сое валано?
— Одӥг лампочка азьпалан ӝуа, нош мышкамы — тём-тём пеймыт.
— Нош Сталин дыръя?
— Сталин дыръя трамвайын кадь вал.
— Тазэ кызьы валано?
— Одӥгез пуке, мукетъёсыз ошемын.
— Нош али кызьы?
— Али таксиын кадь: азьлань мынэмъя ваньмыз дуноя.

°°°

Ленин поездын, пе, мынэ. Состав дугдэ. — Азьпалан сюрес тӥямын, Владимир Ильич.
— Ваньмы — субботнике!
Поезд азьлань вырӟиз.
Сыӵе ик учыр луиз Сталинэн.
— Азьпалан сюрес тӥяськемын, Иосиф Виссарионович. — Станцилэсь начальниксэ ыбоно, кылемъёссэ быдэн кызь вить арлы пуктоно.
Поезд ширтӥз.
Таӵе ик учыре шедиз Брежнев.
— Азьпалан сюрес тӥяськемын, Леонид Ильич.
— Пытсалэ ӧсъёсты но укноосты, вагонъёсты зуркатэ, паровоз мед шулалоз. Ваньмыз мед малпалозы, азьлань мынӥськомы шуыса.

°°°

Телефон жингыртэ. Брежнев трубкаез кутэ.
— Гажано Леонид Ильич кылзэ!

°°°

Быдӟымнуналэ ӵукна ик Брежнев ЦК-е пыре но, коридор кузя пумитаз лыктӥсь мурт солы шуэ:
— Христос улӟем, Леонид Ильич!
— Тау!
Мыне азьлань. Нош ик пумитаз кин ке шедем.
— Христос улӟем, Леонид Ильич!
— Тау, но мыным со сярысь ивортӥзы ини.

°°°

Брежнев ЦК-е лыктэм но отын ужасьёс адӟо: пал катаез сьӧд, мукетыз — курень. Однако чидамтэ ни, верам:
— Леонид Ильич, дорады бертыса, пыдкуктэс воштэ вал.
— Ма, тодӥсько. Мон бертай ни, но номыр карыны ӧз луы: дорам но катаосы сыӵе ик, огез сьӧд, мукетыз курень.

°°°

— 2005 арозь ваньдылы патер сётомы.
Зал кизэ чабе.
— 2010 арозь котькуддылэн автомашинады луоз.
Зал шумпотэменыз кесяське.
— 2020 арозь котькуд семьялэн аслаз самолётэз луоз.
Зал паймемын.
— Нош малы самолёт?
— Ну, кылсярысь, улӥськод тӥ Москваын, нош Ижкаре сӥль вуттӥзы…

°°°

— Кытын азинскем социализмлэн но коммунизмлэн виссы?
— Со Кремльлэн борддорез.

°°°

Колхозын огъя кенеш ортче. Тӧро вера:
— Туннэ асьмеос кык ужпумез сэрттом-пертчом. Нырысез ик, итымлэсь липетсэ выльдон.
Кыкетйез — коммунизм лэсьтон. Та вакытэ итымез липыны пулмы ӧвӧл бере, кыкетӥ ужпум борды выжом.

°°°

Одӥг воргорон паллян палан улӥсь бускелезлы вазиськем:
— Ӵуказе куноосы лыктозы, такадэ сёт вал.
— Э-э, такаме сётыны уг быгатӥськы, но мон тыныд ӟеч визь-кенеш сёто: бур палась бускеледлэсь кур.
Соизлы вазиськем. Таяз учыре воргорон таӵе валэктонэз кылӥз:
— Мон тыныд мукет визь-кенеш сёто: гурт пумысь узыр Миклай доры мын, со тыныд куинь такаээ но сётоз.
Узыр Миклай синкашъёссэ ӝутъяса ик шуэ:
— Кылзы ай, мон тыныд одӥг кенеш сёто.
— Ма, мар мыным тынад кенешед? Ваньмыз кенеш вылэ кенеш сёто, нош таказэс — уг.
— Ма, асьмеос кенешо кунын улйськом ук, такаё кунын ум.

°°°

Одӥг нылмурт эшезлы шуэ:
— Тодӥськод-а, мон толон воргоронэн тодматски. Со монэ дораз ӧтиз — гольык, пе, суредало.
— Тон верад, дыр, ук, ноку но натурщица ой вал шуыса.
— Одно ик. Но со шуиз: солэн но ноку суредамез, пе, ӧй вал на.

°°°

Одӥг кышномурт кулэм картэзлэсь туспуктэмзэ суредась доры ваем.
— Тӥ быгатоды-а та туспуктэмъя картэлэсь бадӟым патретсэ суреданы?
— Быгато.
— Нош шляпатэк суреданы быгатоды-а?
— Быгато. Только вералэ, кызьы со йырсизэ нуллэ вал.
— Малы? Йырысьтыз шляпазэ басьтӥды ке, асьтэос адӟоды.

°°°

Пичи пияш школаысь бертӥз но бубизлы шуэ: — Суреданъя дышегӥсьмы огпол но валэз адӟылымтэ на.
— Малы?
— Мон урокын валэз суредай, нош со паймиз: мар-о, пе, та?

°°°

Театрысь потыкузы, картэз кышноезлы шуэ:
— Ярам ай, та спектакльлы урод рецензиосты толон лыдӟиськем.
— Малы — ярам?
— Ӧй ке лыдӟысал, шудэмзы кельшысал.

°°°

Одӥг драматурглэсь юаллям:
— Кызьы тон пьесаос гожъяськод? Кытысь темаос шедьтӥськод?
— Соиз сокем секыт ӧвӧл. Дас пӧртэм писательёслэсь быдэн пьесазэс басьтӥськод но, дас одӥгетӥез тынад пӧрме ини.

°°°

— Кызьы малпаськоды, кин вормоз та пумиськонын?
— Мар сюлмаськонэз, милямъёс вормозы.
— Нош кудъёсыз бен со милямъёс?
— Кин вормиз — со ик милямъёс.

°°°

Молотэз лэзьянъя ӵошатсконын одӥг спортсмен эшезлы шуэ:
— Мон туннэ котькинлэсь кыдёке лэзьыны кулэ: ӵ ошатсконъёсты трибунаысен кышное учкоз.
— Э-э, эн но малпа, трибунаозь нокызьы но уд вутты.

°°°

Мынэ боксёр ураметӥ, шӧмыз вань. Адӟе: воргорон гу копа.
— Мар кариськод? — юа со.
— Гу копасько.
— A-а, маке шорам кырыж учкыса верад. Me, тыныд!
Тышказ но азьлань мынэ. Кыӵе ке воргорон азяз кенерез буя.
— Мар кариськод?
— Кенер буясько.
— Нош мар тон сыӵе урод куараен верад? Me, тыныд.
Тазэ но тышказ. Мынэ азьлань. Воргорон тӥрен пу кора.
— Мар кариськод?
— Тынад мар ужед?
— A-а, пу пильылӥськод-а?

°°°

— Кельшиз-а алигес гожтэм пьесае?
— Кельшиз! Тужгес но умоесь кык лушкаськисьёсыд. Соослэн кылъёссы гинэ но лушкамын.

°°°

Эмъясь доры висись лыктэм. Кылыз — сьӧд-сьӧд.
— Мар луиз тӥледын?
— Водка ӟенелике соку гинэ вӧлдэм асфальт вылэ усьыса пилиськиз.

°°°

Картсэ юонлэсь дугдытыны тыршись кышномуртлы эмъясь вазиське:
— Нош карттылэн кыӵе ке туж бадӟым малпанэз вань-а?
— Вань!
— Туж умой! Карттылы вералэ, юэмысь дугдйз ке, тӥ со бадӟым малпанзэ одно быдэстоды шуыса.
— Ярам, мон эскеро, — шуиз кышномурт но дораз бертӥз.
Картэзлы вера:
— Кылзы ай, Вася, тон юэмысь дугдӥд ке, мон тыныд ӝытлы быдэ ӟенелик водка пуктыло.

°°°

— Map-о, нош ик пиньыд висе-а, мар-а, анлы бордад кутскыса улӥськод?
— Ӧвӧл, али гинэ кык пиньме ишкалтӥзы.
— Ма, огез гинэ висе шуид вал ук.
— Озьыез озьы но, эмчилэн сю манетысьтым берыктыны уксёез ӧй вал. Берыктоно коньдон тыр эшшо огзэ пиньме ишкалтӥз.

°°°

Висись мурт психиатрлы ӝожтӥське:
— Доктор, монэ тазалыке туж шугъяськытэ.

°°°

Кышномурт эмчилы шуэ:
— Ой, доктор, кыӵе тӥ шонер вераллямды, диета улонэз кузёмытэ шуыса. Мон куинь нунал гинэ уг сиськисъкы ай, нош аслым куинь ар кадь потэ ни.

°°°

— Доктор, мон вал кадь ужасько, парсь мында сиськисько, но жадисько пуны кадь. Мар кароно мыным?
— Пудо эмъясьлы вазиськоно.

°°°

Кык эшъёс верасько:
— Тон зымылыны быгатӥськод-а?
— О-о!
— Нош вуын улыны кема-а чидаськод?
— Куддыр кызьы.
— Кызьы озьы?
— Кызьы вуысь потто.

°°°

Эмъясь висисьлы шуэ:
— Тӥледлы уг яра юыны, тамак кыскыны, картаен шудыны…
— Осто, татчы но кышное вуылэм ини.

°°°

Эмъясь воргоронлэн вылтырысьтыз лыз-вож интыоссэ, вурӟылэм бервылъёссэ адӟыса юа:
— Тӥ футболист-a, хоккеист-а?
— Ӧвӧл. Мон — огшоры карт.

°°°

Воргорон психиатрлы ӝожтӥське:
— Мар карыны ик пайми ини. Кышноелэн йырыз сураськиз, ассэ пианино кожа.
— Ма, вае сое мон доры, учко, эскеро.
— Кызьы мон сое ваём? Тодӥськоды-а, кӧня коньдон куро водительёс пианиноез нуэм-ваемзы понна?

°°°

Кык кышномуртъёс пумиськизы.
— Висьыны усид шат?
— Малы? Ӧй.
— Ӵукна дорысьтыды врач потӥз но.
— Собере мар? Тон дорысь ӵуклы быдэ офицер потылэ ке, мон уг юаськы ук, война кутскиз-а шуыса.

°°°

Кышномурт чебер, веськрес нылыныз ӵош врач доры пыриз. Эмъясь нылмурт шоры учкиз но шуэ:
— Кылиське.
— Со уг висьы, мон висисько, — валэктӥз кышномурт.
— A-а, вождэс эн вае. Кылдэс возьматэ ай.

°°°

Операция ортчем бере хирург висисьлэсь юа:
— Кызьы-мар ини?
— Али умойгес кадь. Нырысь-валысь йыр нушыен васькытэм кадь жонгетӥз.
— Шонерзэ вераса, озьы ик вал со. Тӥледды операция лэсьтон ӝӧк вылэ вуттӥзы — нош наркозмы бырем.

°°°

Операция дыръя хирург ассистентъёсызлы вазьылэ:
— Скальпель… Вата… Вень… Спирт… Эшшо спирт… Огреч…

°°°

Эмъясь висисез учкиз-учкиз но шуэ:
— Мон висёнды сярысь мар вераны ик уг валаськы. Со — трос но кема юэмлэн бервылыз, дыр.
— Ярам, доктор, соку мон сазьтӥськем берады лыкто.

°°°

Врач доры ыж вордон фермалэн кивалтӥсез лыктэм но ӝожтӥське:
— Берло дыре маке уйёсы иземе уг луы.
Эмъясь валэктэ:
— Мур умме усён понна вашкала амал вань. Нырысь ик, гаӵоло выдэ, синъёстэс кыне но син азяды ыж уллёдэс пуктэ, собере оген-оген лыдъяны кутске… Умме усемдэс но уд шӧдэ. Озьы ӧд эскерелэ на-а?
— Эскери но — эшшо но уродгес луэ.
— Малы?
— Ыжъёсты лыдъяме бере мон соосты базаре нуисько но вузасько. Собере нош ик, дунтэмгес вузаны шедьтӥ шуыса куректэмен, быдэс уйзэ иземе уг луы ни.

°°°

Психотерапевт доры кышномурт лыктӥз:
— Картэ визьтэммиз, лэся.
— Малы озьы малпаськоды?
— Котькуд ӵукна ӵашка кофе юэ.
— Собере мар? Мон но юисько. Со висён ӧвӧл.
— Но мынам картэ кофе юэм ӵашказэ но сие, кутонзэ гинэ кельтэ на, доктор.
— Зэм но висе, дыр. Ӵашкалэн кутонэз ик тужгес но ческыт ук.

°°°

Эмъясь доры воргорон лыктэ.
— Доктор, маке мылкыд урод, быдэс мугор висе. Югыт дунне ик адӟемпотостэм луиз ини.
— Анализъёс сётэ ай но, учком.
Мар карод, анализ сётытэк ӧз луы. Арня ортчыса, воргорон нош ик вуиз.
— Map-о ни, доктор?
— Э-э, тӥляд вирысьтыды СПИД шедьтӥмы. Бен, урод висён, сое эмъяны али уг луы на. Эмъюм ӧз шедьтэ на.
— Доктор, оло, кыӵе ке таблетка яке укол дэмлалоды ик?
— Мон дэмласал дэриен эмъяськыны.
— Дэри юрттэ-а?
— Юрттоз-а, уз-а — уг тодӥськы. Но музъемын кыллёнлы ӝоггес дышоды.

°°°

Машинкаен печатлась нылмурт лыктэ врач доры. Соиз ымзэ усьтыны косэ:
— «А» шуэ али.
— Пичизэ-а, бадӟымзэ-а «а»-ез?

°°°

— Доктор, зэмзэ-а, трос ӵуж кушман сиыса, синмы умой адӟыны кутскоз?
— Озьы. Тӥ куке адӟылӥды-а очкиен луд кечез?

°°°

Кык воргоронъёс нылпи ваён юрт азьын пуко. Нуназе пал ӧс усьтйське но, огез доры тӧдьы халатэн нылок лыктэ.
— Зечкыласько! Тӥляд пиды вордскиз — батыр!
Кыкетӥез воргорон чоркак султӥз.
— Кызьы озьы? Мон ӵукнаысен татын витисько ини, нош со али гинэ вуиз ук!

°°°

— Ой, йыры пилиськымон висе, — огез ужась уж дурын шуэ. — Эмъясь доры ветлоно-а, мар-а?
— Мынам но огпол озьы вал, врач но кулэ ӧз луы,— валэктоно кожаз эшез. — Но кышное монэ валесэ выдтӥз, чупаз, ӟыгыртӥз но — ваньмыз ортчиз.
— О-о, зол, — шумпотӥз нырысетӥез, дӥсяськыны кутскыса. — Нош кышноед али дорад-а?

°°°

Сю аресъем воргорон доры журналист лыктэм но юалляське, кызьы со таӵе арлыдозь улӥз.
— Тӥ тамак ӧд кыске, дыр.
— Бен, ӧй кыскы.
— Мултэссэ аракы но ӧд юэ-а?
— Ымам но ӧй тырылы.
— Нош кузпалды вал-а?
— Вал, кулӥз ини.
— Тӥни, гажано эшъёс, та песятай шоры учкыса ик валано, кызьы адями, ас тазалыксэ чакласа, сю аресозь но улэ.
Со вакытэ артэ комнатаын йыг-дым! чир карем кылӥськиз.
— Мар отын луиз?— пайме журналист.
— A-а, агае визьтэмъяське.
— Тӥляд агайды но улэп на-а?
— Бен, сю куамын аресъем. Только мултэссэ юэ ке, тамак пуйызэ шедьтымтэ дыръяз кышноезлы йӧттэ ке йӧттэ ини.

°°°

— Малы нылдэс мыным сётэмды уг поты? Мон тамак уг кыскиськы, аракы уг юиськы, картаен уг шудӥськы, уин олокытӥ но уг калгиськы.
— Самой соин ик нылме уг сётиськы. Монэ ялан куаретозы, шуозы: эмеспиедлэсь адӟем кароно.

°°°

Висись куалекъяса шуэ эмчилы:
— Мон туж кышкасько, та мынам улонам нырысетӥ операцие.
— Эн сюлмаське, — буйгатэ эмъясь. — Мынам но улонам та ныры­ сетӥ операцие.

°°°

Одӥг воргорон ӵукна гинэ дораз бертэм.
— Кытын вал быдэс уйзэ? — пумитаз сое кышноез. — A-а. Висись эше дорын. Со кулымон висе, койка вӧзысьтыз султылытэк пуки.
— Нош кызьы нимыз со эшедлэн?
— Ой, со сыӵе висиз, сыӵе висиз — нимзэ но вераны ӧз быгаты.

°°°

Одӥг воргорон шуре выись адямиез утем. Пинь эмъясь вылэм.
— Тау, — шуэ соиз бӧрысь. — Кызьы бен тыныд пунэмзэ берыктоно ай?..
— Лыкты дорам, мон тынэсьтыд пиньдэ черодтэк ишкалто.

°°°

Эмчи висисез эскере:
— Водка юиськоды-а?
— Водкады вань-а, мар-а?

°°°

— Тани, песяй, тыныд эмъюм. Переседлы нуналлы быдэ сётъя, нуналаз дас пуньыен.
— Осто, кытысь-о мон сомында пуньы шедьтом?

°°°

— Э-э, тынад висёнэныд эшшо витьтон ар улыны луоз на.
— Осто, доктор, сыӵе уродмиськем ни шат?
— Малы?
— Ма, кылем арын дорады ветлыкум шуиды вал, та висёнэн сю ар улыны луоз.

°°°

Наркоз бере сазьтӥськем муртлы эмъясь вера:
— Операция дыръя тӥ асьтэды умой возиды, нош солэсь азьло кесяськиды, пегӟыны выриды. Артэ койкаын кыллись эшты уката уродгес: монэ огпол куртчиз но.
— Конешно! Милемыз ведь тӥляд клиникаяды укно миськыны гинэ ыстӥзы вал.

°°°

Клиникаын сизьымдон аресъем адямиез егитомытонъя операция ортче, йыркобы пушкын бугыръяськон куспын висись ассэ ялан керӟеггес но керӟеггес возе. Бӧрысь зар-зар бӧрдыны кутске. Врач сое буйгатэ:
— Я, операция йылпумъяське ни, минут ортчыса, вӧсь луэмдэс уд шӧдэ ни.
— Мон вӧсь луэмлэсь уг бӧрдӥськы. Мон школае беромисько ни, Марья Ивановна нош ик куаретоз.

°°°

— Тодӥськод-а, ӝоген Ижкарысь эмъяськонниосты выль сямен шунтыны кутскозы?
— Уг.
— Температуразы ӝутскыса ӟырдам висисьёс, палатаысь палатае ветлыса, быдэс больницаез шунтозы.

°°°

— Доктор, мон туннэ шӧдытэк кутэз ньылӥ.
— Эн сюлмаське, али мон укол пукто но, ваньмыз ортчоз. Кылиське.
Лыктэм мурт кылиськиз. Эмъясь укол пуктӥз.
— Ой, доктор, малы сыне вӧсь?
— Нош тӥ малпаськоды вал: дихлофос вӧсь уг кары?

°°°

— Доктор монэ чеснок вылын улыны косӥз.
— Уно-а секталадэ ыштӥд ни?
— Тон юа, кӧня эшъёсме ыштӥ ни соин сэрен.

°°°

— Выдӥсько но умме усьыны уг быгатӥськы. Эмъясь доры ветлытэк ӧйлась, — юлтошезлы воргорон вера.
— Кыӵе ке эмъюм гожтӥз, дыр.
— Ӧз. Изьыны выдэм берам лыдъяськыны дэмлаз.
— Ӝог-а умме усид?
— Миллион куамын сюрс ньыль сю дас сизьымозь лыдъяй. Собере дӥсяськи но уже кошки.

°°°

— Доктор, малы мон ялан бырдасько?
— Тӥляд мугорады мултэс вуэз вань.
— Нош мон озьы но ӧжыт юисько кадь. Ярам, табере спиртэз вуэн суратэк юыло ини.

°°°

— Алё! Скорой? Минут талэсь азьло пие авторучкаме ньылэм.
— Ӝоген вуом. Тӥ тодӥськоды-а, мар кароно? — Тодӥсько. Вуытозяды карандашей гинэ гожъясько ни.

°°°

— Доктор, кӧня тыроно луо мон, висись пиньме ишкалтӥды ке?
— Сю манет.
— Кызьы? Вить минутлэсь ӧжыт ужам понна — сю манет?
— Ярам, дырыз ӧжыт кадь потэ ке, мон та пиньдэс час ӵоже ишкалтыны даурто.

°°°

Кинотеатрлэн складаз шыр куажыртыса ик лентаез сие, эшез солэсь юа:
— Умой-а таиз фильм?
— Ӧвӧл, книгаын гожтэмез та мадёс ик ческытгес вал.

°°°

Могась мурт лавкае пыре но шуэ: — М-м-мыным к-к-кыскон к-к-кулэ вал.
— Т-т-тӥледлы к-к-кыӵеез-о?
— С-с-с-с-волочь!
— С-с-сыӵеез ӧ-вӧ-вӧл.

°°°

Песянай банкысь уксёзэ басьтон понна чек вылэ гожтӥськыны кулэ. Но со уг вала, кызьы сое лэсьтоно. Солы валэкто:
— Кызьы гожтэтты пуме кидэс нюртӥськоды, озьы ик каре.
Песянай йырзэ мыкыртӥз но чек вылэ гожтӥз: «Ваньдэс чуп карисько. Яратыса — Марья апайды».

°°°

— Map-о дан поттӥськод со «Восток» часэныд? Мынам «Роллексэ» сюрс доллар сылэ.
— Котькӧня мед сылоз, мынамез со понна ӝоггес ветлэ.

°°°

Лавкаын одӥг кышномурт витьтонэтӥ шляпаез мерта ини. Ӝӧк вылын тыраз олокыӵе но шляпаос.
— Я, тазэ мон басьто ик, дыр. Кӧня со сылэ?
— Уг тодӥськы, тӥ лавкаямы со шляпаен ик пыриды но…

°°°

Аксым мурт вӧта. Со базарын ӟазег вуза кадь, вить сю манет куре, нош солы сю манет гинэ сёто. Со куалектыса шарак сайказ но синъёссэ выльысь ворсаса кеськиз:
— Ярам, витьтон манетэн тырмоз, но только шаплыгес вай, а то сайкало.

°°°

Одӥг воргорон базаре мынэ. Сюрес кузь. Катаоссэ юнме пӧськытэм-лэсь со кылиз. Шнурокъёсыныз думылыса, пельпумаз ошиз. Мынонъяз изэз ӧз адӟы, пыдзэ вир поттӥз. Вӧсь луэм интызэ маялляса шуэ:
— Ярам коть, гольык пыд мынӥсько вал. Таӵе чебер катаме изъянтысал.

°°°

Бускелез доры воргорон пыриз. Адӟе: солэн ӝӧк кук бордаз курег думемын.
— Малы курегдэ думид?
— Толон базарысь басьтӥ ай, шыд лым сием потэ.
— Малы собере уд ӵогиськы?
— Нырысь мед пузалоз.

°°°

Базаретӥ бадӟым пуныен мынӥсь воргоронлы сӥлен вузкарись кеське:
— Эй, тынад пуныед али гинэ мынэсьтым быдэс кило сӥльме ньылӥз.
— Тау верамедлы. Соку туннэ мон сое уг сюды ни.

°°°

Базарын воргорон картошка вуза. Со доры басьяськись лыктэ но юа:
— Барангыды туж сьӧдэктэмын-а?
— О-о, пушкыз быдэсак сьӧд.
— Кынтэмын но, дыр, али.
— О-о, кын улэ шедиз вал. — Сисьмемын но ӧвӧл-а?
— Ма, ваньмыз сямен сисьмемын.
— Соку малы сыӵе барангыдэ базаре вузаны ваид?
— Ма, мар-о, огнам шат Сыӵе картошка сиыса улом?

°°°

Верасько кык эшъёс:
— Вера ай, пичи дырысьтыд огез ке но малпанэд быдэсмиз-а?
— Быдэсмиз. Йырситйм кыскакузы мон котьку малпалляй, пилеш мед луо вал шуыса.

°°°

Чебер Анна базарысь басьтэм фуфайказэ бертыса картэзлы возьматэ.
— Кӧняен бон басьтӥд?
— Куамын куре вал но… ньыльдонэн сётйз.

°°°

Инмысь кӧня зор-кот но лымы усемез лыдъян-чотан фирмае выль референт кутӥзы. Сое адӟыса, музъем вылэ вуытэк шунась лымылэсь быдӟалазэ эскерись Кудыевлэн быдэс мугорыз пӧсь тулкымен погыльске. Йырыз пороме, берганы шӧта. Тани али но, Верочка Кудыев вӧзтӥ ортчем бере, воргоронлэн синъёсыз бусаськизы — выж но вӧлдэт ваче вуизы кадь.
— Ы-ы… Зыныз, зыныз кыӵе! — Кудыев синзэ кыньыса ик омырез зынъяз. — Тулыс сяськаосын пыласькись садъёсын но таӵе ческыт шӧм уг луы, дыр…
— Инкаденсанс, — йырзэ берыктыса мынектӥз нылаш. — Сыӵе со ву-спрей.
— Йырсиед нош! Бен со ачиз йук шундылэн тылсиез ук!
— Иранысь хна со.
— Нош кыӵе со любой, сюрелась ю бусы но озьы уз тулкыма.
— Гербал Кер. Чия суллэсь, чабейлэсь шампунь,— валэктӥз Верочка.
— Нош куэдлэн ӵыжытэз но небытэз? — паймемзэ ватыны уг быгаты Кудыев.
— Нырысь ик, Милк Мейд — йӧло гель, — нокыӵе ӧз кариськы нылмурт. — Собере — Нэйчуралс — чай писпулэн вӧеныз маска-плёнка.
— Ымдуръёс нош? — Кудыевлэн усьтэм ымыз уг ворсаськы ни. — Кисьмам чияос но соос азьый бездытэсь!
— Клазеуэа. Мукет сямен вераса, «Бургундиысь вина» нимаськись по­ мада.
— Синкашъёс нош, синлысъёс нош! — Кудыевлэн синмаськемезлэн пумыз ӧвӧл.
— Уан-Грэд Маскара — синлысъёсты кузь адӟытӥсь тушь. — Нош… нош… кытысь Афродиталэн ӝужда мугор? — тодэмез потэ Кудыевлэн.
— Платформа.
— Мугор, ачиз мугор нош кызьы сыӵе веськрес?— сётскемез уг пот пиосмуртлэн.
— Англичанъёслэн диетазы! — вандэм кадь вазиз нылмурт.
Кудыевлэн син азьысьтыз лэйкась выж но вӧлдэт каллен-каллен интыязы пуксизы, соин ик юатэк ӧз чида:
— Верочка, кылзы ай, асладэз, асладэз маид ке коть вань-а? Зэмос асладэз, шуисько.
— Вань… — мур лулӟиз Верочка.— Кызьы ке но бызёно вал…
Кудыевлэн син азьыз выльысь бусаськыны ӧдъяз, выж но вӧлдэт интыенызы воштӥськизы кадь…

°°°

Одӥг банкетын кӧй воргорон тыке но тыке, азяз мар гинэ пуктэмын — ваньзэ сузя. Синмыныз уӵертйз но — сэрегын чиед гинэ пиосмурт пуке, номыр но уг сиы.
— Малы тӥ номыр уд сииське? Туж ческыт ук!
— Тау, мынам коты тыр.
Ӝыны час ортче.
— Ма, тӥ сиське — туж ческыт, вылаз ик, дунтэк.
— Тау, сиеме уг поты.
Эшшо ӝыны час ортчиз.
— Малы тй уд сиськиське?
— Мар котырам тэбиниды? Куке сиеме потэ — сиськисько, куке кӧты тыр — уг сиськиськы. — Ну-у, тӥ чылкак пудо-живот кадь.

°°°

Азьтэм муртлэсь огпол юаллям:
— Map-о умойгес: сиськыны-а, кылльыны-а?
— Кылльыса сиськыны умойгес.

°°°

— Тыронме мон тыныд таяз толэзе уг берыкты на.
— Бен кылемаз толэзе но озьы ик шуид вал ук.
— Кызьы шуи, озьы ик лэсьтӥ. Сётэм кылме мон быдэсъясько.

°°°

Фотограф доры воргорон пырем но шуэ:
— Монэ героез кадь пуктоно вал.
— Кызьы?
— Тӥ ӝӧк вылэ ӟенелик аракы пуктэ, нош мон йырме мукет пала берыкто.

°°°

Пограса изись воргоронъёс пӧлысь огез сайка но эшсэ ӝутыны выре:
— Я, Петыр, султыны быгатӥмы ке, быдэн сю грамм юомы на. Ӧм ке быгатэ — доре бертом.
Куноын дыръяз одӥг воргорон ӝӧк шорысь ик сьӧд чорыг мызез адӟиз но веръяз, собере отчы бадӟым пуньызэ месӥз. Кузё ӧз чида:
— Гажано куно, со ӝук ӧвӧл…
— Озьы, озьы… Ӝукен уд но ӵошаты.

°°°

Ресторанын воргорон юа:
— Чорыгды вань-а?
— Ӧвӧл.
— Нош сӥль? — Ӧвӧл.
— Кубистаен салат?
— Ӧвӧл.
Воргорон кошке ни но, официант сое уйыса сутӥз.
— Вождэс эн вае, мон тӥледлы вераны вунэтӥ, пыжем ӵӧжмы но ӧвӧл шуыса.

°°°

Кык эшъёс базарын пумиськиллям но шумпотэменызы ӟыгыръяськыны кутскиллям.
— О, кинэ мон адӟисько! Кӧня ар, кӧня ар ӧм пумиськылэ ни! — шуэ лапегез но чиедэз воргорон.
— Бен, кӧня тол, кӧня гужем ортчиз ни! — восьтэт воргоронлэн тыбыраз вешаса пальпотэ зӧкомыны кутскем пиосмурт.
— Кызьы шуо вал ай тонэ… ма, нимдэ чылкак вунэтӥ… Школаысен тонэ «Ӟоз» яке кыӵ ке «Бӧчы» шуиськом вал кадь,— бӧтьыртэ чиедэз.
— Ах, тон, гад! Татчыяд ик ожалто! — эшезлэн гадь бордаз кырмиськиз тазаез. — Кыӵе «Ӟоз» мон тыныд, кыӵе «Бӧчы»? «Лузь» шуо вал монэ, «Лузь»! Валад-а?

°°°

Тунаськись егит воргоронлы шуэ:
— Тӥ кузпалъяськоды ӝужыт, веськрес мугоро нылмуртэн. Солэн квартираез но, машинаез но луозы.
— Нош мар каром лапег но зӧк кышноеным?

°°°

Мода сьӧры уиськись нылкышно дӥсь вурисьлы вазиське:
— Мыным йӧлын кофе туе дэрем вуроно вал.
— Сакырен-а, сакыртэк-а?— нокыӵе ӧз кариськы дӥсь вурись.

°°°

— Ой, ӟеч адями, одйг манеттэ ке но вай вал. Мон кык нунал ини ымам пыры нянь но ӧй тыры.
— Мон но.
— Соку кык манеттэ вай но ӵош сиськом.

Мон сыӵе усто пӧйшурась, ыбисько ке, коньылэн синмаз ик йӧттӥсько.
— Ой, кыӵе зол! Лади, учкы ай, учкы — тӥни луд ӵӧж лобе. Ыб сое.
— Али ик. Учке, мар луоз. Одӥг, кык, куинь. (Бах!). — Ма, ма, луд ӵӧжед уг усьы ук, лобе. — Э-э, эше, тон али туж паймымон учырез адӟид. Таӵеез сюрс арлы огпол луэ. Учкы ай шораз: кулэм ӵӧж озьы лобе.

°°°

— Атай, тон луд кечъёслэсь кышкаськод-а?
— Уг.
— Нош малы соку пӧйшураны мыныкуд одно ик пыӵалдэ но пуныез сьӧрад басьтӥськод?

°°°

— Ну, коня луд кечез тон туннэ ваиськод?
— Огзэ но уг, но, тодӥськод-а, кыӵе мон соосты кышкатӥ!

°°°

— Кыӵе-мар пӧйшурад?
— Одӥг кыр парсь кутӥ.
— Ма, кыр парсьёс сокем аляллям-а?
— Бен, со парсь сокем ик кыр ӧй вал. Нош солэн кузёез — фермер — вот соиз кыр парсь кадь ик вылэм.

°°°

— Кыӵе ни пӧйшурады?
— Куинь ӵошен одӥг луд кечез ыбимы.
— Нош кызьы люкыны быгатӥды?
— А ми сое таки ӧм шедьтэ.

°°°

— Тодӥськод-а, Лади, мон толон дас килограммъем луд кечез ыби.
— Нош мон — быдэс пудьемзэ.
— Эх, юнме мон нырысь кутски та вераськонэз.

°°°

— Мон иськемысен луд кечез йӧттйсько. Нош огпол кыр парсез иськем но ӝыныысен погыртӥ.
— Нош мон толон та визнанэным метръем карпез поттӥ.
— Ма тон зулиськод? Метръем карп луэ шат?
— Ишь, тон кыӵе. Мон тынад быдэс иськемедлы нокыӵе но ӧй кариськы, нош тынад метрлы гинэ но оскемед уг поты.

°°°

— Йӧ вылын чорыганэд толон кыӵе ортчиз?
— Маке чорыганлэсь радзэ ӧй шедьты: ньылонме ке шунтӥсько, пыды кынме, пыдме ке шунтӥсько — ньылоны кынме.

°°°

Чорыгась визнанзэ вуырь поттӥз но эшезлы шуэ:
— Нош ик мумы чорыг зыгатӥз.
— Кызьы тодӥд?
— Нумыре быдэсак сюпсемын но ымдур буян помадаен наштамын.

°°°

Атаеныз пиез ӵукна ик тымет дурын чорыгало. Огпол но уг зыгаты.
Атаез шуэ:
— Пие, асьмелы анаед ыльнянь келяз вал. Потты ай сумкаысь, соин чорыгаса оскалтом.
— Атай, мон сое сии ни вал.
— Ярам, сиид ке, сиид.
Час ортчыса, атаез нош ик вазе:
— Пие, сумкаын кутэмнянь луыны кулэ. Потты ай, няненыз чорыгаса эскером.
— Атай, мон вань кутэмнянез сии ни вал.
— Ярам.
Пуко, пуко — одӥг чорыг но уг кыска. Кӧня ке дыр ортчыса, атаез шуэ:
— Ярам, пие, кылем нумыръёсты си ни но, доре бертом.

°°°

Чорыгась дортӥ ортчись мурт юа:
— Мар ке кутӥд-а ни?
— Бен. Огзэ кутӥ но вуэ куштӥ.
— Пичи-а, мар-а вал?
— Озьы, тон быдӟа ик, тон кадь акылес но.

°°°

Кык воргоронъёс ушъясько:
— Мынам Трезор нимо пуные ӵукналы быдэ киоскысь газет вайылэ.
— Тодӥсько, мыным со сярысь Жучкае вераз ини.

°°°

— Мынам овчаркае туж визьмо. Кырысь вуэ ке, кнопкаез ачиз зӥбе.
— Мынам озьы уг выры. Аслаз усьтонэз вань.

°°°

Кык пыӵъёс ресторанысъ пото но верасько:
— Map-о, пыдын бертомы-а, таксиен-а?
— Пыдын доре ум вуэ, дыр. Ойдо таксиен.
Ортчись пунылэн гонэз борды кырмиськизы но дор палазы ширтӥзы.

°°°

Дэри (Завьял) черкогуртлэн бадӟым урамез кузя мынӥсь воргорон пунызэ тышкаськись кышномурт доры вуэ.
— У-у, лешай! Опять бежал! Марш свой карчик! — ӟезе со азбарысьтыз потэм пунызэ.
— Кенак, — юаз воргорон,— тӥляд лусьтроды удмурт сямен уг вала-а, мар-а?
— Ма, со пуны ук, удмурт ӧвӧл, — кенак кыллы кисыяз ӧз пыр.
— Нош ӟуч кылэз кызьы вала?
— Я, юнме эн придирачкы! Сюресэд вольыт медло! Шарик, ко мне! — вамыштйз кенак капкаез доры.

°°°

Ульчаысен кык воргоронъёс пумисько.
— Тон чорыганы мынӥськод-а?
— Уг.
— Марлы?
— Ӵукна ик гороскопез лыдӟи, отын гожтэмын, туннэ, пе, чорыгъёслэн шудо нуналзы.

°°°

— Толон пӧйшураны мыныкум ведь пыӵалме доре кельтӥськем.
— Нош ку сое шӧдӥд?
— Ыбем луд кечме кышноелы сётыкум, со вераз ини.

°°°

Пичи пияш атаезлэсь юа:
— Атай, дышетӥсьмы шуиз: бадӟым чорыгъёс килькаосты сиё.
— Озьы, пие, дышетӥсед шонер верам.
— Нош кызьы соос консерва банкаез усьто?

°°°

— Малы чорыгъёс уг верасько? — юаз дышетӥсь пиналъёслэсь.
— Кызьы-о соос вераськозы, йырзы ялан вуын бере,— паймыса валэктӥзы соосыз.

°°°

Пӧйшурасьёс шутэтскыкузы кышнооссы сярысь верасько. Огез шуэ:
— Мынам кышное — койыкпи кадь: ненег, векчи, синъёсыз бадӟымесь, нюресь.
Вераськонэ итӥське мукетыз:
— Нош мынамез кескич, шаплы, горд — ӟичы но тӥни.
Куинетӥез шып кылзӥз но сялӟиськыса ик шуэ:
— Мынам кышное вылтус ласянь огшоры адями кадь, нош пушласянь… Эх!

°°°

Дышетӥсь сочинение гожтыны косӥз: — Отын мед луозы арняысь ваньмыз нунал нимъёс.
Чуказеяз Пети таӵе гожтэмзэ ваиз: «Арнянуналэ атай пӧйшураны мынӥз. Со сыӵе бадӟым луд кечез кутэм, ми сое вордӥськонэ, пуксёнэ, вирнуналэ, удмуртарняе, покчиарняе сиим, кӧснуналлы но кылиз на».

°°°

Судын:
— Малы тй пӧйшуракуды эшты шоры ыбиды?
— Мон сое куакъёс пӧлысь ӧй тодма, койык кожай.
— Ку бен валады янгышамдэс?
— Куке койык но шорам ыбылыны кутскиз.

°°°

Луд кеч аслыз кык гумыё пыӵал басьтэм. Пумитаз ӟичы лыктэ.
— Ӟичы, тодӥськод на-а мон сьӧры уйылӥськемдэ?
— Ой, вождэ эн вайы, луд кече, ноку но озьы уг выры ни.
— Ӧвӧл, ноку но уг вунэты соку кышкамме.
Ба-ах! Патрон быриз ке но, ӟичы пегӟиз. Луд кеч коня ке мынэмез бере ӵушъялэз пумита.
— Ну, ӵушъял, тодӥськод на-а монэ бышкалтэмдэ?
— Ой, луд кече, эн ыбы, жаля.
Бах! Кырыж син нош ик ӧз йӧтты. Пумитаз гондыр потэ.
— Гондыр, тодӥськод на-а пельёсме кыскамдэ?
— Ой, луд кече, жаля, ноку но уг обидьы ни тонэ.
Зӥбиз луд кеч курокез вылэ, нош патронэз огаз но гумыын ӧвӧл ни.
Пӧйшурасьмы гондыр азе пыдес вылаз усиз:
— Ой, гондыре, жаля, эн тышка.
— Уг, кузь пель. Али тон тодод, кыӵе зыно тынад визьтэмъяськемед.

°°°

Пӧйшурась дораз вожомыса бертэм но кышноезлы вера:
— Вот ведь кыӵе кескич вылэм та ӟичы.
— Map-о луиз?
— Адӟисько: нюлэс дуртӥ ӟичы бызе. Мертаськи но ыби. Со соку ик мекалскиз. Вот, малпасько, мон талэсь кузэ кышноелы воротниклы ниё. Лыктӥсько матаз — ӟичы пуныелы пӧрмытскем.

°°°

Тюрьмае пуксем адямилэсь юало:
— Мар понна татчы шедид?
— Браконьер шуизы.
— Кӧня сётӥзы?
— Дас вить ар.
— Map-о тон пӧялляськиськод? Со понна 15 ар ноку уг сёто.
— Ма, мон чорыгез онгромытӥсько вал. Тыэ динамит куштӥ но — пуштӥз ук! Собере ву вылэ куинь карп но дас кык водолазъёс лӧптӥзы.

°°°

Одӥг мурт нырысьсэ чорыганы мыныны дасяськем. Эшъёсызлэсь, пе, юа, маин умойгес зыгатэ: нянен-а, нумырен-а?
Солы огез валэктэм:
— Мон котьку нумырен гинэ чорыгасько. Нызьылиез копаны но кулэез ӧвӧл. Фонарик батарейкалэсь пумъёссэ музъеме бышкалтӥсько но — нумыръёс асьсэос пото.
Шутэтскон нуналъёс бере та эшъёс уж дорын пумисько ни. Чорыган сярысь юалляськись воргоронлэн шораз но уд учкы: быдэс ымныр лыз-вож.
— Мар тонэн луиз? Чорыганы ӧд ветлы шат?
— Нумыр бичаны сяна ӧй вутты. Тынад валэктэмедъя нызьыли поттыны малпасько вал, сьӧрам батарейка басьтыны вунэтӥськем. Соин, трос вольтъем линия доры вуыса, кык еззэ музъеме донги. Зэм но, нырысь кӧня ке нумыр мычиськиз. Но бӧрысь куинь шахтёръёс потӥзы на.

°°°

Map пӧртэмез вань толалтэ но гужем чорыганын?
— Ма, нокыӵеез но ӧвӧл. Ваньмыз огкадь: котькуд ӝыны час ортчыса, сюмыкез ӝутканы гинэ вунэтоно ӧвӧл.

°°°

Атаез нылызлэсь юа: — Аквариумысь чорыгъёслэсь вузэс воштыны тон ӧд вунэты-а?
— Ӧй, но чорыгъёс кылем арняе лэзем вуэз юыса ӧз быдтэ на.

°°°

Чорыганысь бертӥсь воргорон дораз каллен гинэ пыре но кышноезлэсь шыпытэн юа:
— Коӵышмы дорын-а?
— Ма, кышкатэк пыр — мон солы лавкаысь кило килька басьтыса дасяй ни.

°°°

Тылскем дурын пӧйшурасьёс пуко но пуныоссы сярысь верасько. Огез ушъяське:
— Куд-ог пуныос сыӵе визьмоесь луо — кузёзылэсь визьмогес!
— Ну-у, тазэ тон мултэс куасалтӥд ни.
— Зэм верасько. Мынам аслам но пуные сыӵе.
Ӵап со вакыт матысь куакъёс улысь кык луд кечъёс потӥзы. Ушъям пуны соос шоры учкиз — пельёссэ но ӧз выреты. Кыкетӥез воргорон се­рекъя:
— Э-э, нош тон шуид — пуныед аслэсьтыд визьмо.
— Визьмолэсь но визьмо, шельма. Тодэ: кык луд кеч сьӧры уиськод — огзэ но уд куты.

°°°

Одӥгезлы чорыгасьлы ноку но ӧз удалтылы, сое чорыгъёс но, эшьёсыз но серекъяллязы гинэ. Нош огпол удалтӥз: туж бадӟым чипеез кутӥз. Кияз кӧня ке воземез бере воргорон сое выльысь шуре куштоно кариськиз.
— Атай, малы чипеез лэзид? — паймиз пиез.
— Э-э, пие, нокин но уз оскы, ачим кутӥ шуыса. Лавкаысь басьтӥ кожалозы.

°°°

Вот удалтӥз ке удалтӥз! Кылем арня вискын фермерлэн тыметысьтыз чипей кутӥ — бадӟымлэсь но бадӟым. Нуисько доре: йырыз — пельпумам, быжыз — муз вылтӥ гыж кыстӥське. Учкисько но — пумитам фер­мер лыктэ. Мар кароно? Но мон визьмо адями, амало. Мар понна пельпум вылам йыры, йыр вылам картузэ вань? Куштӥ картузме, пушказ чипейме донги, картузме выльысь изьыяй… Мынӥсько — номыр сыӵетаӵеез ӧвӧл кадь… Озьы ик фермер ӧз шӧды — пӧяй.

°°°

Воргорон супырӟыса ик дораз бертӥз. Кышноез, исьнер кутыса, шораз омырскиз:
— Юод на-а? Юод на-а?
— Ӧб-ӧб-ӧб! Дугды ни, кышно. Ярам, юо!

°°°

Мукетыз воргорон но маял кадь кудӟыса бертэм. Пумаз вуэм кышно­ез сое ӧс дорысен ик пумитам.
— Сё, чидан быриз: яке мон, яке юон!
Воргорон кема малпаськем та кылъёс пумысен.
— Ярам но… марым… юон нош трос-а?

°°°

Грузчик уж дураз секыт мылкыдын вуиз. Мастер юа:
— Тон ӵукнаысен ик небӟытскыны вуэмед ни, лэся, ук?
— Мон юонме куштӥ ини.
— Ку-у?
— Кузэ уг тодӥськы ни, зол кудӟемын вал.

°°°

Ӵукна верасько пыктылэм ымныро кык воргоронъёс:
— Тодӥськод на-а, Петыр, толон тон кыӵе пезьдэмын вал? «Октябрь» дворецез мыным кужмысь вузаны ӧдъяд ук.
— Олома но юнме эн супыльты…
— Кызьы олома но… Зэмзэ но вузаны турттӥськод вал. Мон но басьтыны дась вал ини, только кисыысьтым коньдон ӧй шедьты.

°°°

Сурен вузкарон бар азьын тротуар вылын воргорон кылле. Отӥ ортчись мурт сюлэмшугъяськыса юа:
— Мар тӥледын? Оло, юрттэт кулэ?
— Ӧвӧл, мыным тӥляд юрттэтты кулэ ӧвӧл. Мон та барысь кужмо сурлы реклама лэсьтыса татын кыллисько.

°°°

Кудӟем воргорон бер ӝыт дораз пыриз но кеське:
— Кышно, монэ куаретыны кутскы али, сотэк валесэз уг шедьты.

°°°

Шулдыръяськыны лыктэм куно ӝыт сизьым часын ик шуэ:
— Я, ӟеч луэ, Анечка, Наташенька, ӟеч лу, Леночка!
— Map-о, таӵе вазь кошкыны малпад ни-а?
— Уг, мон кык-куинь час пуко на, но ымныръёстэс тодман дыръям ӟеч луэ шуо ик.

°°°

Баӵко вӧсяськись воргоронлы шуэ:
— Вина юон — со тӥляд бадӟым тушмонды. Тани тӥ кудӟоды — одно ик кышноеныды куаретоды, пистолеттэс кутоды но дырекъясь киосыныды уд йӧттэ!

°°°

Куинь воргоронъёс чугун сюрес кузя конгыляло. Огез шуэ:
— У-у, чёрт, тубатъёс кыӵе паськытэсь. Кыкетӥез соин соглаш кариське:
— Зэм но, эшшо ке балясэз туж улӥын.
Куинетӥез буйгатэ:
— Я, эн сюлмаське, тӥни лифт лыктэ.

°°°

Ӝыт юондырын воргорон ваньзэс бертыны косэ:
— Ну, эшшо быдэн сюмык юом на но, изьыны выдом. Ӵуказе вазь султоно.
— Малы? Ӵуказе арня ук.
— By юыны.

°°°

Бармен воргоронлы вазиське:
— Тӥляд стаканды буш ни, эшшо огзэ ваёно-а?
— Марлы мыным кык буш стакан?

°°°

Воргорон дораз юыса бертӥз но кышноезлы шуэ:
— Койка вӧзысьтым ӝӧк вылэ пукты ай кык стакан, огзэ аракыен, мукетсэ — буш.
— Марлы со кулэ тыныд?
— Оло, уин аракы юэме потоз.
— Нош малы бушсэ пуктоно на?
— Оло, юэме чик но уз поты.

°°°

Милиционер урам кузя мынэ но адӟе: ульча шорын ик пукись вуын воргорон ньыльпыдъяськыса берга, мае ке утча.
— Мар луиз? — кеське милиционер.
— Эн люкеты ай, кӧня ке вить.
Милиционер возьма. Вить минут ортчиз, дас вить минут. Паймиз ни.
Соку воргорон шумпотыса кеськиз:
— Шедьтӥ, шедьтӥ!
— Мае шедьтӥд? Возьматы!
— Ярдурез шедьтӥ!

°°°

Шӧмаськем воргорон ресторанысь потэ но ӧс дорын йыраз зарнивуам картузэн сылӥсь муртлы вазе:
— Такси ӧте вал — воксё ӟигары быриз.
— Мон тыныд швейцар ӧвӧл. Мон — адмирал.
— Хм, соку, марым, пароходэз ӧте!

°°°

Кудӟем воргорон куинетӥ этажысь усем но, сое соку ик калык котыртэм.
— Мар луиз? — кесяське бызьыса лыктӥсь милиционер.
— Угтодӥськы, — мырдэм султэм воргорон шенгыль вера. — Мон ачим но али гинэ татчы вуи.

°°°

Вазь ӵукна ик кышноез Лазырзэ сизьдэ:
— Тон малы ай нош ик тордыса вуид?
Лазырлэн синъёсыз таба пасьта ӟезиськизы.
— Ма-ма… — ӟудйз со. — Ачим вуи шат? Ладьмер ӧз вайы-а, мар-а?

°°°

Сэбет карыса, Лазырлэн куноосыз чаркаоссэс аракыен тырмытъязы. Ваче шуккизы. Ачиз корка кузё гинэ куноосыз азьын долкаса сылэ.
— Малы уд юиськы, кум?
— Марым…— веранзэ куспетӥ карыса, Лазыр тэркыяз вина лэзиз но пуньыен ӟузьылыны ӧдъяз.
— Мар дауртӥськод, кум?
— Марым, врачъёс чарка борды йӧтскылыны ӧз лэзе…

°°°

— Мар сокем пыдлось лулӟылӥськод ай, Лазыр?— юлтошезлэсь юа Ладьмер.
— Ма, кышное люкиськонэн курдатэ.
— Хе!.. Шумпотыны кулэ. Табере юэмед понна тышкаськисед коть уз луы ни…

°°°

Кудӟем воргорон сюрес вылэ пограм но, изьыкуз солэсь сапегьёссэ кылиллям.
Уробоен ортчись адями, пе, солы кеське:
— Эй, пыдъёстэ утялты, лёгало.
Кудӟем мурт пуксем, пыдъёсыз шоры учкем но шуэ, пе:
— Лёга, со мынам пыдъёсы ӧвӧл. Мынамаз — выль сапегъёс.

°°°

Кудӟем мурт дортӥз ортчисьлэсь юа:
— Уд-а тодӥськы, кытын улэ Чечей Лади?
— Ма, Чечей Лади — тон ачид ук.
— Созэ мон тодӥсько, вот вералэ вал, кытын мынам коркае?

°°°

Одӥг воргорон эшсэ пумитам.
— Кытын-мар ужаськод ни ай та вакыт?
— Милицаын!.. Вить сутказэ ужай ни. Эшшо, марым… дас нунал кылиз на.
Усыкмем Никодим телефонэн жингыртэ:
— Ал-лё… Кызь вить… ноль… витьтон кык-а та?
— Ӧвӧл!
— Соку нош малы трубкаез ӝутӥськод?

°°°

Ӝужыт юрт азьысь скамья вылын куинь арлыдо кышноос пуко но кыл гозысэс пуно:
— Мынам нылылэн пиез, Сергеез шуисько, одно ик врач луоз, дыр, — шуэ одӥгез. — Ӝытлы быдэ шприцъёсын выре, газ плита вылын олокыӵе но эмъюмъёс пӧзьтэ…
— О, милямез одно ик шофёр луоз кадь потэ!— кыкетӥез но бере уг кыльы. — Ялан бензин гинэ зынъяса улэ.
Куинетӥез шып пукиз-пукиз но пыдлосяк лулӟиз:
— Эке-кек, милям Васьлеен одӥг курадӟон гинэ… Нокыӵ е ужпӧрен но уг тунсыкъяськы, номыр сярысь но уг малпаськы… уен-нуналэн сур тордыса улэ…

°°°

Кык наркоманъёс Австралие вуиллям. Эркын тэтчась кенгуру пӧйшурез адӟыса, одӥгез мукетызлы шуэрскыса вера:
— О-о, юлтош, татын пыш бусызы пеймыт тэль кадь, дыр. Уть, ма быдӟаесь ӟозъёс тэтчало.

°°°

Йырез шузимытӥсь суретэн усыкмемъёс куспазы ченгешыны ӧдъязы.
— Мон Инмарлэн ыстэм муртэз! — гадьзэ урдэ одӥгез.
— Ӧвӧл! Мон! — сётскемез уг пот мукетызлэн. Эчешонзылэн йылаз-пумаз вуытэк, одӥг малпанэ дугдӥзы: ярам, пумитамы шедем нырысь адямилэсь ик юалом, пе. Тани пумитазы лыктӥсь муртэ дугдытӥзы:
— Вера ай, уром, ми пӧлысь кудмы Инмарлэн ыстэм муртэз луиськом?
— Мон, экеос, нокинэ, нокытчы ӧй ысты на…

°°°

Замыртыны яратӥсь кышномуртъёс куинь пӧртэмесь луо. Нырысь, одӥг чарка кымалтэмзы бере, китыр-китыр серекъяло: «Ой, кыӵе мон кудӟемын!» Шулдыръяськон йылпумъяськон азьын пуртэн вандэм мактал мытыло: «Кин тордэмын? Мон?!» Юмшанысь бертыкузы таксилэн водителез «Тӥледлы кытчы?» шуыса юа ке, сыӵе кышномуртлэн веранэз одӥг: «Тынад ужед ӧвӧл!»

°°°

Сюрес вылтӥ сопала-тапала кожаса лыктӥсь «Запорожецез» инспек­тор дугдытэ. Нош отын тыраз тордэм пиосъёс. Ваньзэсты кабина пушкысь кыскаса поттаз но султытъяз — синъёсыз кымесаз тэтчо ни вал: дас сизьым кузя! Огшап долкаса сылэмез бере ваньзэсты сазьтӥськонние келяз. Ӵуказеяз ӵукна сазьтӥськон юртлэн кивалтйсез «кунокуаын» уйзэс ортчытэм пиосты дораз ӧтиз но ӵектонэн вазиськиз:
— Вот мар, воргоронъёс, али тӥ ваньды мон азьын кабина пушкады толло ӝытазе кадь интыяськыны быгатӥды ке, пал кыл вератэк гуртады лэзё.
Сазёмыны турттӥсь пиосъёс шумпотыса «Запорожец» пушказы интыяськыны-тулъяськыны курадӟизы-выризы. Мырдэм но кызьы дас куатез тэризы ик, нош берпуметӥез йырзэ донгыны но инты уг шедьты.
Машина пушкы чуртнаськемъёс юлтошсылы соку вазё:
— Дугды ай, тон зэмзэ но толон ӝыт милемын ӵош вал-а? Мукет азьысь татчы вуттӥзы, дыр.
— Ну и сётӥськоды тӥ, — кунэрскиз соиз. — Нош кин-о, кожаськоды, быдэс сюресэз тӥледлы баянэн шудыса лыктӥз?!

°°°

Кудӟем воргорон сюрес урдсы гаӵоло усем. Кытысь ке ӧвӧл со доры пичи нылаш вуиз, мыкырскиз, азьчиньыеныз ныр йылаз зӥбиз:
— Пи-пип! — собере выльысь эшъёсыз полы бызиз. Кӧня ке улыса, мукетыз нылок вуиз но пиосмуртлэн ныр йылаз эшез музэн ик зӥбыса «пип-пип!» кариз.
Воргорон ойгетыса пуксиз, кык киыныз азьчиньызэ ныр дораз вуттӥз но зӥбиз — нокыӵе куара ӧз поты. Табере пӧлыеныз зол-зол зӥбиз — куара ӧз кылӥськы. Соку воргорон йырзэ бызьылӥсь экеос пала берыктӥз но мыжыксэ сэзъяны выриз:
— У-у-у, покачъёс! Тӥяды!..

°°°

Шур дурын огпалмем пияш усыкмытӥсьтурынэн тамак кыскыса пуке.
Вӧзаз джип дугдэ, отысь ослоп мычиське:
— Эй, зырымесь, кытӥ-о татӥ шур вамен выжо?
— Татӥ, пырак татӥ, — наркоман ныр улаз киыныз шонтэ. Джип берлань сётӥз, бадӟым ӝоглыкен жур-р! шуре пыриз но син куспын ву улэ кошкиз. Кӧня ке улыса, ву вылэ ослоп лӧптӥз, жомбыльтыса ярдуре уяз но пиёк шоры омырскиз:
— Тон мар, ожалтон люкет…
— Мар мон,— наркоман нокыӵе ӧз кариськы, — ог ӝыны час талэсь азьло пырак та вадьсытӥ сопал ярдуре ӵӧжьёс выжизы. Ву соослэн кускозязы ӧй вал…

°°°

Али гинэ служить карыны вуэм солдатъёсты строе султытӥзы.
— Петров!
— Мон!
— Сидоров!
— Мон!
— Широбоков!
— Мон!
— Григорьев!
— Мон!
— Кин отын берга?
— Музъем берга, прапорщик эш!
— Кин шуиз: музъем берга?
— Коперник.
— Рядовой Коперник, стройын вераськемед понна — кык наряд.

°°°

Егит десантникъёслы старшина парашютъёс сёгья.
— Нош парашюта ӧз ке усьтӥськы, — куалектыса шуэ огез солдат. — Оз ке усьтӥськы, дорам ик лыктод — мон тыныд мукетсэ сёто.

°°°

Постын малпаськонэ выем солдат шоры полковник кесяське:
— Рядовой Широбоков! Малы тӥ мыным честь ӧд сётэ?
— Янгыш. Умме усиськем.
— Ярам соку. Оло, монэ уд гажаськы ни-a кожай вал.

°°°

— Капитан эш, ми тушмонлэсь шпионзэ кутӥмы. Ошыны яра-а сое?
— Уг. Со вылйысен асьме ожгарчиосмылэсь интыяськемзэс адӟоз.

°°°

«Зечбур, нэнэ. Кыӵе ни тазалыкед? Вирзӥбетэд вылйын шуыса ӝожъяськиськод вал. Милям дивизиысь врачмы солдатъёслы вера: сое, пе, турникын ӝутъяськыса но дас иськеме бызьылыса эмъяно. Озьы эскерты ай».

°°°

— Лейтенант эш, мынам учениосын ыбылӥськеме уз луы.
— Малы, рядовой Перевозчиков?
— Мон автоматме ыштӥ.
— Ярам, соиз сярысь берло вераськом. Нош али тон чиньыеныд гинэ пах-пах! карыса азьлань бызь.
— Лейтенант эш, нош кин-о со лыз погонъёсын киоссэ вӧлъяса луд вылтӥ бызьылэ?
— Лётчикъёс пӧлын но тон кадь йырсазьтэмъёс ӧжыт ӧвӧл.

°°°

Строен ветлыны дышетскыку:
— Азьлань! Берлань! Выдэ! Султэ! Паллянэ! Буре! Выдэ! Азьлань! Берлань! Берлань! Рядовой Иванов! Тон кытчы кошкиськод?
— Мыныса шутэтско ай. Тӥ, старшина, асьтэос но уд тодӥське, мар тӥледлы кулэ. Дас минут куспын сомында пол малпандэс воштӥды ини.

°°°

— Рядовой Перевозчиков, кытын тынад гимнастёркаед?
— Мон сое посылкаен анаелы лэзи.
— Малы?
— Бирдыез усиз, нош вурыны нокинлы…

°°°

Командир матросэз дораз ӧте.
— Тон оскиськод-а сопал дуннеын улонлы?
— Уг.
— Татчы тынад ӵужмуртэд лыктэм. Нош тон кык арня талэсь азьло гинэ куриськылӥд вал сое ватыны.

°°°

Прапорщик ротаез строе султытӥз.
— Кин толон увольнениысь кудӟыса вуиз?
Ваньмыз шып сыло.
— Эшшо огпол юасько на: кин толон увольнениысь кудӟыса вуиз?
Огез солдат азьпала вамыштӥз:
— Ну мон, прапорщик эш!
— Монэн ӵош макмыр веськатыны мынод. Мукетъёсыз — противогазэн дас иськеме бызьыса — марш!

°°°

Одӥг генераллэн дачаяз куинь егит солдатъёс ужало вылэм. Огпол генерал шӧмаськыса вуэ:
— Ӟечкылалэ, ӧрӟиос! Мынам куиньмо пиналъёсы вордскизы.
— Зечкыласьком, шумпотӥськом, азьланяз но тыршом, генерал эш!

°°°

Генерал доры уин посыльной лыктэ но шуэ:
— Генерал эш, тыныд — пакет!
— Тыныд ӧвӧл — тӥледлы!
— Малы мыным, тыныд — пакет!
— Вот ведь, визьмозэгес солдатэз ӧз шедьтэ-а, мар-а мон доры келяны?
— Визьмооссэ визьмоосыз доры ыстӥзы, нош монэ — тон доры.

°°°

Солдат увольнение потэ. Сержант солы шуэ:
— Тани тыныд манет, тазазэ нылмуртэз бырйы но парке ветлэ.
Солдат вуиз, вера:
— Ваньмыз умой, паркын юмшамы.
— Нош нылмурт висисьтэм, таза вылэм-а?
— У-у, кыӵе таза! Манетме мырдэм берен басьтыны быгатӥ на.

°°°

Прапорщик медкомиссиез ортче. Син эскерон кабинетын солэсь юало:
— Паллян синдэс кыне. Та кыӵе буква?
Прапорщик номыр уг вазьы.
— Ярам. Бур синдэс кыне. Кыӵе буква?
Нош ик шыпыт.
— Тӥ мар-о, чик уд адӟиське шат?
— Ӧвӧл, мон туж умой адӟисько, только вунэтӥ, кыӵе буква со.

°°°

Пеймыт ульчаын кык воргоронъёс пумисько.
— Эй, тон милиционерез кытысь ке матысь ӧд адӟы-а?
— Ӧй.
— Соку пальтодэ кыль.

°°°

Тюрьмаын:
— Иванов! Тон доры кышноед лыктӥз!
— Малы? Приговорын со сярысь номыр но гожтэмын ӧй вал ук.

°°°

Судын юало:
— Бускель кышномуртэ скал шуыса тышкаськиды-а?
— Ӧй но малпа. Мон солэсь нылзэ гинэ ветыл шуи.

°°°

— Осто, Марья, тӥ нылдэс Петырлы сётйськоды, лэся. Нош тодӥськод-а, со дас ар тюрьмаын пукиз шуыса?
— Ох, сурон бам, ой, пӧечи! Вить ар гинэ пуки, пе.

°°°

Банкын:
— Мыным кӧня ке коньдон кулэ вал…
— Счёттылэн номерез кыӵе?
— Счётэ ке луысал, мон али киям пистолет ӧй возьысал.

°°°

— Паймымонэсь ик мынам патер кузёосы,— чабкиське Гондырев. — Дыраз патер дун уг сётиськы ке, куарето. Вазьгес тырисько ке — милициез ӧтё, кытысь коньдон шедьтӥд шуо… Кызьы улыны ик паймод…

°°°

Янгыше уськытэм муртлэсь судысен юало:
— Тӥ асьтэды янгышен лыдъяськоды-а?
— Угтодӥськы на. Адӟисьёсты нырысь кылзоно.

°°°

Одӥг корка йыртэмасьёс пыро. Кузё шоры пистолетсэс урдо.
— Потты вань зарнидэ!
— Мынам сю кило сяна ӧвӧл.
Шырмачъёслэн синъёссы ик ӝуаны кутскизы:
— Милемлы со но тырмоз.
Воргорон кышнопала потэ но кӧлӥсь домблё кузпалзэ сайкатэ:
— Зиноке, зарние, султы, тонэ нуыны лыктӥллям.

°°°

Тюремщик выль пуктэм муртлэсь юа:
— Map-о, воргорон, тонэ но ми доры аракы вуттӥз-а?
— Оз, ву.
— Кызьы озьы ву?
— Мон йӧл кыскон фермаен кивалтӥсько вал…

°°°

Янгыше уськытэм муртлы судын шуо:
— Вералэ зэмзэ гинэ, чылкыт зэмлыкез, пичи но пӧяськытэк. Мар вералоды?
— Зэмлык гинэ ке, соку мар вераны ик паймисько.

°°°

— Малы тӥ бускель воргоронэз мыжгиды?
— Нош малы со лушкемен курег вордэ? Ижкарлэн шораз ик, дасэтй этажын!
— Но со понна гинэ адямиез луэ шат жугыны?
— Уг луы, гажано судъясь. Но мон солэсь азьло куинь толэзь психи­атр дорын эмъяськи, визьтэммемен курег коткамез кылӥсько кожаса.

°°°

— Кылӥд-а, Иванэз, пе, тюрьмае пуктӥллям.
— Ӧй. Нош мыным солэн кышноез шуиз, со, пе, агаез доры мынӥз. Пӧяз-a, мар-а?
— Ӧз! Солэн агаез куинетӥ арзэ тюрьмаын пуке ини.

°°°

Тюрьмаысь камерае выль муртэ вутто.
— Мар понна тон татчы шедид? — юало отын пукисьёс.
— Пыэдэн сэрен.
— Кызьы озьы?
— Ма, туж огшоры. Мон кизьнӥ, нош возьмаськись сайказ.

°°°

Милиционер — ӝегатэм муртлы:
— Тон тодӥськод: ӟазег лушкан — со туж урод уж.
— Кызьы, пе, уд тод: соос туж зол черекъяло ук.

°°°

Тюрьмалэн кивалтӥсез надзирателез пыже:
— Сизьыметӥ камераысь арестант кызьы ай пегӟыны быгатӥз?
— Мар паймонэз? Солэн усьтонэз вал.
— Оло, тынэсьтыд лушказ?
— Ӧ-ӧз! Нокыӵе пӧяськонъёстэк, картаен шудыса, мынэсьтым утӥз…

°°°

Янгыше уськытэм мурт суд кутскон азьын киоссэ посыса ик адвокатэзлы вера:
— Ох, мыскылляло мон туннэ прокурорез, ох, серекъяло следователез.
— Кызьы?
— Следователь куинь ар ӵоже мыным пумит уж бичаз, янгышъёсме куинь ар утчаз, судэ ӧтемын мыным пумит луись 25 адӟисьёс… Но куке нырысезлы кыл сётозы, мон соку ик вань янгышъёсме ас вылам басьто, ваньзэ ачим мадё.

°°°

— Али гинэ та пролкаын мынэсьтым зарни часме талазы, — постовойлы ӝожтӥське воргорон. — Нош малы юрттыны ӧд ӧте?
— Ӧтёд, пе. Ымме усьтысал ке, со йыртэмась зарни пиньме адӟысал ук.

Кык воргоронъёс верасько:
— Дас ар талэсь азьло пие Москвае кошкиз, трос уксё поттон понна.
— Трос-а поттэм ини?
— Шонерзэ угтодӥськы, но трос, дыр. Толон газетысь лыдӟи, сое кутыны юрттӥсь муртлы гинэ миллион манет сӥземын, пе.

°°°

Инспектор тюрьмаын пукисьлэсь юа:
— Малы тӥ татын?
— Ма, бертыны уг лэзё…

°°°

Йыртэмасьёсты возьмась тюрьмаын пукисьлы шуэ:
— Мон кылӥ, тонэ вордӥськонэ казнить карозы шуыса?
— Вот, чёрт басьтон. Ну и арня кутске!

°°°

Возьмаськись улмо лушкась пияшез кутэм:
— Мон тонэ дышето кызьы лушкаськыны!
— Туж умой, а то куинетӥзэ кырмо ини.

°°°

— Тон часэз лушкад-а?
— Ӧй, ӧй лушка.
— Нош кызьы со тон кие вуиз?
— Мынӥсько мон дворецысь коридортӥ, учкисько — борддорын час мынэ. Шуисько: ойдо ӵош мыном. Озьы тӥни ӵош кошким.

°°°

Судэ кык лушкаськисьёсты вуттӥллям. Судъясь юа огезлэсь:
— Кытын улӥськод?
— Куак улын.
— Нош тон?
— Мон со дорын — патерын.

°°°

Калыкен тырмем автобус пушкы кисы сузясь тулъяськиз но ас ужез борды кутскиз. Тазамугоро воргоронлэн кисыосаз бугыръяськыкуз, соиз шӧдйськиз — лушкаськисез сильсьӧртӥз кырмиз.
— Ох, кураськись, кинлэн кисыяз тон озьы кидэ лэзьяськод?
— Кин кураськись?! — лушкаськись пумитаз чангетыны шӧтаз. — Мон-а, мар-а кураськись. Шишь, ачид тон кураськись, вить кисыдэ бугыръяй ни — одӥг коньыдэ но ӧй шедьты.

°°°

Кунгож вамен выжыкузы, таможняын ужась «Мерседесэз» эскере.
— Наркотикты вань?
— Вань, — машина кузё багажникысьтыз чемодан поттэ. — Тани. Таиз героин, таиз кокаин. Ваньмыз нимысьтыз лач-лач тыремын.
— Оло нош, пыӵал тӥрлыкты но вань? — таможенниклэн синъёсыз кымесаз вуизы.
Машина кузё мукет чемоданзэ поттэ:
— Тани «Макаров», тани «Калашников»… Таосаз — соослы патронъёс… Кызьы кулэ — ваньмыз интыяз.
Таосты адӟыса, таможняын ужась серем улсын юа ни:
— Озьы бере, тӥляд валютады но вань?
— Кызьы-о сотэк?! — «Мерседес» кузё куинетӥ чемоданзэ поттӥз. — Тани. Татын миллион доллар.
— Ваньмыз со тӥляд?!— усьтэм чемоданэз адӟыса, таможенник гуньдӥз.
— Ӧвӧл, ваньмыз та тӥляд. Мынамез тӥни со «КамАЗ» машинаын.

°°°

Пытсэтын пукись картэныз пумиськылэмез бе­ре кышноез тюрьмалэн кивалтӥсезлы ӝожтӥське: кузпалэлы капчигес уж сётэмды ӧй луысал-а, пе.
— Вӧлдэтэ гинэ сяласа улысалзы соос… Бумагалэсь пакетъёс лякылыса нокин но куссэ ӧз вырӟыты на ай.
— Озьыез озьы, вылды, но… Уйбыт, чырым но изьытэк, кыӵе ке туннель копаськом, пе.

°°°

Пересь нылкышно пыдын кытысь ке бертӥсь бускелезлы чабкиське:
— Э-э, Петок, Петок, капка азьысьтыд машинадэ тургатӥзы ук. Но эн сюлмаськы: мон номерзэ адӟыса вуттӥ.

°°°

Сюрес вылтӥ отчы-татчы кожылыса лыктӥсь машинаез автоинспектор дугдытӥз.
— Кызьы тӥ таӵе кудӟыса но руль сьӧры пуксьыны быгатйды? — паймиз со.
— Оло, ӧй быгатысал но, эшъёсы юрттӥзы,— кылзэ мырдэм бералляз шофёр.

°°°

Кышномурт руль сьӧрын пукись нылызлы шуэ:
— Чакласькыгес! Уд адӟиськы-а «кышкыт кожонэз» возьматӥсь пусэз?
— Со кожон кышкыт бере, мон шонерак мыно.

°°°

Егит кышномурт автомашина басьтэм. Солы шуо:
— Дугдэ ай, ми нырысь тӥ понна сюсьтыл ӝуатом.
— Марлы? Тау, но мон пеймыт луэмлэсь азьло ик дорам вуыны малпасько.

°°°

Удмурт шофёр грузовой машинаен мынэ. Сое инспектор дугдытэ но вазе:
— Ваша путёвка?
— Путёвкае луысал ке, Сочиын шутэтскысал.
— Ваши права?
— Правое луысал ке, тон Воркутаын пукысал.
— A-а, ты ещё пьяный?
— Сазь дыръям мон тонэныд ӧй но вераськысал…

°°°

Кык эшъёс, машинатэк вамыш но лэсьтылымтэ муртъёс, паркын пумисько.
— Эх, умой вылэм одӥг-ог пыдын но ветлыны, — шуэ огез.
— Бен, озьы. Нош тынэсьтыд машинадэ ма понна талазы?

°°°

Сюрес вылысен машинаез гольык нылмурт дугдытэ. Сое шофёр бер пуконэз вылэ пуктӥз но синъёссэ вошъятэк шораз учке.
— Map-о, гольык кышномуртэз адӟемед ӧвӧл-а, мар-а? Учкы сюрес шоры, эшшо юбо шоры мырӟиськод.
— Адӟеме вань, но тунсыко, кытысь тон коньдондэ поттод?

°°°

— Та автоинспекторъёсын чылкак нерад луиськиз ини.
— Мар луиз?
— Толон дугдытэ монэ огез тротуар вылысен но юа: «Нош тон малы машинатэк?»

°°°

Милиционер палэнысь вуэм водительлы шуэ:
— Али ик машинадэ татысь басьты! Та — Кивалтэтлэн юртэз, татй азьмурт, министръёс но депутатъёс гинэ ветло.
— Эн сюлмаське, мынам машинаям замокез но, сиренаез но вань. Нокин уз лушка!

°°°

— Глазкаре поезд кошкиз-а ни?
— Кошкиз.
— Нош кудпала, кытчы?

°°°

Кык песянайёс вагонын пумисько.
— Тон кытчы-о мынӥськод?
— Глазкаре.
— Нош мон Глазкарысь.

°°°

— Трос-а кулэ тыныд машинаен умой ворттылыны дышетскон понна?
— Ну, сизьым-тямыс…
— Сизьым-тямыс толэзь-а?
— Ӧвӧл. Сизьым-тямыс машина.

°°°

Кык автоинспекторъёс сюрес дурын сыло, радарен машинаосты эскеро.
— О, кин ке туж ӝог ширтэ.
— Кыӵе ӝоглыкен?
— Кык сю манет тыр.

°°°

Кык водительёс верасько:
— Радарлы пумит выль аппарат басьтӥ ай.
— Юрттэ-а?
— Сӧриськемез-а, мар-а шедем. Инспектор доры куинь сю метр вуытэк вузыны кутске: потты уксёдэ, потты уксёдэ!

°°°

Луд кеч лӥял вылын пуке но бӧрдэ. Вӧзтӥз кион ортче.
— Эй, кырыж син, мар синкылидэ кисьтӥськод?
— Правоме талазы.
— Эн борды, мон али ик сое ваё.
Кӧня ке дыр ортчыса, кион вуиз:
— Вождэ эн вай, мынам номыр но ӧз пӧрмы.
Луд кечлы уно пӧйшуръёс юрттӥськыны ӵектӥськизы, огзы но ӧз пӧрмытэ. Тани вӧзтӥз кечтака ортче.
— Эй, кузь пель, малы синвуаськиськод?
— Правоме басьтӥзы. Кион но, ӟичы но, гондыр но, ӵушъял но юрттыны ӧз быгатэ, тынад но уз пӧрмы.
— Оло, пӧрмоз ик.
Кечтака кошкиз но, дас минут ортчыса, луд кечлы правозэ мыче ини. Луд кеч тау кариз но паймыса юа:
— Нош кызьы тон быгатӥд?
— Ма, пырисько автоинспекторъёс доры, нош отын — ваньмыз мынам ӵыжы-выжыосы.

°°°

— Вералэ вал, Можгае мынӥсь поезд кошкиз-а ни?
— Вить минутлы беромиды.
— Ой, тау Инмарлы. Мон кемалыгес бере кыли кожасько вал.

°°°

Одӥг воргорон станциын поезд вите. Сиемез потэ ини, нош уксёез ӧвӧл. Артэ ик воргоронъёс сисько. Воргорон доразы лыктыса шуэ:
— Ойдолэ поездэз возьман вискын картаен шудомы.
— Ма, ойдо.
Воргорон огаз кисыяз пыре, мукетаз.
— Вот ведь, картаме доре кельтӥськем. Ярам, мон тӥледыз выль шудонлы дышето.
— Дышеты.
— Ветлы ай шорем няненыд… Нош тон зӥб сое кӧй юдэсэныд… Озьы… Тыныд табере ваньзэ тае козырен — вӧй комокен зйбоно луоз… Туж умой… Эх, мынам одӥг картае но уг тупа… Басьтоно луоз. Ма, ӵапак по­езд но вуиз.
Воргорон вӧен-кӧен нянез басьтэм, ымаз донгем но поездэ пуксем.

°°°

Кышномурт пичи карысь ульча дуртӥ скалзэ валтэ. Автоинспектор солы шуэ:
— Тодӥськоды-а, та пу тротуар вылтӥ пыдын мынӥсьёслы гинэ ветлыны яра.
— Нош тӥ скалэ великен мынэ кожаськоды-а, мар-а?

°°°

«Запорожец» мынэ, ялан тэтча, йыггетэ. Автоинспектор сое дугдытэм:
— Тӥ техосмотр ортчиды-а?
— Бен, тани талонэ.
— Кыӵе талон? Тӥляд машинады ялан тэтча, йыгдым мынэ.
— Осто, Инмаре! Табере вукекъяськыны но, кизьнылыны но уг яра ни.

°°°

Егит гӧгӧр нуназе дас кык часын черклэн сигаз чебер дыдыкен пумиськыны вераськем. Пусъем дырзы ортчиз — дыдык ӧвӧл. Эшшо час ортчиз — ӧвӧл на. Кык час но шуккиз — уг адскы. Вить часын гинэ вуиз.
— Малы такем бер вуид, дыдыке? Тынад Карлудысеныд черкозь вить минут гинэ лобонэд ук.
— Ой, гыдыке, туннэ сыӵе шулдыр куазь, соин ик мон пыдын гинэ лыктоно кариськи.

°°°

Пуны сад-бакчаын музъем копа. Бускель Барбослэсь шораз туж жаляса учкемзэ шӧдыса, со берытскиз но бӧрдыса шуэ:
— Ваньмыз кутскиз кузёелы диван дораз тапочкизэ вайыны дышеме бордысен. Ох, шузи мон!

°°°

— Мар ни вылез дуннеын? — юам мудӥсь шыр.
— Номыр но ӧвӧл. Быдэсак пеймыт уй, — валэктэм лобась шыр.
— Зэм но, тём-тём пеймыт, — соглаш луэм уйсы.

°°°

Шыр нянь турижез лушкаса сюе ватэм но гожтэм: «Татын нянь ватэмын ӧвӧл». Ӵуказеяз отчы лыктэ но выль гожтэмез лыдӟе: «Ӵушъял нянь турижез ӧз басьты».

°°°

Парсь ульчаысь корка пырем но электророзеткаез адӟыса шуэ:
— Кыӵе йӧспӧртэм адями меда татчы парсь нырез шуккем?

°°°

Огпол кикы ӟольгырилэн караз пуззэ киргатэм. Ӝыт айы ӟольгыри но вуэм. Учке но пайме: вань пузъёс огкадесь, нош огез кык-куинь пол­лы бадӟым.
— Так! — айы ӟольгыри мумыез азьын гадьзэ урдэ. — Лык ай татчы матэгес! Учкы, пырак синмам учкы! Иське, ваньмыз со шонер?!
— Мар шонер?
— Эшшо ке мынэсьтым юаськод на! Тонэ ӧрӟиен уртче адӟо, со ик татын мытылэ… Соку кытысь асьме доры ӧрӟи пуз вуиз? А?
— Ӧжытак коть кӧберанэз вала, — мумы ӟольгыри ӟиллетэ гинэ на. — Ӧрӟи шоры гинэ ӧвӧл, куака шоры гинэ но уг учкылӥськы. Кызьы-озьы сыӵе малпан йырад шуккиз?
Айы ӟольгыри эшшо маке черекъяны ымзэ усьтэм ик вал но, малпанъёсыз тугаськыны-пужнӥськыны ӧдъязы: «Кин тодэ, оло, зэмзэ но чик уг пӧя со. Соку та пуз мынэсьтым ке?.. О-о! Map-о?! Будоз, ӧрӟи быдӟа мугоро луоз. Нош синъёсыз но, нырыз но — мынам! Вот соку шуозы: от, ӟольгыри, от, ӧрӟи!»

°°°

Пуке куака кыз йылын, ымаз — сыр. Отчы вуэ ӟичы, зыр кутыса, куакаез шукке, сырзэ басьтэ, сие но азьлань бызе. Куака йырсазяз берытскыса малпаське:
— Паймымон, басняез тазьы вакчиятӥллям-а, мар-а?

°°°

Луд кечпи, ӟичыпи но гондырпи шудонъязы гуэ усиллям. Нунал пуко гуын, кык нунал — потэмзы углуы. Сиемзы потэ ини. Ӟичыпи пичи ке но, кескич ини, шуэ:
— Ойдолэ, кин асьме пӧлын самой пичиез, сое ик сиёмы. Мыным вить толэзь ини.
Луд кечпи шуэ:
— Нош мыным — ньыль толэзь.
Гондырпи гул эн сэргаз султэм:
— Мыным куинь толэзь гинэ ай, но кудды ке дорам матэктӥды ке, озьы утялто — сиён кулэ уз луы ни.

°°°

Куинь куакаос лиспу вылын пуко. Одӥгез ушъяське: скал басьтӥ, кыкетӥез ушъяське: зарни час басьтӥ. Куинетӥез шып пуке, вожъяське.
Ӵуказеяз таос нош ик пумиськизы. Одӥгез кайгыре — скалэз олокытчы луэм, мукетыз куректэ — часэз ышем. Кӧня ке улыса, куинетӥез куака шуэ:
— Ой, дас вить минуттэк час ини. Шаплыгес доре бертоно, скалэз кысконо.

°°°

Одӥг атас мукетызлы шуэ:
— Ойдо лавкае ветлом.
— Малы?
— Гольык курегъёсты учкыны.

°°°

Кионлэн пиез вордскиз. Шумпотэм атай сое ветта.
— Изь, изь, нуные, изь, изь, пурысе. Кинлэн кадь тынад синъёсыд?
— Анаелэн кадь.
— Кинлэн кадь тынад пиньёсыд?
— Атаелэн кадь.
— Кинлэн кадь… тынад… пельёсыд? У-у-у, луд кеч, возьмато мон тыныд!

°°°

Пумисько кык эшъёс.
— Малы сыӵе мылкыдтэм?
— Мынам урбоосы бускельёслэнлы ожмаськон ялӥллям.
— Шумпот ук соку. Ог-огзэс виылозы.
— Э-э, озьы гинэ ке луысал. Мынамъёсыз толон бускельлэсьсэ кык сюрс пала урбооссэ пленэ кутӥллям.

°°°

Ӝог мынӥсь машинаез курег бызьыса кельтэм. Шофёр ӝоглыксэ будэтэм — сутыны быгатымтэ. Курег фермае кожемез бере воргорон дугдытэк чидамтэ ни. Кузёезлэсь, пе, юа:
— Кыӵе-мар тӥляд та курегъёсты?
— Ма, ачид адӟид ук. Со — выль выжы.
— Сӥльзы нош ческыт-а?
— Ӧйтӧд… Марым, огзэ но кутэммы ӧз луы на.

°°°

Кызьпу йылын куака пуке. Чапак та кызьпуэ ик гондыр тубыны кутскем.
— Эй, нюлэс кузё, малы татчы тубиськод?
— Улмо сиыны.
— Ма, та улмопу ӧвӧл ук — кызьпу.
— Созэ мон ачим но тодӥсько. Улмоосы мынам кисыям…

°°°

Сӥзьыл. Кезьыт. Зоре. Ульчаысен кык пыӵъёс пумисько. — Ӧй, кыӵе кезьыт! Мар луоз асьмемын азьланяз?
— Эн сюлмаськы. Тани тросгес уксё люкаломы но — асьмелы пуны басьтом.

°°°

Куинь шыръёс юыны люкаськиллям.
Огез шуэ:
— Ойдолэ быдэн сюмык юом но юмшаны кошком.
— Ум, быдэн кык сюмык юом но — кырӟалом.
Куинетӥез пумит.
— Ойдолэ ай куинь чиндыс лэзёмы но — коӵышез тышканы мыном.

°°°

Писпулэн вай вылаз ӟольгыри пур-пур тамак кыскыса пуке. Вӧзтӥз скал ортче но шуэ, пе:
— Паймод туала улонлы: нокинлэсь но номырлэсь кепыранзы ӧвӧл ни. Сыӵе пичи, нош тамак кыскыны дышем ини. Шораз учкыны возьыт!
— Ачид нош, ачид! — вазе пумитаз ӟольгыри. — Возьыттэм тон! Собыдӟа будэмед ни, нош али ке но лифчиктэк ветлӥськод.

°°°

Кион, кеч но черепаха кунояло. Сиёнзы котьку сямен кылем, нош юонзы бырем. Нюлэс кушысь ларёк, пе, туж кыдёкын. Юэмзы потэ на — мынӥсьӧвӧл. Ма кароно? Кема малпаськемзы бере кион шуэм: «Ойдолэ чӧлтом. Кинлы усёз — со ик мыноз».
Ваньзы соглаш луиллям. Чӧлтонзы черепаха вылэ усем. Ыстӥллям. Час, кык, пе, витё сое — уг вуы. Кион чидамтэ ини. Шуэм: «Мон кемалась ветлысал ни. Кытчы со ышиз-быриз? Оскиськы окты-калтыослы». Кеч но сыче мылкыдзэ верам: «Мон кык пол отчы-татчы бызьылысал ни. Кукъёсыз-а шальтразы солэн? Уг валаськы!» Корказьысен васькыны курадӟись черепаха йыркуръяськемзэс кылыса шуэ: «Трос зулиды ке, воксё но уг мыны…»

°°°

Луд кеч куноысь кудӟыса тэль тыр кырӟаса бертэ. Куаразэ кион кылэм. Пумитаз дасяськем. Мукетыз кион мышласянь матэктэм. Кионъёс матэктыку, кудӟем кеч кыз улэ киргам но умме усем. Таос со вискын ваче жугиськыны кутскиллям, огзэс огзы виылӥллям.
Луд кеч сайкам но адӟе: матаз кык кулэм кионъёс лошъясько. Малпаськыны кутскем. Ваньзэ тодӥсько кадь, шуэ, пе, кызьы сии, кӧня юи, кырӟай-эктй. Тэлетӥ кырӟаса бертэме но таӵе ик син азям. Нош та кионъёсыз ку но кызьы мекалтӥ, созэ воксё уг тодӥськы ни.

°°°

Трамвайын пукисьпесянай вӧзы номыртэм чиед студент султэм. Егит пи пересьлы туж жаль потэм.
— Э-э, пие, пие, мар сокем ӟызы кылид?
— Трос дышетсконо луэ, песяй.
— Осто, тон отличник, дыр.
— Ӧвӧ-ӧл…
Соку песянай студентлэн киысьтыз плащез адӟиз.
— Вай али, пие, плащтэ ке но возё, секыт, дыр.
— Плащ ӧвӧл со, песяй, Сидоров студент. Вот со — зэмзэ но отлич­ник.

°°°

Студент профессорлы шуэ:
— Мон вӧтай, экзаменме «витьлы» сети шуыса. Мар кароно, вӧтэ мед зэмалоз шуыса?
— Ӧжытгес изёно…

°°°

Студент физикая экзамензэ сётэ. Ачиз номырзэ но уг вала. Профес­сор солы юрттон вылысь юа:
— Вералэ коть, кыӵе градусысен ву быректэ?
— Профессор, мон уг тодӥськы, ку со быректэ, но тодӥсько: 40 градусъем дыръяз со водкалы пӧрме.

°°°

Студент лыктэ буфетэ:
— Вае мыным кык сосиска!
Черодын вожъясько:
— У-у, кыӵе узыр!
— Эшшо дас куать вилкадэс вае на.

°°°

Кык студентъёс зорыку кинотеатр азьын шӧдтэк шорысь пумиськизы.
— Кылзы ай, малы тон мынэсьтым плащме дӥсяд?
— Ма, зор улэ выль костюменыд потыны жаль вал!

°°°

Профессор экзаменын студентлэн валэктонэз кельшымтэен зачёткаяз «Осёл» гожтэм. Ӧс сьӧры потыса, студент книжкаяз учкиз но паймыса берен пыриз:
— Профессор эш, тӥ татчы гожтӥськиллямды гинэ, оценка пуктыны вунэтӥллямды ук!

°°°

Лекция дыръя профессор студентлы вазиське:
— Широбоков, бускельдэ сайкаты ай, изе ук!
— Тӥ сое умме уськытӥды ук, асьтэос ик сайкатэ!

°°°

Институтлэн огъяулоннияз ӵукна. Нырысетӥ курсысь студент кеське:
— Пиос, султэ шаплыгес, лекцие беромомы.
Кыкетӥ курсысь пияш шуэ:
— Ой, ум вуттэ ни, дыр, ойдолэ одӥг лекциез изём на.
Куинетӥ курсысь студент будэтэ:
— Оло, сурлы бызьылом?
Ньылетӥ курсысез соглаш ӧвӧл:
— Мар со сур? Ойдолэ водка басьтом!
Вераськонлы пум понӥз витетӥ курсысь студент:
— Шыпыт кариське ай. Коньыез вылӥе куштом но учком: азьпалыныз выллань усиз ке, сур басьтом, гербеныз выллань луиз ке, водка юом, урдэс вылаз султӥз ке, изём, омыре ик кугӟаз ке, дышетскыны мыном.

°°°

Немец кылъя экзаменысь потэм Абдрамов студентлэсь эшъёсыз юало:
— Кыӵе-мар сётӥд?
— Сётӥ ик, лэся.
— Мар сярысь бен юазы?
— Кин созэ тодэ ини. Отын немец кылын юалляськизы ук.

°°°

— Кыӵе меда сямыз выль доцентлэн?
Абдрамов валэктӥз:
— Инмарлы туж оске кадь. Котькуд вераме бере синъёссэ вылӥе ӝутэ но сипыртэ: «Осто, Инмаре! Осто, Инмаре!»

°°°

Одӥгаз аудиториын экзамен мынэ. Билетэзъя мадьыны Абдрамовлэн но черодэз вуиз. Гожъям кагазъёссэ кутӥз но ӝӧк доры вамыштӥз. Профессор паймыса вазе:
— Тӥ лекциосам но, семинаръёсам но ӧд ветлэ. Мон тӥледыз уг тодӥськы.
— Мон но тӥледыз ӧй адӟылы. Ойдолэ тодматскоме, — мынектӥз Аб­драмов.

°°°

Экзамен кутскон азьын Аб­драмов эшъёсыз доры лыктӥз но учебниксэс куре.
— Ма карод соин? Лыдӟыса уд вуы ни.
— Вылтуссэ ке но учко, чылкак дасяськытэк мыныны умой ӧвӧл кадь.

°°°

Абдрамовлэсь вакчи гинэ вероссэ газетэ печатлаллям. Шумпотэменызсо эшъёссэ лю­ кам: кызьы таӵе ӟеч ужез миськытэк? Нырысетӥ сюмык лэземзы бере огез эшсы, пе, шуэ:
— Юомы Абдрамлэн ныры­сетӥ веросэз понна. Лябгес ке но, азьланяз ӟечгес пӧрмытоз, дыр.
Кыкетӥ сюмык лэземзы бере мукетыз эшсы ӝутскем:
— Веросэд, Абдрам, номыр ӧвӧл, мон отысь Толстойлэсь гожъяськон манерзэ но шоди кадь.
Куинетӥ сюмыкез ӝутыкузы, куинетӥ эшсы шуэ:
— Ма, веростэ Толстоен артэ пуктыны но луоно. Мукетсэ сюмыкез таӵе тостэн юизы ни:
— Абдрамовлэн веросэз — со классика. Солэн гожтэмез вӧзын Тол­стой но бездыт адске.
Соку абдрам Абдрамов чидамтэ ни, синвуаськыса ик быдӟым писательлы дурбасьтэм:
— Эшъёс, ма, Толстой но урод уг гожъяськы вал.

°°°

Сессия дыръя удмурт литературая экзаменын одӥг произведенилэсь нимзэ тодымтэез понна Абдрамовез доцент пыкылэ:
— Кылзы ай, Абдрамов. «Адямилэн чеберез» кылдэ «Вордскем палъёсын», берты вал гуртад, «Йыбыртты музъемлы» но шу: «Кылисько тонэн». Абдрамов валаз, дышетӥсь вераназ удмурт романъёслэсь, повестьёслэсь нимъёссэс пыртӥз шуыса. Ачиз но, вань тодон-валанзэ пызьыртыса, произведениослэн нимъёсынызы герӟаса валэктӥз:
— Зэм ик но, малы мыным таӵе «Секыт зӥбет» «Арлэн кутсконаз» ик, куке сокем «Улэм потэ» «Лудӟи шур дурын». «Тулкымлы пумит» мынытозь, «Дорам» берто ай но «Курлам нимме» выльысь данэ потто.
Дышетӥсь Абдрамовлэсь амало луэмзэ дунъяз но умой оценка пуктӥз.

°°°

Профессор студентлы шуэ:
— Эн сюлэмшугъяське. Экзамен — со театр кадь. Тӥ — актёр, мон — учкись.
— Профессор, нош актёрлы суфлёрез ӧтьыны луоз-а?

°°°

Профессор студенткалэсь юа:
— Вералэ ай, «яратӥсько» глагол вуоно дырын кызьы луоз?
— Яратӥсько — бызё.

°°°

Ассистент профессорлы ивортэ:
— Али гинэ роддомысь жингыртӥзы: тӥляд нылпиды вордскем.
Профессор книга вылысь синъёссэ воштытэк вазе:
— Мынам дыры ӧвӧл, вералэ со сярысь кышноелы.

°°°

Ӟуч, бигер но удмурт йӧл шедьтӥллям. Кинлы нырысь ик сое юоно — куспазы даллашыны кутскиллям. Ӟуч, пе, шуэ:
— Ну, та сиёнэз тӥляд кызьы коть нимало?
Удмурт шуэ:
— Йӧл.
Бигер вазе:
— Сыт.
Ӟуч соку кувшинэз кутэм но верам:
— Ты уже ел, ты уже сыт, я и выпью молоко.
Нырысь ик кутскем но — пыдсозяз юэм.

°°°

Удмуртэз, бигерез, чувашез но ӟучез поездэ пуктӥллям но шуиллям:
— Вуоно станциын горшок зарни вите сое, кинлэсь нимзэ поезд куара уз поттылы.
Ярам. Поезд вырӟем. Кутсконаз ик паровоз парзэ шокчем:
— Чув-чув-чуваш-чув-ваш!
— Э, тонэ ук поттылӥз! — капчияк шуиллям эшъёс, чуваш шоры учкыса. Зарни понна нюръяськонысь одӥгез мурт палдӥз.
Табере поезд ӝоглыксэ будэтэм но питранъёсыз йыгаськыны кутскиллям:
— Та-та, та-та, та-тарин, та-тарин, татарин!
Битер но нюръяськонысь пештэм.
Азьланяз поезд мукет куараос сётылымтэ ни. Удмурт шумпотэ: зарниен гӧршокез ӟучен шори люкозы. Но станцие вуон азьын паровоз гу­док сётэм.
— Ту-у, ту-у-у! Удму-урт!
Ма карод, зарни ӧз донгиськы, ныр ултӥ ортчиз. Табере паровоз стан­цие дугдэ ини. Нош ик парзэ лэзе: — Чусь, чусь — ӟуч, ӟуч.
Зуч вагонысь потэм но зарниез аслыз карем.

°°°

Инмар выжыысь кык пиосмуртьёс, пе, верасько:
— Кылзы ай, тон — профессор, мон — профессор. Ойдо Абрамлы но кандидат ке но луыны юрттомы.
Кык битер воргоронъёс лабырто:
— Тыныд из юрт ӝутӥм, мон дворецын улӥсько. Ойдо Ибрагимлы но айбат корка пуктыны юрттом.
Кык удмурт пиос бӧтьырто:
— Тон но пытсэтсьӧрын вал ни, мон но решётка сьӧры сюрылӥ. Ойдо Ладьмерез но пукытом.

°°°

Пуке, пе, удмурт ӟус вылын но ялан бычыръяське. Дораз одӥг мурт лыктэм но юа:
— Мар сыӵе шуген пукиськод кадь?
— Тани пукси ай но — кортӵог мычиськемын вылэм.
— Соку малы мукет азе уд пуксиськы? Ӟус кузь ук, артэ нокин но уг пук.
— Ма, оло, марым… кортӵоглы но дышо ай.

°°°

Адын кӧня ке пуртыосын тэкит пӧзе. Котькуд выжы калык нимаз пуртыын. Ӟучъёслэн пуртызы котырын одӥг чёрт пуке но потыны турттӥсь муртлэн кымесаз турчикоен тарк гинэ сётэ. Бигеръёслэн пурты котыразы дас чёртъёс сыло.
— Малы тӥ татын сомында? — юало соослэсь.
— О-о, та бигеръёс сыӵеесь — огез потӥз ке, ваньзэ бӧрсяз кыскоз.
Удмуртьёслэн пуртызы дорын одйг чёрт но ӧвӧл.
— Нош малы таоссэ нокин уг возьма?— юало, пе, чёртъёслэсь.
— Ма, со сыӵе калык: огез потыны турттэ ке, мукетъёсыз пыдтӥз кыскыса ик берен тэкитэ выйто.

°°°

Ӟучез, бигерез но удмуртэз йыртэмамзы понна виыны судъяллям. Но берпуметӥ куронзэс санэ басьтоно кариськиллям, асьсэлы бырйыны сётӥллям: ошоно-а, электропукон вылэ пуктоно-а яке гильотинаен йырзэс ӵогоно-а? Ӟуч электропуконэз быръем. Пуктӥллям тае отчы, нош элек­тротыл ӧвӧл. Сыӵе йылол вань, йырвандӥсез манн ке сэрен быдтыны уг ке луы — озьыен, Инмар сое дораз басьтыны пумит, соин ик сое улэп кельто. Кылем улонзэ пытсэт сьӧрын ортчытыны ӟучез лэзиллям. Бигер вӧзтӥ ортчыкуз, таиз шуэм:
— Электротыл ӧвӧл, пуконэз бырйы.
Бигерен но озьы ик луэм: пуксем со, нош ток уг шуккы. Решётка сьӧры улэпкын ик лэзиллям. Удмурт дортӥ ортчыкуз, бигер но вазем:
— Электротыл ӧвӧл.
— Ну, мае бырйид? — юало ни, пе, удмуртлэсь.
— Ма, марым, электроды, пе, ӧвӧл но, ошоды-а, мар-а ни, — лад-лад шуэ соиз.

°°°

Удмурт пиез космосэ, инсьӧры ыстӥллям. Лобе, пе, та ракета пушкын. Нунал лоба — иворез ӧвӧл, кык нунал лоба — иворез ӧвӧл. Арня лобам ини. Музъемысен солы вазьыло: «Ӧрӟи, ӧрӟи! Мон — Музъем. Вазиськы! Ӧрӟи! Ӧрӟи! Мон — Музъем. Вазиськы!» Пумитазы кыл-куара поттӥсь ӧвӧл. Лумбыт озьы вазьыло. Толэзь ортчыса, «Ӧрӟи, ӧрӟи» шуэмлы пумит инсьӧрысь куара вуэ:
— Ӧрӟи ӧвӧл мон, марым, Корепанов! Мынам доре бертэме потэ.

°°°

Кык воргоронъёс Москвае мынӥллям но — туж сиемзы потыны кутскем. Адӟо — ресторан. Пырыны медо вылэм но — та, пе, кунгож сьӧрысь куноослы гинэ. Учко: адямиос лыкто но кунзылэсь нимзэ вераса пыро.
Огез лыктэ, вазе: «Уругвай». Мукетыз: «Парагвай». Та воргоронъёс но вордскем гуртьёссэс верано кариськиллям. Огез лыктэ: «Марым, Карамбай». Мукетыз шуэ: «Марым, Лудорвай».
Пыриллям но сиськиллям.

°°°

Удмурт студент эшезлэсь юа:
— Кызьы-о ӟуч сямен гожтоно «серекъяськод» кылэз? Смеёшша яке смеёсса?
Эшез валэктэ:
— Уг тодӥськы. Уд валаськы ке, мукет кылэз кут. Кокочешь яке кикикаешь…

°°°

Одӥг воргорон ураме потэм, пе. Ма, оген мӧзмыт ук. Кышномуртэн тодматскем, дораз куное ӧтем. Пукиллям, кӧня ке сюмык юиллям но, кышномурт, пе, шуэ: «Ойдо диван вылад коня ке шутэтском». Минут но ортчымтэ — воргорон соргетэ ини. Куноез солэн кӧтурдэсаз гырпумыныз мырӟем. Соиз куаляк луыса сайкам:
— А? Мар? Хоккей кутске-а, мар-а?
Нош икумме усем. Кӧня ке улыса, кышномурт йыркурен султэм, балконэ потэм но киоссэ вӧлъяса кеськем:
— Та дунне вылын вань ик-а, ӧвӧл-а одӥг ке но воргорон?
Улӥысь, куакъёс пӧлысь, пиосмуртлэн куараез кылӥськем:
— Map-о? Марым… тынад юонэд вань-а, мар-а?

°°°

Одӥг кышномуртлэн пиез выль кышноеныз городысь бертӥз, нош соиз ӟуч вылэм. Анайзы ӟуч сямен шуген вераське. Мунчое потыны дасяськись пиезлэсь юа:
— Мед сиськоз шуыса, кенлы кызьы-о ӟуч сямен верано?
— Словарьысь учкы, — шуиз соиз.
Анаймурт кияз кыллюкам кутӥз, отын гожтэмын: «кулэ — надо», «сиськыны — есть». Ныллы «ела» шуоно, дыр. Трос мудронъяськыса ӧз улы, кенэзлы вазиськыса, вакчияк гинэ шуиз:
— Надо ела…
— Чё? — юаз кенэз.
— Надо ела, — нош ик вераз анай.
Вожез потыса, кензы дорысьтызы ури-бери кошкиз. Ӝоген пиез но мунчоысь потӥз. Юа:
— Кытын-о кышное?
— Надо ела шуи но — кошкиз.

°°°

Тодмо удмурт кылбурчимы Д. А. Яшин огпол серемес кылбур гожтэм. Одӥг гуртысь одйг тракторист, пе, трактореныз юыса ворттылыкуз, сюрес урдсы бекмылям. Со понна сое ас чотаз машиназэ тупатытӥллям, руль сьӧрысь улляллям. Кылбурчи та гожтэмаз гурт нимез йырысьтыз малпаса пыртэм, трактористэзлы маскара ним но малпам. Кылбур по­тэм бере Д. Яшинлы ӵапак со гуртысь гожтэт вуэм:
— Ма, Даниил Александрович, зэм но сыӵе учыр вал, уг танӥськы, юыса бекмыляй вал, но со дырысен 15 ар ортчиз ини. Тракторме но тупатӥ, юэмлэсь но эмъяськи ини, али выльысь руль сьӧрын ворттылйсько. Малы ортчемзэ нош ик тодэ вайытӥды на? Калык но вунэтӥз ини со учыр сярысь, табере тодаз ваиз но монэ выльысь серекъя.

°°°

Уди гуртысь удмурт песянай лавкае басьяськыны пыриз. Вузкарисез — егит ӟуч нылаш. Мукет басьяськисьлы кеньыр мерта. Песянайлэн витемез ӧз поты, юано кожаз:
— Гыдыкое, одӥг гинэ юанэ вань. Али дыре сакыр кӧня манетэн сылэ?
Вузкарись юанзэ ӧз вала, лек уретӥз:
— Уди, бабушка, не мешай!
Песянай паймыса:
— Осто, Инмаре! Ма, кытысь-о та тодэ, мон Удиысь шуыса.

°°°

Тодмо удмурт кылбурчилы Владимир Романовлы «Дась лу!» газетын ужакуз оскиллям умой дышетскисьёсты «Артек» пионерлагере келяны. Вуэм берады, пе, комсомоллэн обкомаз телеграмма шукке, ми татын медам сюлмаське.
Кӧня ке нунал ортчыса, обкоме телеграмма вуэ. Но ерпечка кылбурчи сое удмурт сямен гожтэм: «Вуимы. Ваньмызумой». Тае басьтыса, комсомолэн кивалтӥсьёс шулӟектӥллям: мар луиз? Быдэс обкомын нокин но удмурт кылэз уг вала. Куинь-ньыль нунал ортчыса гинэ буйгаллям. Соослы телеграммалэсь пуштроссэ ӟуч кылэ берыктӥсь мурт шедем угось — отысь ик техничка. Нош тӥ шуиськоды: кивалтонниосын удмуртъёс уг ужало.

°°°

Байкал-Амур магистралез лэсьтон вакытэ партилэн Удмурт шаерысь идеологиен кивалтӥсез писательёслэн кенешазы пыкылыны ӧдъям:
— Быдэс кунмы БАМ лэсьтонэн данъяське. Быдӟым чугун сюрес сярысь нуналлы быдэ радио но телевидение верало, газетъёс, журналъёс гожъяло. Ӟуч писательёс книгаос но поттыло ини. Кырӟанъёсын но кылӥське: БАМ, БАМ, БАМ! Удмурт писательёс гинэ бабо.
Соку одӥгез критик ерпечкаяськыса шуэм:
— Ма, кызьы изиськомы? Удмурт писательёс та сярысь котькинлэсь азьло гожъяны кутскизы. Михаил Коновалов нимаз книгаен «Вурысо бам» романзэ поттӥз. Нош Аркадий Клабуков покчиослы «Палбам» по­ весть гожтӥз.
Талы пумит кивалтӥсь нокыӵе ӧз кариськы. Меӵкытӥз гинэ:
— Ма, тодӥсько, тодӥсько… Но со туж ӧжыт ук.

°°°

Удмуртиысь калык писатель Михаил Лямин очеркъёсаз туж данъяськыса гожъяз ас калыкезлы котькыӵе ужез оскемзы сярысь. Таин валче огпол солы таӵе пыӵкылон, эшлыко шарж гожтӥллям:
«Сылӥсько выль улыно-вылыно юрт лэсьтон дорын. Секыт бетонэз, носилкаосы тырыса, укмысэтӥ этаже чырткем тубтыло удмурт кышномуртъёс, ог дасо кирпичъёсты, огкутскемен ӝутыса, отчы ик чупрес тубыто удмурт воргоронъёс. Озьыен, ӝоген та юртын корка пырон кырӟанъёс жингыралозы. Сюлэм шумпотонэн пачыла, удмуртъёслы но таӵе бадӟым ужез ос ко шуыса».

°°°

Ижкарысь сиськонние пырид ке, пӧрасьёсын ӟуч сямен вераськыны быгатод, сиён сётъясьёсын — бигер сямен. Нош тусьты-пуньы миськон, кылем-мылемъёсты утялтон дорын шӧдӥськод ини вордскем шаерад улэмдэ: татын кӧтькуд ужасен удмурт кылын огкыл шедьтод.

°°°

Петыр агай кема гинэ сельсоветлэн тӧроез вал. Со, йырзэ урдыса, кӧтсэ мычыса, нокинэ адӟытэк ветлыны дышем. Ужез алама мынэмысь, сое интыысьтыз мозмытӥллям. Кӧня ке улыса, Петырез сюанэ ӧтись шедиз. Ох, и шулдыръяськиз отын Петыр агай: такмакъёс кырӟаз, пыдпыдэсыз ӝуатозь эктӥз, егитъёслы уно шуныт кылъёс вераз. Лӧпшо Педунь со шоры учкиз-учкиз но ӧз чида:
— Эх, кыӵе ӟеч адями вылэм та Петыр, нош кӧня арзэ токма ортчытӥз…

°°°

Москваысь ресторанын кык удмурт студентъёс пуко. Нош доразы официантъёс уг лыкто, артэ ӝӧкъёс сьӧрын пукись кунгож сьӧрысь вуэм куноосты утялто. Студентъёслы огпӧртэм пукыны акыльтӥз. Огез ӧз чида, официантэз ӧтиз но эшез шоры возьматэ:
— Та кыдёкысь кунгожсьӧр Удмурт шаерысь куно. Мон солэн переводчикез, ӟуч кылэ берыктӥсез. Сюдэ вал милемыз.
Официант соку ик блокнотсэ поттӥз но гожъяны дасяськиз.
Огез студент мукетызлэсь ӟуч сямен юа, мар со сиёз шуыса, кыкетӥез солы удмурт кылын валэктэ:
— Кыстыбей, тыкмачен шыд, сӥль…
Переводчик берыктэ:
— Салат, зразы, форшмак…
Кескич удмурт пиос озьы тӥни кӧтсэс кышъязы.

°°°

Кавказ гурезьёсысь воргорон но удмурт пияш Москваысен эшъясь-киллям. Умой улйллям, сииллям-юиллям. Нотани одӥгнуналэ кисыоссэс берыкъяло — одӥг коньызы но ӧвӧл ни. Соку гурезь ӧрӟипи шуэ:
— Ойдо базаре мыном.
Базарысен со ачиз кадь ик «сьӧд куакаос» доры лыктэ, ас кылыныз маке вераське но удмурт пияшез ресторанэ ӧте:
— Тани, кӧня ке уксё сётӥзы.
— Тодмоосыд вал-а, мар-а? — пайме удмурт воргорон.
— Ӧвӧл. Но соос ми палась. Тӥляд удмуртъёсты ке али пумитамы шедьысалзы, тыныд уксё ӧз сётысалзы шат?
Асьме адями мар шуыны паймыса малпаськем но шуэ:
— Нош кӧня уксё сётӥзы?
— Дас сюрс манет!— ӧрӟи йырзэ урдэ.
— А милям удмуртъёс пумиськысалзы ке, соос ичизэ 50 сюрс сётысалзы.
Ӧрӟи аэродром картуззэ куштыса ик йырберзэ кормаз:
— Шырыт ик вылэм тӥляд калыкты. Мыным нотросгес куроно вылэм.

°°°

Ижкарысен Тюмене лобись самолётын кудӟем ӟуч воргорон сайкам но юа:
— Кытчы лобиськомы?
Солы валэкто.
Кӧня ке улыса, со нош ик сайка но юа:
— Кытчы лобиськом?
Солы выльысь валэкто. Куинь пол, ньыль пол озьы сайкаллямез бере вӧзаз пукись кыӵе ке армянин ӧз чида ни:
— Тюмене лобиськом, Тюмене! Тон Шарканэ лобиськод кожад-а?
Номыр сыӵезэ-таӵезэ малпатэк верам маке самолётысь калыклэн сюлэмаз шуныттылгизьы кенжытӥз: пичи гинэ Удмурт шаерлэсь Шаркан сэрегзэ кыдёкысь палэнысь мурт гинэ но тодэ вылэм.

°°°

Артэ пуконъёсын самолётын удмурт но украинец лобӟо. Украин воргорон ӟенеликсэ поттӥз но одӥг сюмык бекыртӥз. Удмурт ӧз чида:
— Map-о со тынад?
— Горилка.
— Вай эскеро.
Соиз выль тодмоезлы одӥг сюмык лэзем. Шуккиськыса ик юиллям. Табере украин пи поттэ сиёнзэ. Асьме воргорон ӧз чида ни:
— Map-о со?
— Шпиг. Чынатэм кӧй.
— Вай эскеро.
Кӧйзэ пичияк вандэм но сётэм. Табере асьме воргоронлэн сиемез потэм ини. Сумкаысьтыз сиён-юонзэ поттэм. Артэ пукисез, пе, шуэ:
— Мар сыӵ е сииськод?
— Виртырем но перепеч.
— Вай оскалто.
— Ма, мар сое оскалтонэз. Виртырем кадь ик виртырем, перепеч кадь ик перепеч.

°°°

Кызетӥ даурысь кызь одӥгетӥ дауре сусыпу боды вылэ пыкьяськыса выжемъёслэн верамзыя, Лӧпшо Педуньлы медоын ветлыны акыльтэм но кыӵе ке гуртысь бызьытэк кылем ныл вылэ пыртосэ пырем. Кузпалзэ со бӧрсьысь вить ныл вордытэм. Куатетӥез нунызы вордӥськон азьын бускельёсыз солэсь паймысагес но, жалясагес но юаллям:
— Педунь агай, куатетӥез нуныды но ныл луоно, шуо ук гуртоосмы. Малы сомында нылъёс тыньщ?
Педунь, пурысьтаны кутскем туш но мыйык пыртӥз мыняса, тазьы вазем:
— Тырмыт ӧз луэ ке нылъёс, пуклёосты-а ӟыгыръялозы пиос?

°°°

2040-тй ар. Пиезлэн пиеныз песятай вераське.
— Песятай, нош малы тынад пыдад сомында вурысъёс?
— О-о, кемалась ни вал со, пие. Сӥль понна черодын сылӥськом но…
— Песятай, нош мар со — сйль?!

°°°

Борӟемен мынӥсьлэн валэз ӵемтӥз но, адями усиз. Султӥз, курткиськиз но шуэ:
— Эх, тодысал ке татчы усёнме, одно ик куро вальысал.
Валэз но соглаш кариське:
— Шонер. Одӥг дугдэмен сиськысалмы но.

°°°

Лавка азе валэн уробоен воргорон дугдӥз но вузкарисьлэсь юа:
— Ӧвӧл-а тӥляд вожпыръем пиялаё очкиосты?
— Малы?
— Валэлы дэмӟытоно вал. Ӵуж куроез сётыку но вож турын сиисько мед кожалоз.

°°°

Куинь батыръёс кунзэс тушмонлэсь утьыны вал вылын мыно. Азьпалазы туж чебер нылмурт кемдӥз. Огез батыр шуэ эшъёсызлы:
— Тӥ котьма каре, нош мон та нылмуртэн кылё.
Кык батыръёс тушмонэз жугыны вал вылын мыно. Азьпалазы нош ик чебер нылмурт потӥз. Кыкетӥез батыр шуэ:
— Тон котьма кар, нош мон та нылмуртэн кылё. Пересь батыр огназ кылиз. Солэн ужпиез тыл кадь, пыд йылаз сылыны уг чида. Ярам, малпа батыр, тушмонъёсты огнам но жуго, вордскем шаерме утё. Чап соку азязы чебер нылмурт потйз. Соку ужпи батырлы вазиське:
— Тон котьма кар, нош мон татчы кылисько.

°°°

Кык ожгарчиос сьӧразы уиськисьёслэсь пегӟо. Валъёссы чырткемесь ке но, уиськисьёс но ӟеч сюдэм валъёс вылын. Тани-тани сутозы ини. Нюлэскы пырыса, ожгарчиос выллань тэтчизы, пужым улвай борды кырмиськизы. Уиськисьёс соосты ӧз адӟе, ултӥзы ик лобыштыса ортчизы.
— Иван, — шуэ огез ожгарчи мукетызлы. — Тыныд секыт-а?
Ӧвӧл, капчи.
— Нош мыным секыт.
Учкем эшез уллань но валэктэ:
— Ма, тон пыддэ энер лёгетысь поттыны вунэтэмед но.

°°°

— Пие, ку тон математикаен «кыктэ» тупатод ини?
— Уг тодйськы, анай. Дышетӥсьмы журналэныз ноку уг люкиськылы но.

°°°

— Кытын вал тон, пие?
— Мон Микол дорын вал, уроксэ дасяны юрттӥ.
— Ма, со «витьлы» гинэ дышетске ук.
— Бен мон солы аслэсьтым урокме дасяны юрттӥ.

°°°

Дышетскись пияш машинаез дугдытыса шуэ:
— Нуэ монэ школа дорозямы.
— Э-э, пиёке, мон мукет пала мынӥсько.
— Озьы ке, туж умой. Мон туннэлы урокъёсме ӧй дася вал.

°°°

Пияш атаезлэсь сюлворыса ик куре:
— Атай, вордскем нуналам барабан басьты, ява.
— Тон соин пельме урмытод ук.
— Уг, мон сое тон изьыку гинэ кокало.

°°°

Судын эскериське кышноен картъёслэн люкиськонзы сярысь уж. Соослэн нылпизылэсьсудъясь юа, мумы-бубыосыз пӧлысь кудӥныз улыны малпа меда со.
— Кин кие телевизор кылёз, соин ик уло, — одӥг но ӝегатскытэк вераз пияш.

°°°

Пичи Коля чебересь сяськаосты адӟиз но юаз:
— Песянай, нош та сяськаослэн кызьы меда нимзы?
— Гырлысяська.
— Тӧл пельтӥз ке, соос жингыртозы-а?

°°°

— Коля, шунды шоры эн учкы — синъёсыд висьыны кутскозы.
— Соку мон тӧл шоры учко.
— Со уг адскы ук!
— Нош мон адӟисько.
— Кыӵе бен со?
— Умой, небыт!

°°°

Коля анайзэ выль горд дэремен дыръяз адӟиз.
— Ой, мемей, кыӵе чебер ук тон! Ӵапак пожарной машина кадь!

°°°

Атаез — пиезлы:
— Авраам Линкольн тынад арлыдад нуналлы быдэ 19 иськеме школае пыдын ветлӥз. Нош тон ӝыны иськеме мыныны но машина куриськод.
— Атай, Авраам Линкольн тынад арлыдад Америкалэн азьмуртэз вал ини. Нош тон?

°°°

Куать аресъем Олёш учке, кызьы атаез укно наличникъёсты буяны пагӟа кузя тубе.
— Вот, пие, будӥд ке, тон атаедлы юрттыны быгатод ни.
— Ма, нэнэ, мон будытозь но атай буяса уз быдты-а?

°°°

Ньыль аресъем Аркаш анаезлэсь кампет куре. Соиз уг сёты.
— Нэнэ, тон мынэсьтым ӧд кылзӥськы ке, али ик е куто.

°°°

Куинь аресъем Максим анаеныз ӵош шутэтскон юртэ ветлӥз.
— Максим, мар-о тыныд отын тужгес кельшиз: нюлэс, шур яке тымет?
— Нэнэлэн эшъёсыз.

°°°

Дышетӥсь пиналъёслы огвыллем валатонэн кылъёс сярысь маде. Собере валамзэс эскерон вылысь юаз:
— Пиналъёс, ма огазея та кылъёсты: вордӥськон, пуксён, кӧснунал…
— Нунал нимъёс!
— Шонер. «Жигули», «Мерседес», «Москвич»?..
— Машинаос!
— Шонер. Смирнов, Петров?
— Водка!

°°°

Одӥг кышномурт эшезлы шуэ:
— Аслым нылпи юртысь куинь толэзьем англи нылэз басьтыны турттӥсько ай.
— Мар карод соин?
— Вераськыны кутскиз ке, солэсь англи кыллы дышетско.

°°°

Пиез атаезлэсь юа:
— Атай, Катя шуэ, сое, пе, кубиста пушкысь шедьтӥллям.
— Озьы но, дыр.
— Нош Колиез аист ваем.
— Валамон.
— Монэ но аист ваиз-а?
— Аист, аист. Со аистлэн Петыр нимыз, артэ гуртын улэ. Мон сое сурантэм понна соку ик пус пуктӥ.
— Зэм-а?
— Зэм. Уд оскиськы ке, ветлыса учкы. Али но нырыз кырыж на.

°°°

— Атай, мынам тынэсьтыд куронэ вань.
— Только вакчияк но валамон, дыры ӧвӧл.
— Сю манет!

°°°

Пичи пияш школаысь бертэ. Анай-атаез юало:
— Мар ваиськод ни тон туннэ?
— «Ньыль»!
— Нош малы «вить» ӧвӧл?
— Ма, ньыль урокмы сяна ӧй вал туннэ.

°°°

Дышетӥсь урокын пияшез ушъя:
— Вовик — туж умой эш. Коли вуэ выйыку, сое шурысь поттӥз. Вови, мар сярысь малпад тон соку?
— Коли мынам трусикеным пылаське вал ук.

°°°

— Вови, мар-отынад сочиненияд туж трос буш интыос кельтылэмын?
— Мариванна, со — рекламалы инты.

°°°

— Перевощиков, кыӵе группае пыре очковой кый?
— Синтэмъёслэн группаязы, дыр, Мариванна.

°°°

Пияшез дышетӥсь индылэ:
— Мон тынад анаед интыын луысал ке…
— Мон — соглаш, — дышетӥсез куспетӥ кариз пияш. — Бертыса атаелы верало ай, оло, со но соглаш кариськоз.

°°°

Школаын дышетскись юа дышетӥсьлэсь:
— Мариванна, нош мар кароно, будэм бере номыр но ужано медаз луы шуыса?
— О, со понна дышетсконо, дышетсконо но дышетсконо.

°°°

— Анай, нош толалтэ улмоос будо-а?
— Уг, нылы, толалтэ соослэн дунзы гинэ будэ.

°°°

Милиционер пичи пилэсь юа:
— Тынад атаед аракы пӧзьтэ-а?
— Уг, со аракыез кезьытэн ик юэ.

°°°

Дышетскись удмурт кылъя дорысь ужзэ лэсьтэ.
— Атай, нош кыӵе дырын верамын та предложение: «Анай бускеленымы телефон пыр вераське».
— О-о, пие, со юнме ортчытэм дыр луэ.

°°°

Пичи пияш анаезлэсь юа:
— Анай, али нуназе шор-а ини?
— Ӧвӧл на, али ӵапак дас одӥг час.
— Малы меда мынам коты быдэс часлы вазьгес сюма?

°°°

Анай ӝыт пал пизэ куаретэ.
— Дышетӥсед нош ик тон вылэ жожтӥське, малы тон, пие, астэ ӟеч возьыны уд быгатӥськы?
— Со юнме жожтӥське, анай. Мон куинь нунал школае ӧй ветлы ни.

°°°

Дышетӥсь пиналъёсты косӥз быдэн вить глаголэн кык предложение гожтыны.
Одӥгез дышетскись султӥз но гожтэмзэ лыдӟе:
— Нэнэ сиён пӧзьтэ, дӥськут миське, гладить каре, вуриське, керттӥське. Атай сиське, юэ, тамак кыске, лыдӟиське но пань-пань кӧлэ.

°°°

Ньыль аресъем Тани туж чупрес будэ, кырӟаны-вераны яратэ, ялан бӧтьыртэ — ымыз ик уг подӥськы.
— Тани, тон туж трос зулиськод, ымыд уг жадьы-а? — юало солэсь.
— Уг ке супыльтӥськы, бӧрдэме потэ.

°°°

Ӝыт пал пеймыт кариськиз, гудыръя. Вить аресъем Олег корказьын сылэ, гольык пыд, вылаз трусикен но тол изьыен. Пельёсыз тач-тач пытсамын.
— Мар сыӵе дӥсяськид, пие? — юа ужысь бертӥсь анаез.
— Зорлэсь ватскисько.

°°°

Нырысетӥ классын дышетскисьлэсь юало:
— Васи, тон крезьгурез яратӥськод-а?
— Туж зол.
— Нош кыӵеез тыныд кельше?
— Урок быремез ивортӥсь гырлы куара.

°°°

— Паймод та Колилы. Сыӵе пичи мурт быдэс пыжем ӵӧжез огпол пуксемаз сиыса быдтэм.
— Мон атайлэн верамезъя лэсьтӥ. Со котьку шуэ: «Мар лэсьтэмед луэ али, бӧрысьлы эн кельты».

°°°

Пичи Вови портфеляз бугыръяськиз но телевизор азьын пукись атаез доры матэктӥз:
— Атай, тырмоз ини телевизор учкыны, толон лэсьтэм задачаедлы но дышетӥсьмы «куинь» гинэ пуктӥз. Туннэзэ коть умойгес лэсьты.

°°°

Школаысь вуыса, Ондӥ ушъяське:
— Атай, туннэ куасэн ӵошатсконын мон быдэс классмес азьпалтӥ.
— Усто, пие, усто, азьланяз но озьы ик тыршы.
— Ма, котьку но вакчигес сюресэз шедьтыны уг луы ук, дышетӥсьмы учке.

°°°

Пичи Олёш школаысь бертӥз но шыд лым ӟузьылӥсь бубизлэсь юа:
— Атай, кытысь-о тодмо, Музъеммы туп кадь питрес шуыса?
— Вот тыныд! Ма, быдэс ар дышетскыса, тӥледлы огпол но глобусэз оз возьматъялэ на шат?

°°°

Пичи нылаш ӝӧк сьӧрын пуке но гожъяське.
— Map-о, нылоке, лэсьтӥськод? — юа солэсь анаез.
— Манилы гожтэт гожтӥсько.
— Бен тон гожъяськыны уд быгатӥськы на ук?
— Ӵок, Мани но лыдӟыны уг быгаты на.

°°°

Пичи пияш кенакезлы чырмыт вазе:
— Тау, кенак, кузьымедлы.
— Ойдо, пие, номыр понна.
— Номыр понна но, анае косӥз ук.

°°°

Колилэсь дышетӥсь юа:
— Коли, вера ай, адямилэн кыӵе пиньёсыз бергес пото?
— Корт пиньёсыз…

°°°

— Нэнэ, мон шуре пыласькыны мыном-а?
— Уг яра, выёд.
— Нош атай пылаське ук.
— Со страховать каремын.

°°°

Анаез пизэ куаретэ:
— Коня пол мон тыныд верай ини: эн шуды Сергеен, со алама, урод пияш.
— Соку, нэнэ, мон ураме пото. Сергей монэн мед шудоз, мон — умой пи.

°°°

Атай пиезлы кувшин сётэм но, йӧгуысь йӧлвыл поттыны косыкуз, берпалазеэн йӧттэм.
— Марлы тон сое жугид? — паймиз бускельзы.
— Кувшинэз медаз пильы шуыса.
— Ма, со ӧз пильы на ук, пилиз ке — сальылод.
— Пилем бераз бер луоз ини.

°°°

— Map-о тон сыӵе луид али, Кими? Вань кампетэз сиыса быдтэмед, сузэред сярысь ӧд но малпа-а?
— Ой, нэнэ, мон быдтытозям со сярысь гинэ малпаса улӥ, корка ме­даз пыры вал шуыса.

°°°

Азбарын пичи Олёш зар бӧрдыны кутскиз. Анаез бызьыса потэ:
— Мар луиз?
— Атас пыд вылам лёгиськиз.
— Э-э, пие, атас — со вал ӧвӧл, вӧсь уз кары.
— О-о, али вӧсь ӧз луы но, пересьмем берам пыды висьыны кутскоз ук ай.

°°°

Пичи Яши Нюра апаез доры куное ветлӥз. Апаез сое соку гинэ сылалтэм огречен сюдӥз. Келыиизы огречъёс пияшлы.
— Нош тйляд бакчаяды огречты вань-а? — юаз Нюрапай.
— Вань но, сылалтэмез уг буды.

°°°

— Я, нылы, Катяпаед кошке ини. Мар шуоно?
— Тау Инмарлы.

°°°

Ӵукна анай адӟиз: пиез кырсь пыдъёсыныз ик валесын изем.
— Кызьы возьытэд ӧвӧл, пыддэ миськытэк чылкыт валесэ выдыны?
— Мон миськи вал, только уин нӧдын шудыса вӧтай, — кескич пальыштӥз пияш.

°°°

Пиос луоын шудо.
— Ойдо анай-атаен шудомы, — шуэ пичи ныл.
— Ойдо, — соглаш луэ пичи пи.
— Соку тон сиён дасяны кутскы.
— Нош тон?
— Мон киное ветло.

°°°

Дышетӥсь урокын шуэ:
— Таӵе веран вань: кин огпол ӵуштаське, со тыллэсь кышка. Кин та выллем веранъёсты тодэ на?
— Кинэ огпол миськизы, со вулэсь кышка, — соку ик валэктӥз Мача Миша.

°°°

— Мон тон быдӟа дыръям уг пӧялляськиськы на вал, — валэктэ нунокезлы песятай.
— Нош ку пӧяськыны кутскид?— юа нунокез.

°°°

Атаез пиезлы нырысетӥ класса мыныны выль портфель басьтӥз.
— Пие, татын нуналлы быдэ «витьёс» гинэ нуллы, ява.
— Ярам, атай. Но кытын мон книгаосме нуллом?

°°°

— Пие, мон тыныд выль учебник басьтӥ. Тон сое эн сурыкмыты, ява?
— Ярам, анай. Мон со борды ар ӵоже уг кутскылы.

°°°

Пиналъёс нылпи садын верасько:
— Милям семьяямы ми сузэреным кык кузя, кыкмылэн но нимаз комнатамы вань.
— Нош ми куинь вынъёс, котькудмылэн великмы вань.
— Нош ми, нош ми, нош ми… сизьым кузя, и ваньмылэн асьмелэн атай мы вань!

°°°

Вовик лыктӥз анаез доры но юа:
— Нэнэ, мон кинлы кельшисько?
— Мыным, пие.
— Нош тон кинлы кельшиськод?
— Аслам анаелы. Мон кисьтэм-басьтэм ӵужанаед кадь.
— Нош ӵужанае кин кадь?
— Со аслаз анаез тусо.
— Ӧй вала, нэнэ. Map-о, асьмеос ваньмы матрёшкаос кадь одӥг тусо-а, мар-а?

°°°

Пичи пи песянаеныз ӵош вашкала пӧйшуръёсты возьматон музее мынӥз.
— Ой, песянай, кыӵе кӧшкемытэсь та динозавръёс.
— Соос али ӧвӧл ни, нуноке.
— Нош тон пичи дыръя кыӵе кышкато вал, дыр, соос тонэ!

°°°

Петилэсь дышетӥсь юа:
— Пети, малы тон парта сьӧры уд пуксиськы?
— Пуксеме уг луы, толон мыным атае, марым… задачаез кызьы лэсьтыны валэктӥз.

°°°

— Вови, ку-о тынад атаед дневниктэ учке?
— Телевизормы тӥяськем дыръя.
— Пиналъёс, кин вералоз, малы кылдэ лысву?
— Мон тодӥсько! — кизэ жутӥз Вови. — Музъем сыӵе зол берга, пӧсям вуэз ик потэ.

°°°

Школаын телефон жингыртӥз:
— Алё! Директорез ӧте вал.
— Мон ик телефонэз кутӥ.
— Тӥляд дышетскисьты Перевощиков Петыр туннэ висе но школае уз мын.
— Нош кин та вераське.
— Мынам атае.

°°°

Химия урокын дышетӥсь юа:
— Мар луоз зарниен, сое ворсатэк возид ке?
— Ышоз!

°°°

Мукетаз урокын.
— Вералэ мыным, кызьы водород кылдэ?
— Туж огшоры: басьтӥськом сероводородэз, колбаын пӧсятӥськом, ваньмыз бус луыса лобӟем бере отчы водород кыле.
— Валамон. Туж усто. Пуктӥсько тыныд «вить». Нош «куинез» тӧлӟе, кыле на «кык».

°°°

Физика урокын дышетӥсь валэктэ:
— Шунтыку котьма но бадӟыма, кынтыку — пичия. Илья, маке вылын валэкты ай сое.
— Толалтэ кезьыт ке, нуналъёс вакчиесь, нош гужем шуныт, соин ик нуналъёс кузесь.

°°°

— Малы-о уӵы кырӟакуз синзэ кыне?
— Со вань кырӟанъёссэ учкытэк тодэ.

°°°

Можга РОНО-ысь инспектор, гуртэтӥ мыныкуз, школае сюресэз пичи пилэсь юаз. Соиз возьматӥз. Ӵуказеяз инспектор та пияшез ик картаысь Ижкарез шедьтыны косӥз. Доска дорын кема сылӥз ерпечка, собере шуиз:
— Тӥ милям гуртысьтымы школаеэ но уд шедьтӥське вал но, кызьы мон сю иськемысь Ижкарез шедьтом?

°°°

— Тон визьмо пияш ук, малы дышетскемед уг поты? — пизэ атай куаретэ.
— Ма, визьмо бере, мар дышетсконэз на?

°°°

Музее ветлэмзы бере пичи пи юа:
— Атай, нош малы ваньмыз тодмо адямиос музейёсын улӥллям?

°°°

Анай вить аресъем пизэ куаретэ:
— Ноку но ӧй малпа, таӵе ерпечка луод шуыса.
— Ачид янгыш, — мытылэ пиез. — Монэ басьтыкуд, этикеткаме сакгес лыдӟоно вал. Отын мон сярысь ваньмыз гожтэмын вал, дыр.

°°°

— Широбоков, кызьы-о тынад нимыд?
— Уг тодӥськы.
— Ма, анаед сиськыны кызьы ӧте?
— Со монэ ноку но уг ӧть. Тусьтые шыд ӝутытозяз, мон ӝӧк сьёрын пукисько ини.

°°°

— Пети, маин-о тонэ анаед сюдэ?
— Метыкен.
— Кызьы?
— Тусьтые шыд понэ но, ме, тык шуэ.

°°°

— Кыӵе ни школаын дышетсконэд, пие?
— Мон «кыкчилэн» атаеныз уг вераськиськы.

°°°

— Атай, мон туннэ быдэс классын огнам гинэ дышетӥсьмылэн юанэзлы верай.
— Мар сярысь бен со юаз?
— Кин укноез пилиз шуыса.

°°°

— Атай! Шумпот: асьмелы выль дышетскон арлы учебникъёс басьтыны кулэ уз луы.
— Малы, пие?
— Монэ та классэ ик кыкетӥ арлы кельтӥзы.

°°°

Нырысетӥ классын лыдӟиськон урок мынэ. Пичи пияш лыдӟе:
— Сы-у-мы-ка.
— Я, мар-о пӧрмиз, Пети?
— Портфель.

°°°

— Кин тӥляд семьяяды бадӟымгес? Тон-а, Иви, Петиды-а?
— Анай кылем арын шуиз, Пети мынэсьтым одӥг арлы бадӟымгес.
Озьыен, туэ мон сое сутӥ ини, огбыдӟаесь луимы.

°°°

Пиезлэсь бервылзэ утялтыса, анаез куаретэ:
— Валестэ но тынэсьтыд утялтоно, выждэ но ӵужоно, штанидэ но утчано… Кытчыозь та кыстӥськоз озьы?
— Кышнояськытозям.

°°°

Дышетӥсьсы Ондӥлэсь юа:
— Кинъёс уло Аляскаын?
— Эскикозъёс!
Классы серекъя. Ондӥ верам кылзэ тупатоно кожа:
— Эскизъёс!

°°°

Нырысетӥ классын дышетскись Ондӥ дышетӥсезлэсь юа:
— Марья Ивановна, нош пиналъёслэн пиналъёссы луо-а?
— Уг, будӥд ке, малызэ тодод!
Ондӥ артэ пукись нылэз чиньыеныз донгиз:
— Нош тон кышкаськод вал!

°°°

Ондӥен Вани Керемет гурезе тубиллям. Туж шулдыр инты. Ондӥ:
— Будӥ ке, татчы консерватория пукто, а то ялан консерваос сием потэ.
Вани:
— Ӧвӧл, нырысь обсерватория пуктоно, тырмоз куакъёс сьӧрын педло потаны…

°°°

— Песятай, тынад пиньёсыд вань на-а? — юа пичи Ондрей.
— Э-э, пие, дас вить ар талэсь азьло берпуметӥез усиз ни.
— Соку ме, пушмульыме возь.

°°°

Пичи пи мумизлэсь пушмульы куре.
— Ма, мешокез пертчы но одӥг кырым басьты.
— Ачим уг басьты, атай мед сётоз.
— Марлы?
— Солэн кырымез бадӟымгес.

°°°

Песятай пичи Юлялы улмо сётӥз. Анаез нылызлы шуэ:
— Нылы, мар шуоно песятайлы?
— Песятай, мемилы но улмодэ сёт.

°°°

— Мар кароно, йӧл медаз чырса шуыса? — юа атай пиезлэсь. — Шаплыгес юыса быдтоно,— валэктйз пиез.

°°°

— Анай, тон шуид, улмоын трос витаминэз, нош мон улмоез вандй но — одйг витаминзэ но ӧй шедьты.

°°°

— Миши, тон будӥд ке, кин-о луод? — юа анаез пиезлэсь.
— Шофёр.
— Малы?
— Соку тон мыным машина басьтод.

°°°

Пичи Пети эшезлэсь юа:
— Васи, тодӥськод-а, марлы луд кечлэн сыӵе кузь пельёсыз?
Васи кема йырберзэ кормаз, собере шуиз:
— A-а, тодӥ. Луд кечпи дыръяз со атаезлэсь уг кылзӥськы вал, дыр.

°°°

Анай тӧдьы дӥськутэз быректытыса ик чылкытатэ. Куать аресъем Васи юа:
— Анай, мар-о пӧзьтӥськод?
— Дӥськут.
— Мынам но тӧдьы дэреме отын-а?
— О-о, пие.
Васи малпаз, малпаз но шуэ:
— Котькӧня пӧзьты, но мон дэремме уг си.

°°°

— Нэнэ, нош мон тодӥсько, малы валъёсыз дуро.
— Малы?
— Соослы дага тыро, пыдъёссы медаз кынме шуыса.

°°°

Доразы выль буфет басьтэм бере, ньыль аресъем Иви ваньзэ ӧсъёссэ усьтыса учкылэ.
— Мае утчаськод, Иви?
— Нош Нюрапай кытын? Со буфетын ужа шуиз вал ук.

°°°

Базарын пичи мурт анай-атаезлэсь кылем.
— Йыромид-а, пичие? — юа одӥг кенак.
— Ӧй, мон татын. Только анаен атае йыромизы.

°°°

Атай ӝыт пал фотоплёнказэ проявить кариз но пайме:
— Ма, мар-о одӥг кадрез но потымтэ?
Пичи пиез артэ ик пуке но паймемзэ вера:
— О-о, атай, мон нуназе сое учки ини, соку но номыре ӧй адӟы.

°°°

— Эн кышка, пие, эмъясь тонэ номыр уз кары.
— Соку малы асьмеос со доры лыктӥмы?

°°°

Пичи пияш ваннаысен кесяське:
— Нэнэ, кыӵе дэремме мон туннэ дӥсялом?
— Ма, дӥся вакчи саесэнзэ. Малы-о юаськод?
— Тодыны кулэ, киме кытчыозь миськоно.

°°°

Пияш атаезлы шуэ:
— Атай, сузэрме нуыса мон жади ини. Ойдо воштӥськомы, табере тон сузэрме ну, нош мон — ӟенеликъёсын сумкаез.
— Мар тон, мар тон? Нош уськытӥд ке?

°°°

Кышномурт картэзлы вера:
— Тонэ нош ик школае ӧтизы. Пимы эшшо одӥг укноез пилем.
— Чёрт басьтон! Ма, коня отын укнооссы?

°°°

Арифметикая урокын: нырысетӥ классын, нырысетӥ дышетскон нуналъёсы.
— Пиналъёс, кин тодэ, кӧня луоз кык пол кык?
— Ньыль! — интыысеныз кеське Пети.
— Ой, визьлюк! Тани тыныд со понна ньыль кампет.
— Эх, тодысал ке, кампет сётозы шуыса, мон тямыс шуысал.

°°°

Уроке туж беромыса лыктэм Петилэсь дышетӥсь юа:
— Ма луиз, малы бер лыктӥськод?
— Ой, мон вылэ пыӵалэн йырвандӥсь омырскиз.
— Осто, Инмаре! Мар кариз?
— Дорын лэсьтэм уженым тетрадьме талаз.

°°°

Кык дышетскисьёс верасько:
— Туннэ анатомией контрольной гожъямы. Нош Санькалы дышетӥсь «кык» пуктӥз.
— Малы?
— Шпаргалка понна, пе. Санька аслэсьтыз урдльюссэ лыдъяны кутскиз…

°°°

Анай гур котырын берга но пиезлы шуэ:
— Ой, Серги, сылалмы бырем ук. Бускельёсмы доры ӝогак бызьылы ай. Только шаплыгес. Пал пыдыд татын, мукетыз — отын. Мынам шыдэ дасьлуэни.
Пияш штанзэ дӥсяз, пельпумаз пальто куштӥз, изьы изьыяз, пал пыдаз гын сапег кутчаз но ӧсэз усьтӥз ни вал. Анаез дугдытӥз:
— Кытчы тон пал сапеген? Визьтэммид шат?
— Ма, ачид шуид ук: пал пыдыд отын, мукетыз — татын. Малы-о татчы кылись пыдам юнме сапег кутчалом?

°°°

Дышетӥсь нырысетӥ классын дышетскись Колилэсь юа:
— Кык пол кык кӧня луоз?
— Куать.
— Ярам… нош кык вылэ кык ватсад ке, коня луоз?
— Вить.
— Ну соку… марым. Тӥляд ыждылэн кӧня пыдыз?
— Кудӥзлэн? Сьӧдэзлэн-а, тӧдьыезлэн-а?

°°°

Арнянуналэ Коли дышетӥсеныз пумиськиз но, пал кыл но вазьытэк, вӧзтӥз чульк гинэ ортчиз.
Дышетӥсь сое дугдытӥз:
— Ӟечбур, Коли. Map-о вазьылытэк ортчиськод?
— Ма, Марья Ивановна, туннэ ум дышетскиське ук. Арнянуналэ но ӟечбуръяськоно шат?

°°°

Уин пиез атаезлы вазиське: — Атай, тон изиськод-а ини? — Уг на, пие. — Атай, мыным сю манет кулэ вал. — Мон изисько ни, пие.

°°°

Пичи пи атаез доры лыктэ.
— Атай, мыным ката кулэ.
Атаез уг вазьылы.
— Атай, мыным кеды ке но басьты.
Атаез уг лула.
— Ата-ай, сандали басьтод-а?
— Малы, пие? Тон конькидэ но ӧд пӧськыты на ук.

°°°

— Коли, кыдёке эн уя! Эн уя кыдёке, шуи мон. Верамез уд валаськы ке, али ик тазикысь пот!

°°°

Пичи пияш уроке беромыса вуэм. Ӧсэз усьтыса, каллен гинэ пыре но, дышетӥсь уг адӟы кожаса, интыяз пуксе.
— Широбоков, уд тодӥськы шат, кызьы классэ пыроно? Анай-атаед тонэ дышето-а, уг-а? Выльысь пот но озьы пыр, кызьы атаед пыре. Пияш классысь потэ, минут ортчыса, ӧсэз пыдыныз ӵыжыса усьтэ но кеське:
— A-а, ӧд вите-а? Али ик ӝӧк вылэ сиён но юон!

°°°

Телефон жингыртэмез кылыса, трубкаез кутэ вить аресъем пичи пи.
— Алё.
— Ӟечбур, пияш! Анаед яке атаед дорады-а?
— Ӧвӧль…
— Нош кин ке вань на-а?
— Сузеле гинэ.
— Я, соку солы трубкадэ сёт али.
Ортче вить минут… дас… Собере пичи пи трубкаез ачиз кутэ.
— Алё, сузэле туж секыт, мон сое кӧкыысь поттыны ӧй быгаты.

°°°

Пичи пи школа вӧзын бӧрдыса сылэ. Вӧзтӥз ортчись кышномурт сое буйгатоно кариськиз.
— Мар бӧрдӥськод, пичие? Уроке беромид-а?
— Ӧй. Чернила юи.
— Я, я, со понна гинэ сокем эн бӧрд.
— Мон, кенак, соин уг бӧрдйськы. Юэм берам дышетйсьмы быдэс пачка промокашка сиыны косйз. Нош соосты нокытын уг вузало.

°°°

Пичи ныл трамвайын пуке. Со доры песянай лыктэм но шуэ:
— Нылы, пересь песяйлы интыдэ сёт вал. Мынам пыдъёсы висё.
— Песянай, нош тон пичи дыръяд интыдэ мӧйыослы сётӥськод вал-а?
— Одно ик.
— Вот пичи дыръяд пукысалыд ке, пыдъёсыд али но ӧй висьысалзы.

°°°

Сизьым аресъем пияш нискыланысь салазкиезтэк бертэм. Анай-атаезлы валэктӥз:
— Сое кыӵе ке пересь куриз пичи нуноксэ нискылатыны. Ньыль часлы дорамы ик пырто шуиз.
Атаез вожзэ поттэ: «Таӵе небыт сюлэмо будӥз ке пиез, вань арбериоссэ калыклы сётьяса быдтоз». Тани ньыль час но луиз ни, эшшо ӝыны час ортче. Ӧсэ жингыртӥзы. Вуиз пересь, салазкиез ваем, эшшо коробка кампет мыче. Пияш салазкизэ умой-умой эскериз но, кисыысьтыз зарни чассэ поттӥз:
— Ваньмыз умой. Мелэ, кутэ частэс.

°°°

Пияш дышетсконысь бертӥз. Песянаез юа:
— Мар туннэ кариды ини, пие?
— Химия урокын пуштылӥсь арбериосты эскерим.
— Осто, маин но уд выриське. Нош ӵуказе ма кароды со школаяды?
— Кыӵе школаын, песянай?

°°°

— Тон, Петя, будӥд ке, кин-о луод?
— Генерал.
— Ма, ожмаськонын генералэз виыны быгатозы ук!
— Ки-ин?
— Тушмонъёс!
— Соку мон… марым… тушмон луо!

°°°

— Анай, кампет сиёд-а?
— Тау, пичие!
— Ческыт-а?
— Туж ческыт!
— Паймоно кадь. Соку малы коӵыш но, пуны но сое ымысьтызы сялӟылӥзы меда?

°°°

Пияш гуртаз школаысь беромыса вуиз. Атаез куаретэмысь валэктӥз, пересь муртлы сюрес вамен выжыны юрттӥ, пе. Атаез пизэ ушъяз но кам­пет сётӥз. Ӵуказеяз пияш эшеныз ӵош вуиз.
— Атай, ми туннэ но песянаез ульча вамен поттӥмы.
Атаез быдэн кампет сётӥз.
Нунал ортчыса, пияш сьӧраз ӝыны классэз вуттэм.
— Атай, ми туннэ но песянайлы сюрес вамен потыны юрттӥмы.
— Нош малы сокем трос кузя?
— Ма, пересь пумитъяське вал но… мырдэм поттӥм.

°°°

— Вера ай, Широбоков, кыӵе вакытэ улмоез бичаны умойгес.
— Пуны жильыямын дыръя.

°°°

Пичи пи атайзэ суредам. Соиз туспуктэмзэ учкыса ушъя ини:
— Тунсыко, номыр ӧвӧл пӧрмем. Но малы тон монэ вож йырсиё карид?
— Ма… пилеш буёлэ ӧвӧл ук!

°°°

Анаез пиезлэсь юа:
— Кытчы-о дневниктэ карид? Сумкаысьтыд утчаса ӧй шедьты.
— Туннэ сое Вася басьтӥз, анайме кышкато, пе.

°°°

Пияш школаысь бертэ. Атаез солэсь юа:
— Map-о, туннэ доска доры тонэ ӧтьылӥзы-а?
— Бен. Нош ӵуказе тонэ ӧтё.

°°°

Семьяын выль патере выжон сярысь кенешо. Мумызы шуэ:
— Койкаосмы вылесь на ке но, пиосмылэсь яке асьмелэсьсэ вузано луоз. Со интые вӧл-вӧл диван басьтомы.
Тямыс аресъем пизы вераськонэ итӥське:
— Асьтэлэсьсэ вузалэ. Тӥлядэз дырын-дырын ӟукыртылэ. Вужмемгес ни, лэся.

°°°

Егит кузпалъёс ньыль но куать аресъем пиосынызы уло. Покчиез пизы огпол шуэ:
— Мон — Загребин, соин тӥ но ваньды Загребинъёс. Озьы ук, атай?

°°°

Пичи Саша но Игорь корка тыр кесяськыса шудо-бызьыло.
Песянайзы:
— Ма, тӥляд кӧйды ӵыжа ук? кӧйды…
Саша гур доры бызьыса мынӥз но шуэ:
— Песянай, татын нокыӵе кӧй но уг ӵыжа.

°°°

Куинь аресъем Кирилл песянаеныз выль пуктӥськись юртъёс дортӥ ортче.
Пияш:
— Песянай, учкы ай, учкы, коня «А» букваос?
Таиз — паймыса:
— Кытын? Уг адӟиськы, пие.
— Тӥни ук, коркаос йылын, — стропилаос шоры возьматыса вера.

°°°

Нырысьсэ школае вамыштыны дасяськись пияшлэсь песянаез юа:
— Кыӵе классэ бен, пие, мынӥськод ини?
Соиз мар вазьыны тодытэк кема сылэм бераз вазе:
— Уг тодйськы на, песянай. Монэ тон туж визьмоен лыдъяськод ук.
Оло, соку ик куинетӥ классэ пуксёно.

°°°

Гуртысь автобус Иж пала ширтэ. Кин умой-умой кӧлэ, кин нырулэ. Чал-чал. Городэ пыремзы бере мынйсьёс пӧлысь куать аресъем пияш сайка но, укное учкыса, автобус тыр черектэ:
— А калыкъёс то кӧня… А нош машинаос сколько…

°°°

— Петя, малы тол он школае ӧд ветлы?
— Кемагес изьыны шедьтй… Ой, шонер ӧй вера — виси… Ой, вунэтй, кызьы мемей вераны косйз вал.

°°°

Куинь аресъем Оля автомобильын пуке но лад-лад валэктэ:
— Таиз руль — машинаез валтыны, таиз пукон — гань-гань шутэтскыны, нош таиз — «дворникъёс» — машиналэсь синвуоссэ ӵушылыны.

°°°

Вера но Миша — куать аресъем нылпиос — куспазы верасько:
— Семьяямы ми трос кузя нылъёс: мон, анай, сузэре, песянае…
Миша, куспетӥ карыса:
— Песянаед но анаед нылъёс ӧвӧл ни ук…

°°°

Антонлы вить арес. Книгаысь со адӟылӥз адями ымнырен суредам шундыез. Одӥгаз шундыё нуналэ ульчае юмшаны потӥз:
— Мемей, малы шундылэн синмыз но, ымыз но, нырыз но уг адскы?
— ?..
— Нош мон тодӥсько, шунды ымнырыныз мукет пала берытскемын.

°°°

Антон, кӧло шуыса, валес вылэ выдӥз, нош ачиз синзэ но уг пытса.
Анаез:
— Антон, кӧл ини.
Антон:
— Умме уси ке, кӧло.

°°°

Вазь тулыс Антон анаезлэсь сапожки куре.
Анаез:
— Ульчаын дэри ӧвӧл на ук?
Антон:
— Мон утчало но шедьто.

°°°

Вить аресъем Света:
— Куке мынам буби армиын вал, ми соин самолётын туж трос лобамы. Во-от!

°°°

Владик садике печенья ваиз.
Вить аресъем Наташа шуэ:
— Сыӵе уг яратйськы, печенья зын ке вӧлске. Соку ик сием потыны кутске.

°°°

Нуназе пичиесь болгар огречъёс сётъязы. Ньыль аресъем Женя малы ке уг сиы.
Воспитатель юа:
— Женя, малы тон огречтэ ӧд сиы?
— Соос йёнала ӧз будэ на.

°°°

Воспитатель:
— Малы асьмеос сиськеммы бере тау кариськом?
Слава, ньыль арес:
— Медам тышкаське шуыса.

°°°

Вить аресъем Сашалэн песянаез Ижевске кошкиз. Огшап ортчыса, солэсь юало:
— Песянаедлэсь мӧзмиськод-а?
— Уг, бертэмез бере мӧзмо.

°°°

— Кыӵе пайдаез пуныосты воземлэн?
Дима, вить арес:
— Чырсам шыдэз солы киськаны луэ ук. Уг изъянмы.

°°°

Куинь аресъем Маша витамин сие но ымнырзэ кисыръя.
— Витаминъёс чырсаллям ини.

°°°

Урокын писпуос сярысь вераськон мынэ.
Дышетӥсь:
— Кыӵе писпуос нюлэскын будо?
Оля:
— Пужым, кыз.
Валя:
— Кызьпу, пипу, палэзьпу, шупу.
— Шонер, кин ватсалоз на?
Коля:
— Лӥял.

°°°

— Эй, апай, тынад-а со пиед мынэсьтым картузме вуэ куштӥз?
— Ӧз, мынам пие сыӵе укылтэм ӧвӧл. Ма, кытын-о пие? A-а, тӥни со, воксё мукет интыын, коркадылэн сигаз тылске.

°°°

Санко агай покчиослэсь йырзэс «тӥяны» яратэ вал: олокыӵе но мадиськонъёс, юанъёс сётъялляз. Одӥг пол со пиослэсь юаз:
— Дунне вылын кыӵе профессия тужгес но устоез?
Пиналъёс олокыӵе но удысын ужасьёсты тодазы ваизы. Нош Санко агай йырзэ гинэ сэзъя. Бӧрысь ӧз чида ни, пальпотыса вераз:
— Дунне вылын тужгес но устоез уж — реактивной самолётын коче­гар луыса ветлон… Отын тӧдьы перчаткаен гинэ ужало.

°°°

Уллапал пиналъёс ляге кызаузы бичаны мынӥллям. Ӵуштрык Ванька кызэ тубем но утыр выжыяз вуэм. Эшъёсыз котыртӥллям, сюлмасько, вӧсь, пе, ӧз луы-а. Соиз султэ но Микол эшезлы вазе:
— Чик вӧсь ӧй луы, озьы-а, Микол?

°°°

Гид азьын ӝоместыса сылӥсь скал котыртӥ пиез гожеръямысь мемиез юа:
— Пие, мар ай тон скалмылэсь уд ӵыдӥськы?
— Ма, скалмылэн ымаз жвачка вань, лэся. Ымысьтыз сое кызьы ке басьтоно вал.

°°°

Зӧк кисы ӝӧк сьӧрын пуке, малпаськыса жуммемын ини.
— Мар сыӵе луиз? — юа пырем эшез.
— Тани ослопелы доре уж сётӥллям. Задача лэсьтӥсько: Ижкарысь Москвае кык вагон потэмын, нош одӥг контейнер гинэ вуэмын. Ортчем иськемъёсыз но, дырыз но вань. Уг валаськы, кытчы кык вагон луиз?
— Ма, шедьтэм маин йырзэ тӥяны. Буйгатскы, туннэ уин ик быдэс Ижкар шпанаез пыд йылаз ӝуто: со ышем вагонъёстэ одно шедьтом.

°°°

Эшезлы зӧк кисы вера:
— Мынам вордскем нуналам черкысь кузьым сётӥзы — Евангелие. Автографен ик!
— Пӧяськод!
— Зэмзэ но, озьы ик гожтэмын: Матфейлэсь.

°°°

Пумисько кык зӧк кисыос. Огез туж сюлмаськись тусо.
— Map-о сыӵе луиз?
— Ма, дыр туж ӝог лобӟе. Толон пиелы дас кык арес тырмиз.
— Солы шумпотоно ук.
— Бен, но сое куать арескысен школае сётоно ни вылэм. Вунэтӥськеммы.

°°°

Кышноезлы зӧк кисы вера:
— Туннэ нылмылэсь дневниксэ учки но, пыд йылысьтым ӧжыт гинэ ӧй погра.
— Map-о, трос «кыкъёс» басьтылэм-а?
— Ӧвӧл! Нылмы витетӥ классын дышетске ни вылэм!

°°°

Зӧк кисылэн пиез — студент ӝожъяське:
— Тодӥськод-а, атаелы телеграмма ыстӥ, сиськыны уксёе уг тырмы шуыса.
— Оло, одӥг манет но ӧз ысты-а?
— Ӧвӧл, со быдэс ресторанэз басьтэм но мон вылэ гожтэм.

°°°

Зӧкмет «Мерседесэныз» мынэ, сюрес урдсысь турын сиись адямиез адӟе. Дугдыса дораз матэктэм.
— Эй, тон, пыдӥылчи, мар-о турын сииськод?
— Ма, куинетӥ нуналзэ сютэм улӥсько ни.
— Я, иське, кошким монэн, мынам туннэ мылкыды ӟеч.
Машинае пуксизы, ширто. Пыдӥылчи паймемын:
— А шуо вал, марым, зӧк кисыос, пе, сукесь. Ваньмыз со пӧяськон вылэм.
— Али асьмеос куинь этажъем особняк доры вуом. Нош котыраз турынэз кыӵе! Тон сыӵезэ ӧд на сиылы!

°°°

Зӧк кисы шайвылэтӥ ветлэ: дуно изъёслэсь синпелетьёсты, зарнивуам кенеръёсты учкылэ:
— У-у, уло ук адямиос!

°°°

Узыр мурт дворец басьтэм. Кызьы-о отчы эштэ, мукетсэ зӧк кисыез, ӧтьыса ушъяськытэк?
— Тани таиз — мынам комнатае, таиз — кышноелэн, таиз — пиелэн, таиз — нылылэн. Таиз — мынам ванное, таиз — кышноелэн, таиз — пи­елэн, таиз — нылылэн. Таяз комнатаын мон телевизор учкисько, таяз — кышное, таяз — пие, таяз — нылы.
Озьы быдэс нунал дворецетӥз нуллэм. Ӵуказеяз эшез мукет эшсэ пумитам но вера:
— Толон Вован доры ветлӥ, выль юртсэ возьматӥз.
— Кыӵе-о?
— Огшоры. Банкоматэз гинэ но ӧвӧл.

°°°

Зарезь дурысь паймымон чебер пыласькон инты. Куамын градус пӧсь. Кин пылаське, кин луо вылын кылле. Но тани самолёт лобе, отысь парашютэн адями тэтче. Луо вылэ эмезь буёло пиджакен, галстукен, куасэн мурт лэзиське. Ваньмыз валэктыны дырто, татын гурезьёс но, лымы но ӧвӧл шуыса. Нош со нокыӵе кариськытэк шуэ:
— Я, чалме ини. Тани бореям кык самолёт лобе на. Гурезьёс но, лымы но луозы.

°°°

Зӧк кисы дораз кыкетӥ нуналзэ гинэ ай ужась секретаршазэ куаретэ:
— Малы телефон жингыртыку трубкаез уд кутӥськы? Тон со понна татчы пуктэмын ук.
— Маке мон уг валаськы. Татчы ваньмыз тӥледлы гинэ жингырто ук.
Мынэсьтым татын ужамме одӥг эше но уг тоды на.

°°°

Кык воргоронъёс пересь дядяйёссылэн узырлыкенызы ушъясько. Одӥгез шуэ:
— Мынам песятаелэн со кузя вал гидэз вал — одӥг пал пумаз коблаез бызьылыто ке, мукет пал пумаз вуытозяз чуньы вае ини.
Мукетыз вера:
— Нош мынамезлэн со кузьда бодыез вал — выллань ӝутэ ке, пилемозь вуэ, шундыё нуналэ вылӥ пал пумыз сутскыны кутске.
Эшез паймыса ик юа:
— Кытын-о со кузьда бодызэ возе вал?
— Тынад песятаедлэн вал сигаз, шуо.

°°°

Узырлыкеныз мар карыны тодӥсьтэм егит воргорон чорыганы мынэм. Пуке, пе, пуке, нош чорыг ялан уг зыгаты. Кошкыны малпам вылэм ини. Со виекын пукыез ву пыдсозь ик выем. Поттэ но — куриказ зарни чорыг дэмӟем. Таид адями кылын вазиськем:
— Лэзь вал тон монэ, ӟеч адями. Вань куронъёстэ быдэсто. Кулэ ке, дворец быдӟа юрт пукто.
— Мынам аслам куинь этажъем коркае вань.
— Соку туж усто машина кузьмало. Сыӵезэ дунне вылын ӧз адӟылэ на.
— Соиз но кулэ ӧвӧл. Кышноелэн но, пиелэн но, аслам но машинаосмы вань.
Чорыг малпаськыны кутскем: «Майн меда та воргоронэз паймытоно?»
— Нош самой чебер кышномуртэн тодматӥ ке?
— Мылы потэ ке, мон соосты ачим коть нош ку шедьтӥсько.
— Соку ачид мар ке кур — быдэсто.
Ӧжытак малпаськемез бере зӧк кисы шуэ, пе:
— Герой карыны быгатод-а? Вань калык монэ мед вералоз.
Чорыг соглаш луэм. Воргоронэз ож тылӝуэ вуттэм. Тани со огназ сылэ. Вань эшъёсыз быремын ни. Нош азьпалан кызь тушмон танкъёс лыкто.
— Зарни чорыг! — кесяське, пе, воргорон. — Мон таӵе амалэн герой луыны ӧй малпа вал. Уть монэ!

Со сяна, учке

• Анекдот (ӟуч)